ما هي انواع الاكتئاب؟
كلنا بنمر بأوقات ضيقة وحزن. دي مشاعر طبيعية وغالبًا بتمر في خلال أيام أو حتى أسابيع قليلة حسب حجم الحاجة المسببة الحزن. لكن الحزن الجامد اللي بيطول أكتر من أسبوعين وبيخلي الإنسان مش قادر يعيش حياته بشكل طبيعي دا اكتئاب.
علامات الاكتئاب هي، مشاعر حزن كبيرة، ومزاج متغير، واحساس بعدم القيمة، وشهية متغيرة، ومشاكل فالنوم سواء قليل أو كتير، وكمان سهر بالليل ونوم بالنهار، ومفيش اهتمام بالحاجات اللي كانت محبوبة، وبعد عن الأصحاب. مش بس كدا، لأ الموضوع بيوصل للتفكير فالانتحار أو أذية النفس بأي طريقة.
شاكك إن عندك اكتئاب؟ دوس هنا واعمل اختبار الاكتئاب أونلاين
المحتويــات
أي انواع الاكتئاب؟
في أنواع كتير للاكتئاب، وعلى الرغم من أن في أنواع بتشترك في الأعراض، لكن لازم بتكون في اختلافات مابينهم. ومن الأنواع دي:
الاكتئاب الشديد
نوع منتشر من الاكتئاب، في دراسة اتعملت سنة 2017 بتقول أن أكتر من 17 مليون واحد جالهم اكتئاب شديد في أمريكا بس. أعراضه بتكون موجودة طول اليوم مع الشخص وهي:
- حزن أو كآبة
- صعوبة في النوم أو النوم لأوقات طويلة
- مفيش طاقة
- الشهية متغيرة
- أوجاع في الجسم
- مفيش اهتمام بأي حاجة
- مفيش تركيز
- مبتفتكرش حاجات كبير
- متقدرش تاخد قرارات
- إحساس بعدم القيمة
- اليأس
- التفكير في الموت والانتحار
الأعراض دي ممكن تقعد أسابيع أو حتى شهور. وفي ناس بيجلهم الاكتئاب الشديد مرة واحدة فحياتهم، وناس تانية ممكن يجلهم أكتر من مرة.
الاكتئاب المستمر
النوع دا من الاكتئاب مش بيقعد أسبوع ولا اتنين لأ بيقعد بالسنين. لكن الاكتئاب المستمر مش قوي زي الاكتئاب والشديد، لكن في الأول والآخر اكتئاب وله تأثير وحش على حياتك اليومية في البيت أو الشغل أو المدرسة. أعراض بتكون:
- حزن عميق أو يأس
- عدم احترام نفسك أو الإحساس بعدم الكفاءة
- مفيش اهتمام بالحاجات اللي استمتعت بيها قبل كدا
- تغيرات الشهية
- تغييرات في شكل النوم أو قلة الطاقة
- مشاكل التركيز والذاكرة
- صعوبة في العمل في المدرسة أو العمل
- مفيش فرحة حتى في المناسبات الحلوة
- البعد عن الأهل والأصحاب
في ناس ممكن يجلها نوبة اكتئاب شديدة وهي عندها اكتئاب مستمر من فترة كبيرة ودا بيسموه اكتئاب مزدوج.
الهوس الاكتئابي أو الاضطراب ثنائي القطب
دا معناه أن شوية الشخص بيكون مكتئب جدًا وشوية بيكون فرحان بطريقة غريبة. كمان علشان الدكتور يقدر يشخص حد بثنائي القطب، لازم الشخص يكون مر بنوبة هوس لأكتر من 7 أيام. أعراض الهوس بتكون:
- طاقة عالية
- قلة نوم
- تهيج
- سرعة في الأفكار والكلام
- التكبر
- زيادة في احترام النفس وزيادة الثقة فالنفس
- سلوك غريب وخطير ومدمر
- الفرحة الكبيرة
الذهان الاكتئابي
الناس اللي عندها اكتئاب شديد ممكن يجلها ذهان في أوقات معينة، ودا بيسببلهم هلوسة وأوهام. الهلوسة يعني الشخص يسمع أو يشوف ناس أو حاجات مش موجودة. وممكن كمان يشم أو يدوق حاجة. أما الوهم بيكون حاجة الشخص مصر عليها على الرغم من أنها غلط، لكن هو شايفها صح. الذهان مش بس بيسبب أعراض نفسية لأ كمان ممكن يأثر عالجسم فيعمل مشاكل فالقعاد أو بطء في الحركة عمومًا.
اكتئاب ما حول الولادة
دا بيحصل فالفترة اللي حوالين الولادة يعني في الحمل أو 4 أسابيع من الولادة، في ناس ممكن تفكره اكتئاب ما بعد الولادة. لكن لأ دا اكتئاب قبل وبعد الولادة كمان. الهرمونات المتغيرة هي السبب فيه. كمان قلة النوم والقلق المرتبط بالحمل والولادة. الأعراض ممكن تكون شديدة زي أعراض الاكتئاب الشديد. وهي:
- الحزن
- القلق
- الغضب
- قلق شديد بخصوص صحة الطفل وسلامته
- صعوبة في الاهتمام بنفسك أو طفلك
- أفكار في إيذاء النفس والطفل
الاكتئاب دا ممكن يحصل لأي واحدة حامل أو لسه مخلفة. لكن بيحصل أكتر للستات اللي جالها اكتئاب قبل كدا ومش لاقية دعم من اللي حواليها.
اضطراب ما قبل الطمث الاكتئابي
دا بيحصل قبل الدورة الشهرية عند بعض البنات والستات، ودا شكل صعب من متلازمة اسمها “متلازمة ما قبل الحيض (PMS). مثبلًا في ناس تحس بعاطفة أكبر في الأيام اللي قبل الدورة الشهرية، وناس تانية بتحس بالحزن والضيقة ومفيش رغبة تعمل أي حاجة. وكمان أعراض زي:
- تشنجات
- نفخ
- حنان الثدي
- الصداع
- آلام المفاصل والعضلات
- الحزن واليأس
- التهيج والغضب
- تقلبات مزاجية شديدة
- رغبة شديدة في الأكل
- نوبات هلع أو القلق
- مفيش طاقة
- مشكلة في التركيز
- مشاكل في النوم
الاكتئاب الموسمي
الاكتئاب الموسمي اكتئاب بيحصل في فصول معينة. وبالنسبة لأغلب الناس بيحصل في الشتاء، والأعراض غالبًا بادأ في الخريف. النوع دا مالاكتئاب بيزيد كل مالأيام بتعدي، وممكن يوصل للتفكير في الانتحار. لكن بمجرد مالصيف يبدأ، بتبدأ الأعراض تتحسن. ودا كله ناتج عن تغيرات في الجسم مرتبطة بالفصول. وأعراضه بتكون:
- البعد عن التجمعات
- البعد عن المقربين
- رغبة في النوم
- زيادة في الوزن
- مشاعر حزن أو يأس
الاكتئاب الظرفي
دا زي ما واضح من اسمه بيحصل بسبب ظروف معينة زي:
- موت حد مالأسرة
- مرض خطير
- الطلاق أو مشاكل زي حضانة الأطفال
- العلاقات المؤذية عاطفيًا أو جسديًا
- البطالة
- الأزمات المادية
- المشاكل القانونية
