ما هو دور الاخصائي النفسي الاكلينيكي؟
الاخصائي النفسي الاكلينيكي شخص بيساعد الناس في علاج المشاكل العقلية ومشاكل السلوك. وبيقدر يفسر التصرفات ويشخص الأمراض وبيحط خطة العلاج المناسبة.
لازم الاخصائي النفسي الاكلينيكي يحدد علاج كل مريض على حسب حالته. يعنى لو حتى اتنين عندهم نفس المشكلة، فممكن يكون استجابتهم للعلاج مختلفة.
شاكك إن عندك اكتئاب؟ دوس هنا واعمل اختبار الاكتئاب أونلاين
المحتويــات
أي دور الاخصائي النفسي الاكلينيكي؟
الاخصائي النفسي الاكلينيكي بيعالج سلوكيات عقلية كتيرة وفي منهم بيختار التخصص في حاجة واحدة زي مثلًا الفصام. لكن مهم تعرف أنهم مش بيوصفوا أدوية، لأن الدكاترة النفسيين بس هما اللي مصرحلهم بكدا.
هدف الاخصائي النفسي الاكلينيكي مساعدة المريض في أنه يحدد مشكلته النفسية أو العاطفية أو السلوكية. كمان بيساعده في تحديد هدف العلاج علشان يقدر يرجع طبيعي وينجح. وجزء كبير من شغله بردوا أنه يشوف قد أي العلاج نجح عن طريق مقابلة المرضى وشوية اختبارات.
مجموعة مسئوليات للاخصائي النفسي الاكلينيكي
- مقابلات مع المرضى علشان يعرف مشكلتهم واحتياجاتهم
- تقييم لمواقف وسلوك وقدرات المريض عن طريق شوية اختبارات نفسية
- بيشخص الاضطرابات النفسية والعاطفية والسلوكية
- بيحط برامج لتعديل السلوك بعد ما يعرف المشكلة
- بيبتكر ويطور وينفذ العلاج
- بيشوف المريض بيتحسن ولا لأ عن طريق جلسات علطول معاه
- بيشوف أي العلاج اللي نجح
- بيتواصل مع قرايب المرضى علشان يعرف منهم معلومات أكتر عن المريض وكمان يتابع تطوراته
- التدريس وبيعمل أبحاث
أي هو مكان شغل الاخصائي النفسي الاكلينيكي؟
الاخصائي النفسي الاكلينيكي بيلاقوا شغل في أماكن كتيرة، مثلًا في عيادته أو مستشفيات الصحة العقلية أو بيوت جماعية. كمان ممكن يشتغل تبع البرامج الحكومية أو الخيرية اللي بتخدم المجتمع. أو يشتغل في الجامعات للتدريس.
تخصصات فرعية للاخصائي النفسي الإكلينيكي:
علم نفس الطفل
بيشتغلوا مع الأطفال والمراهقين، وبيطبقوا أساليب علمية مححدة علشان يفهموا احتياجات الأطفال وإزاي بيفكروا. مثلًا بيعالجوا مشاكل زي؛ صعوبات التعلم، وإدارة الغضب، واضطرابات النمو، والإيذاء العاطفي والجسدي.
علم نفس الصحة
الاخصائي النفسي الإكلينيكي بيهتم بدراسة العوامل اللي بتأثر على صحة الإنسان النفسية وأهمها العوامل الاجتماعية يعنى علاقته بأسرته وأصحابه وزمايله وغيرها من العلاجات الإجتماعية. الحاجات اللي بيركزوا عليها زي السلوكيات والأفكار المضرة والتوتر والقلق.
علم النفس العصبي
دا بيدرسوا فيه العلاقة بين تصرفات الإنسان وبين دماغه وجهازه العصبي وإزاي بيأثروا على بعض. وشغلهم بيهتم بتشخيص وعلاج أمراض زي السكتة الدماغية ومرض الزهايمر ومرض باركنسون وصعوبات التعلم.
مهارات الاخصائيِ النفسي الإكلينيكي
في صفات لازم تكون عند الاخصائي النفسي الإكلينيكي علشان يقدر يقوم بدوره وهي:
- يفهم كويس طبيعة الأمراض النفسية وإزاي بتيجي لأي حد في أي سن.
- يعرف إزاي يتعامل مع كل المشاكل النفسية ويشخصها ويحط علاج مناسب ليها.
- يقدر يعمل اختبارات نفسية ومنها يشخص المريض ويحددله العلاج المناسب.
- يقدر يعمل علاقات قوية مع زمايله، ويتعاون ومعاهم وكمان يستشيرهم.
- يفهم أن الناس مش زي بعض، في فروقات اجتماعية وثقافية وغيرها من الحاجات اللي بتأثر طبعًا في تكوين الإنسان.
- ملتزم بالمبادئ الأخلاقية المهنية.
- يحاول يطور نفسه دايمًا.
- يبقى عارف التخصصات التانية المرتبطة بعلم النفس الإكلينيكي.
- يقدر يعمل أبحاث علمية.
صفات الأخصائي النفسي الإكلينيكي
الأخصائي النفسي الإكلينيكي لازم يكون عنده صفات تأهله يقوم بدوره ومنها:
- يهتم بالمرضى واللي عايزينه ويدعمهم، من غير نية للسيطرة عليهم، أو توجيهم لأفكار معينة
- يسيطر على مشاعره ورغبته، ومتأثرش على شغله.
- يتقبل الاختلافات بأنواعها ثقافية أو اجتماعية أو دينية. ويكون متسامح ومش منحاز لأفكار معينة.
- واثق من نفسه وقراراته علشان يقدر يكسب ثقة المريض.
- يقدر يتابع كل جديد في مجاله.
- عنده روح القيادة وذكاء اجتماعي.
- القدرة على التحمل وعنده إحساس بالمسئولية.
- يقدر يوازن بين شغله وحياته الشخصية، وطبعًا ميهملش حياته.
- الصبر والتعاطف مع المرضى والإحساس بمشكلاتهم. لأن مهمته في الأساس أنه يخلي حياة المرضى أحسن.
أدوات الاخصائي النفسي الإكلينيكي اللي بتساعده عالتشخيص
الاخصائي النفسي الإكلينيكي بيعتمد على شوية أدوات علشان يقدر يعرف الأمراض النفسية اللي عند المرضى. والأدوات دي هي:
- الاختبارات النفسية: دي من أهم أدوات التشخيص. لأنها بتفهمه سلوك الشخص وإزاي بيتعامل مع المواقف المختلفة، وكمان مشاعره وانفعالاته وموقفه من العلاج النفسي.
- المقابلة أو الجلسات الفردية: دي مهمة جدًا، علشان يقدر يقرب مالمريض ويفهمه، ويعرف مشاعره حوالين نفسه وغيره.
- دراسة الحالة: يعني يقدر يجمع كل المعلومات عن المرضى، زي صحتهم، وحالتهم الاجتماعية، والأسرية، والدراسية.
كل المعلومات دي طبعًا بتساعد في أنه يعرف الحالة العامة للمريض وإزاي بتأثر على نفسيته.
