٧ حاجات تعملهم لو شريك حياتك مُدمن
أوقات العلاقات اللي بنختارها بإيدينا هي اللي بتكون سبب تعاستنا على عكس العلاقات اللي مبيكونش لينا يد فيها زي إننا اتولدنا لأب مُعين وأم معينة وقرايب محددة، عشان كدة بندور عاللي يريحنا ويراضينا ونعيش مبسوطين مع اللي اخترناهم لحد ما تحصل حاجة تدمر الدنيا. وأكبر حاجة ممكن تقلب العلاقة بين اتنين رأسًا على عقب إن طرف فيهم يتشد للطريق الصعب والضلمة اللي هو الإدمان.
ازاي الإدمان بيأثر على الحياة بين الأزواج؟
أي حد بيرتبط أو بيتجوز شخص ليه علاقة سابقة مع الإدمان أو لسة مُظمن بيكون عارف إن الإدمان ده بيدمر العلاقة من قبل ما تكمل،ولكن أوقات مبيكونش عارف بس الإدمان مش حاجة تستخبى أصلًا، ممكن ميظهرش في الأول أيوة بس بعدين بيظهر على هيئة طلب الكحول أو المُخدر كدواء مثلًا وبعدين الأمر يتطور لحد ما يبقى جُزء من اليوم وكل أعراض الإدمان تظهر على صاحبها.
ولكن سواء الموضوع كان واضح قبل الجواز أو لأ فهو مؤثر وأثره سلبي، لإن أولوية شريك الحياة المُدمن بتختلف تمامًا عن أولوية الشخص الطبيعي، الشخص الطبيعي بتكون أولوياته هي شريك حياته وأولاده وبيته ولكن أولوية الشريك المُدمن بتكون المُخدر-ومش مُهم نوعه-وبيكون مُستعد يضحي بأي حاجة مُقابل حصوله على الجُرعة اللي محتاجها، غير إنه بيكون شبه مش عارف الشخص اللي عايش معاه ولا فاكر قصة حبهم وارتباطهم ولا أي حاجة، ولا قادر يتواصل مع العيلة ولا الناس غير إنه بيفشل في شغله، عشان كدة لو فشل علاجهم بيكون الحل الوحيد للطرف التاني إنه يمشي ويسيب شريك حياته في الطريق الصعب اللي اختاره ومش عايز يطلع منه عشان يعرف ينقذ نفسه واللي باقي من بيته.
طب لو مش هتقدر تمشي، تعمل إيه لو بتحب شريك حياتك المدمن؟
قبل أي حاجة خليك عارف إنك بتتعامل مع شخص غير اللي عرفته وحبيته وان الإدمان غيّر كُل حاجة فيه، وعشان كدة دي ٧ حاجات لازم تحطها في اعتبارك وتعملها سواء قررت تكمل أو لأ:
- متنكِرش الحقيقة: أكيد الإدمان شئ مؤلم وتصديق حقيقته صعبة علينا خاصة لو الشخص ده قريب مننا بس صدقنا، انت لو عملت نفسك مش مُدرك خطورة الموقف واتعاملت معاه على إنه عادي انت مش هتكون بتساعد الشخص ده أبدًا بالعكس بتخليه يكمل من غير شعور بالذنب، فلازم تصدق الحقيقة المُرة دي عشان تعرف تتعامل معاها.
- اقرأ أكتر عن الإدمان: عشان تعرف تتعامل مع الشخص اللي قدامك إنه مش مُذنب ولكنه مريض والقراءة عن الموضوع ده والكلام مع المتخصصين هيخليك قادر تتعامل معاه بالطريقة اللي هو محتاجها.
- اعرف طبيعة العلاقة بعد الإدمان”علاقة الاعتماد المُتبادل”: وده لإن الإدمان مش بيأثر على صاحبه بس ده بيأثر على دايرة المحيطين بالمدمن كُلها، عشان متستغربش المشاعر اللي هتجيلك وهتكون مُشابهة لمشاعره بس هو من أثر المُخدر وانت من أثر خوفك وقلقك لإدمانه ورجوعه للمخدر.
- اقفل عليه كل الأبواب: وده لإن المدمن بيحاول بكل وسيلة ممكنة ومتاحة إنه يوصل للمخدر اللي محتاجه وانت دورك انك تصعّب عليه المهمة دي وتقفل في وشه أي باب يقدر يوصل بيه للمخدر ده.
- اتواصل مع مجموعة دعم: بيفرق جدًا في علاج الإدمان وجود عدد من اللي بيطلبوا العلاج والمتعافيين في دايرة واحدة عشان كدة لازم تتواصل مع مجموعة من المجموعات دي وتعرف استراتيجية التعامل مع المُدمن وتتعامل معاه أو تبدأ تاخده وتروح بيه الجمعيات دي عشان تسرّع خطوات العلاج.
- حدد موقفك: لو بعد كُل المحاولات والعلاج لقيت الموضوع بيفشل هنا لازم تحدد موقفك إمّا إنك تكمل الطريق وتحاول تاني برغم فشل التجربة وإما إنك تمشي وتسيبه لمصيره، انت بس اللي لازم تحدد الحدود بتاعتك وإيه اللي يناسبك عشان تقدر تقرر قرار يساعدك ويساعده ومتفضلوش واقفين محلّك سرّ.
- خلي بالك من نفسك: مفيش حد تقدر تغيره في الدنيا غيرك، وانت في رحلتك لعلاج عزيز عليك خليك عزيز على نفسك وخُد بالك من نفسك لإن ده سبيل الوقاية الوحيد من إنك تتشد للطريق ده أو إنك تنهمك في المحاولة وتتعببكدة مش وهتقدر تكمل وتخسر نفسك وتخسر شريك حياتك.
