كيف يمكن أن أساعد مريض نفسي؟
كلنا بنمر بأوقات صعبة وبنحتاج الدعم من اللي حوالينا، وفي نفس الوقت لما نلاقي حد بيمر بمشكلة نفسية ومحتاج مساعدة لازم نقف جمبه. سواء كان مالعيلة أو زميل أو صاحب. في حاجات كتيرة ممكن نعملها علشان نساعدهم.
لما حد يكون بيمر بوقت صعب، أهم حاجة وأول حاجة نعملها هي أننا نتكلم معاه ونسمعه. علشان نعرف أي اللي مضايقه.
شاكك إن عندك اكتئاب؟ دوس هنا واعمل اختبار الاكتئاب أونلاين
المحتويــات
إزاي أعرف أن حد عنده مشكلة؟
الموضوع ممكن يبان بسهولة لو أنت تعرف الشخص دا كويس، هتلاحظ تغيير في تصرفاته ومزاجه. لكن بردوا المشاكل النفسية والعقلية بتختلف أعراضها من حد للتاني. علشان كدا مش مهم تعرف عنده أي، المهم أنك تقدمله المساعدة اللي محتاجها.
إزاي أساعد المريض النفسي؟
في طرق كتيرة ممكن تساعد بيها، زي:
فضي وقتك
لازم توفر وقت للمريض النفسي علشان تقدر تفهمه كويس وتحسسه بوجودك جمبه، ويثق فيك ويقدر يخرج من حالته.
سيبه يتكلم براحته
وأنت بتتكلم مع أي مريض نفسي، سيبه يتكلم براحته. يعني بالطريقة اللي تعجبه وكتير أو قليل. مينفعش أبدًا تضغط عليه في حاجة هو مش حابب يتكلم عنها. وخد بالك، الشخص التعبان علشان يفضفضلك دا بيحتاج منه الشجاعة والثقة فيك، ويمكن تكون أول واحد يقوله الكلام اللي جواه.
متشخصوش
لما تتعامل مع حد بيمر بأزمة نفسية، متحاولش تشخصه هو مش محتاج منك كدا. ركز في أنك تساعده وتديله اللي محتاجه منك. لأنك مش دكتور نفسي مؤهل لتشخيص المرض.
خليك محايد
خليك محايد متاخدش موقف معين، أو تحسسه بميلك لرأي معين. يعني مثلًا بدل ما تقول أنا شايف أنك محبط، ممكن تقوله ما تقولي أنت حاسس بأي. كمان لازم تديله وقت يجاوبك ومتسألوش كتير.
ساعده يتخلص من التوتر
الشخص اللي بيكون مريض نفسي، هتلاقيه دايمًا قلقان ومتوتر. انصحه بحاجات تساعده يخلص من توتره، مثلًا قوله يلعب رياضة، وياكل كويس، ويبعد عن الأكل اللي مش صحي. كمان لازم ينام حلو لأن مشاكل النوم بتزود التوتر والتعب النفسي.
اسمعه كويس
لازم تسمع اللي قدامك كويس جدًا وتحسسه بكدا، وكمان ممكن تعيده ليه وتقوله أنك فهمته. علشان دا معناه أنك بتحترم مشاعره.
انصحه يزور دكتور
لازم تعرض على المريض النفسي أن يشوف دكتور. وكمان روح معاه وساعده يعبر عن اللي جواه.
اعرف حدودك
أنك تقدم دعم للمريض النفسي دا شيء كويس جدًا، لكن عمومًا لازم تعرف حدودك أي معاه. متسبش نفسك لازم تهتم بيها هي كمان. يعني خد وقتك وارتاح، وفي نفس الوقت ساعده، يعني وفق بين الحاجتين. وطبعًا لو شايف أنه في خطر كبير أو معرض لإصابة أو مشاكل، فلازم تتحرك فورًا وتطلب مساعدة وتتأكد من سلامته.
اعرف أكتر عن المرض
لو عرفت أن الشخص عنده مرض معين، فالأفضل أنك تقرا عنه علشان تقدر تفهمه أكتر وتعرف إزاي تساعده. يعني مثلًا في ناس بتضايق من تصرفات حد قريب منهم وبيشوفوه غريب ومينفعش يتصرف كدا. لكن فالحقيقة هو مجبر على دا، مرضه أجبره، علشان كدا القراية عن المرض مهمة.
اطلب مساعدة
لو أنت مش قادر تساعد، فلازم تطلب من حد يقدر. في ناس بتتكسف تطلب مساعدة لحد عندهم تعبان. لكن دا طبعًا غلط جدًا، علشان كدا دلوقتي في توعية كبيرة بالأمراض النفسية وإزاي نتعامل معاها من غير كسوف.
نصايح سريعة لمساعدة مريض نفسي:
- اسمعه ومتحكمش عليه وركز على اللي هو محتاجه
- اسأله أساعدك إزاي
- طمنه
- اسأله عايزني اتصلك بحد
- شجعه على أن يروح لدكتور يساعده
- لو أذى نفسه، أعمله الإسعافات الأولية بسرعة
أعمل أي مع شخص عايز ينتحر؟
لو حد قالك أنه عايز ينتحر ومش قادر يكمل حياته، فلازم تشجعه على أنه يزور دكتور ويلاقي مساعدة طبية. وممكن طبعًا تكلم أهله أو المقربين ليه علشان يوقفوا جمبه.
