كيف تعرف ان كنت تعاني من الاكتئاب؟
كيف تعرف ان كنت تعاني من الاكتئاب؟ سؤال بيشغل بال ناس كتير. لكن أنك تكون مش مبسوط مش معناه أن عندك اكتئاب. مشاعر الحزن اللي بنمر بيها لما نقابل مشاكل في الشغل أو البيت أو فراق اللي بنحبهم مشاعر طبيعية وغالبًا بتكون مؤقتة وبنرجع بعدها نعيش حياتنا.
شاكك إن عندك اكتئاب؟ دوس هنا واعمل اختبار الاكتئاب أونلاين
لكن مرض الاكتئاب معقد أكتر وليه أعراض ممكن تساعدك في معرفته وعلاجه. علامات الاكتئاب اللي ممكن تحس بيها هي:
المحتويــات
الإحساس باليأس
الاكتئاب الشديد بيأثر على الطريقة اللي بنشوف بيها كل حاجة حوالينا. الاكتئاب بيخليك تفقد الأمل ومتهتمش بشيء أو تحس بالذنب لدرجة أنك تكره نفسك وتلومها علطول.
مش مهتم بحاجة
الاكتئاب بيخليك مش مستمتع بالحاجات اللي كنت بتحبها زي الرياضة أو الخروج مع صحابك وبيوصل الموضوع لعدم الاهتمام بحياتك الزوجية ويمكن يحصل الطلاق.
الإحساس بالتعب ومشاكل النوم
من الأسباب اللي بتخليك تبعد عن اهتماماتك هو أنك مبتعرفش تنام كويس ودايمًا حاسس بالتعب والإرهاق، ودا أهم علامة من علامات الاكتئاب. ولكن مع استمرار المشكلة ممكن تلاقي نفسك بقيت تنام كتير بشكل غير طبيعي ومضر لجسمك ولعلاقتك بالناس اللي حواليك.
القلق المستمر
الاكتئاب والقلق حالتين مرتبطين ببعض, كل واحد منهم يمكن يكون السبب فالتاني. علامات القلق زى:
- العصبية أو الأرق أو التوتر
- الاحساس بالخطر الدايم
- سرعة ضربات القلب
- تنفس بسرعة
- عرق شديد
- رعشة في العضلات
- قلة التركيز
الانفعال عند الرجالة
الاكتئاب بيأثر عالراجل والست ولكن بشكل مختلف. الرجالة اللي عندها اكتئاب بيحسوا أكتر بالغضب والهروب من كل حاجة وأي التزامات عليهم وبيعملوا حاجات خطيرة ويمكن يشربوا مخدرات. لكن الرجالة أقل في الإصابة بالاكتئاب من الستات.
تغيير في الوزن
الناس اللي عندها اكتئاب بيحصل عندها تغيير في الشهية، ممكن ياكلوا كتير فيتخنوا بشكل ملحوظ أو ياكلوا قليل فيخسوا.
عواطف متقدرش تسيطر عليها
في لحظة بتكون متعصب والموضوع بيكبر أكتر من اللازم وأوقات تحس نفسك عايز تعيط أو تعيط بشكل هستيري ودا كله من غير ما يكون حصل أي حاجة جديدة أو مستاهلة.
التفكير في الموت
الاكتئاب ممكن يوصلك للانتحار. مثلا، في 2013 مات 42000 واحد في أمريكا بسبب الانتحار. لكن اللي بيكون عايز ينتحر غالبًا بيبان عليه وبيتكلم عن الموضوع، فحاول تساعد الناس اللي حواليك لو حسيت أنهم مكتئبين وبيفكروا في الانتحار. ممكن تساعدهم بانك:
- تفضل معاه لحد ماتوصل المساعدة
- تشيل أي مسدس أو سكاكين أو أدوية أو أي حاجة تسبب ضرر.
- تسمعهم ومتحكمش عليهم أو تجادلهم
حاجات بتسبب الاكتئاب:
العلماء بيقولوا أن الاكتئاب ممكن يحصل نتيجة:
- هيكل الدماغ. يعنى الطريقة اللي بتشتغل بيها دماغك في إرسال واستقبال الرسايل العصبية فيها مشكلة.
- الجينات. العلماء بيدرسوا جينات معينة ممكن تكون السبب في الإصابة بالاكتئاب. لكن مش معنى كدا ان كل اللي عندهم الجينات دي بيجيلهم اكتئاب. وفي نفس الوقت الاكتئاب ممكن يحصل لناس مش عندها الجينات دي.
- ظروف الحياة. في حاجات بتحصل في الحياة ممكن تسبب الاكتئاب زي فقدان حد قريب منك أو علاقة صعبة أو مواقف متعبة. في حاجات تانية ممكن تكون السبب زي المكان اللي بتعيش فيه أو حالتك المادية.
- مشاكل الطفولة. الناس اللي مروا بتجارب صعبة في الطفولة بيكونوا عرضة أكتر للاكتئاب.
- حاجات تانية. زي تعاطي المخدرات أو شرب الخمرة أو المرض أو مشاكل النوم المستمرة أو اضطراب فرط الحركة ونقص الانتباه.
امتى أطلب المساعدة؟
لو أعراض الاكتئاب اللي عندك اتسببت في مشاكل في الشغل أو البيت فلازم وقتها تسأل دكتور مختص. لأنه هيساعدك في أنها متطورش للأسوء. وإذا لقيت نفسك بتفكر في الانتحار أو حد تعرفه فلازم تتصل بسرعة بالدكتور عشان يساعدك.
إزاي تعالج الاكتئاب؟
لو معندكش سبب عضوي للأعراض اللي عندك، فالدكتور النفسي ممكن يساعدك في العلاج بالأدوية زى مضادات الاكتئاب أو بالعلاج النفسي والجلسات أو بالأتنين مع بعض. والعلاجات دى زي:
- العلاج بالصدمات الكهربائية. دا بيستخدم للناس اللي متحسنتش على الأدوية أو اللي عندهم اكتئاب حاد ومحتاجين للعلاج بسرعة.
- التحفيز المغناطيسي عبر الجمجمة. دا علاج تاني بيستخدم جهاز بيتحط فوق الرأس عشان يحفز المجال المغناطيسي في جزء معين في الدماغ مرتبط بالاكتئاب.
- تحفيز العصب المبهم. الطريقة دي بيثبتوا فيها جهاز شبه منظم ضربات القلب تحت عظمة الترقوة عشان يوصل نبضات منتظمة للدماغ.
المراجع:
