أنواع اضطرابات الهلع وأعراضها
نوبات الهلع أو المعروفة بنوبات القلق، هي نوبات من الخوف الشديد اللي ممكن تحصل للشخص فجأة بدون أي انذار مسبق. أحيانا بيكون في دافع واضح ان النوبات دي تحصل لبعض الناس زى مثلا انهم مثلا وقعوا قبل كدة في اسانسير أو انهم بيفكروا في الخطبة اللي لازم يقولوها قدام ناس كتير، لكن في ناس تانية بيتعرضوا للنوبات دى بدون أي أسباب واضحة.
غالبا نوبات الهلع دى بتستمر 10 دقايق، نادرا اوى لو استمرت 30 دقيقة، بس خلال الوقت القصير ده انت ممكن تحس برعب شديد جدا وكأنك على وشك الموت او إنك خلاص بتفقد سيطرتك على نفسك تماما. حتى الاعراض الجسمانية اللى ممكن تحصلك خلال النوبة دى مرعبة جدا لدرجة ان في ناس بتظن انهم بيعانوا من أزمة قلبية. وبعد ما بتنتهى النوبة دى بتفضل قلقان انها ممكن تتكرر وتحصلك تانى، خاصة إذا كنت في مكان عام مش لاقى فيه حد ممكن يساعدك.
المحتويــات
من أعراض نوبة الهلع:
- إحساس زيادة بالزعر الشديد.
- إحساس بفقدان السيطرة حتى الجنون.
- خفقان شديد في القلب أو الم في الصدر.
- الشعور وكأنك على وشك فقدان الوعي.
- إحساس بالخنقة مع صعوبة التنفس.
- نهجان شديد.
- هبات سخنة في الجسم مع إحساس بالقشعريرة.
- رعشة في الجسم.
- إحساس بالغثيان وتقلصات في المعدة.
- التوهان والانفصال عن الواقع.
لازم تلجأ لحد يساعدك لو حسيت إنك بدأت تتجنب شوية مواقف عشان متتعرضش لنوبة هلع، في الحقيقة نوبات الهلع دى ممكن علاجها بسهولة جدا، وكتير من الناس اتعالجوا منها بعد 5 ل 8 جلسات علاج بس.
أنواع اضطرابات الهلع وأعراضها
اضطرابات الهلع وحالاتها:
اضطرابات الهلع العامة (GAD)
لو كان قلقك وخوفك مانعينك ان تمارس نشاطات حياتك بشكل طبيعي أو كنت على طول خائف ان في حاجة وحشة ممكن تحصل يبقى انت غالبا بتعانى من اضطرابات الهلع العامة (GAD). الناس اللى بيعانوا من المشكلة دى دايما عندهم قلق مزمن تقدر تقول هما على طول قلقانين من غير ما يعرفوا هما قلقانين ليه أصلا. واضطرابات الهلع العامة دى ليها اعرض جسمانية مزعجة زى الأرق واضطرابات المعدة والتوتر والارهاق المستمر.
نوبات الهلع واضطرابات الهلع
اللى بيميز نوبات الهلع أنها بتتكرر كتير بشكل غير متوقع وبيكون الشخص دايما مرعوب من انه ممكن يتعرض لنوبات تانية، أما أجورو فوبيا او رهاب الخلاء وهو الخوف من التواجد في مكان صعب الهروب منه او من الصعب وجود شخص يقدم المساعدة في حالة التعرض لنوبة هلع، وممكن يصاحب الموضوع ده كمان نوبة اضطراب، لو عندك النوع ده من الفوبيا هتلاقى نفسك بتتجنب الأماكن العامة زى المولات التجارية الأماكن الضيقة زى الطيارات.
اضطراب الوسواس القهري (OCD)
يتميز الوسواس القهري ان الشخص المصاب بيه بيكون عنده أفكار او سلوكيات غير مرغوب فيها لكنة عاجز عن ايقافها او السيطرة عليها، فلو انت مصاب بالوسواس القهري هتلاقى نفسك منزعج من الوساوس والقلق المتكرر زى مثلا إنك نسيت تقفل الفرن او إنك ممكن تكون اذيت الشخص الفلانى من غير قصد، وممكن كمان تفضل تعاني من أفعال متكررة انت مش قادر تسيطر عليها زى غسل ايدك كل شوية.
اضطراب الاكتناز
اضطراب الاكتناز هو إنك تلاقى صعوبة في التخلص من أي شيء من ممتلكاتك، وهتلاقى نفسك متعلق بكل الأشياء حتى اللى ملهاش قيمة، وممكن يوصل التراكم الزيدة عن اللزوم لممتلكاتك واشيائك (او حيواناتك) إنك مش لاقى مساحة تعيش فيها بشكل طبيعي، هتلاقى نفسك ومشاعرك مرتبطة جدا بجماد وشايف إنك ممكن تستخدمه بعدين، المعتقدات اللى في دماغك دي هتخلى التخلص من أي شيء من ممتلكاتك موضوع صعب جدا هيحسسك بالتوتر والذنب والحزن.
الرهاب والمخاوف الغير مبررة
هو خوف غير مبرر من شوية حاجات او أنشطة او مواقف معينة هي في الواقع خطر ضئيل او معدوم، ومن أنواع الرهاب المنتشرة الخوف من الحيوانات (زى الأفاعي أو العناكب) والخوف من الطيران او الخوف من الحقن، وفى حالات الرهاب الشديدة ممكن تتجنب الاشياء او المواقف التي بتعرضك للرهاب، لكن لسوء الحظ ده بيزود الرهاب مش بيعالجة.
اضطراب الرهاب الاجتماعي
لوكنت على طول خايف وقلقان ان الناس تبصلك بطريقة سلبية او تقلل من قيمتك، انت ممكن تكون مصاب باضطراب القلق الاجتماعي، المعروف بالرهاب الاجتماعي. ممكن نعتبره في بعض الحالات هو الإحساس بالخجل الشديد، وفى حالات بتوصل ان الشخص يتجنب أي مواقف اجتماعية، وفى كمان القلق من ادائك في أي مهمة (بيسموة رهاب المسرح) ودة واحد من أكثر أنواع الرهاب الاجتماعي شيوعا.
اضطراب ما بعد الصدمة (PTSD)
اضطراب ما بعد الصدمة (PTSD) هو اضطراب او قلق شديد بيحصل أحيانا بعد التعرض لحدث مؤلم او التعرض لخطر يهدد الحياة، وممكن نعتبر ان اضطراب ما بعد الصدمة بمثابة نوبة من الرهاب او الزعر صعب انها تهدى، ومن اعراض اضطراب ما بعد الصدمة استرجاع ذكريات الماضي والكوابيس او الاحداث المؤلمة المتعلقة بالحدث الموجع، وكمان اليقظة المفرطة والقلق من أي حدث بسيط، الانسحاب من الآخرين وتجنب المواقف اللى ممكن تذكرك بالحدث المؤلم.
رهاب قلق الانفصال
القلق من الانفصال يعتبر مرحلة طبيعية في تطور الانسان، لكن ممكن ابنك يكون مصاب برهاب قلق الانفصال لو القلق ده زاد واتحول لمخاوف ممكن تعطل الطفل عن الدراسة والأنشطة الحياتية، رهاب قلق الانفصال بيخلى الطفل منفعل لمجرد التفكير انه ممكن يبعد عن الأم والأب وممكن يدًعى المرض عشان يهرب من اللعب مع أصحابه وميروحش المدرسة.
ساعد نفسك للتخلص من الرهاب
الشعور بالقلق مش بالضرورة دليل على الإصابة باضطراب الرهاب، ممكن تقلق بسبب ضغط في جدول اعمالك او بسبب قلة التمارين الرياضية او قلة النوم او الضغط الكبير من مسئوليات البيت والشغل، او حتى من كترة شرب الكافيين، يعنى لو نمط حياتك مرهق وغير صحي طبيعي إنك هتشعر بقلق وتوتر سواء كنت مصاب باضطراب الرهاب من عدمه.
النصائح الجاية هتساعدك تقلل من التوتر وتتعامل مع اعراض الرهاب المزعجة:
- تواصل مع الآخرين، الوحدة والانعزال ممكن تزود الرهاب عندك، لكن لما تتكلم عن مخاوفك مع شخص وجها لوجه هتقدر تنتصر على مخاوفك، حاول تقابل اصدقائك بانتظام وانضم لمجموعات الدعم أو شارك قلقك وافكارك مع شخص تحبه وتثق فيه، ولو معندكش حد تثق فيه او تشاركه افكارك لسة قدامك فرصة إنك تعمل صداقات جديدة.
- سيطر على التوتر، حتى وانت في قمة القلق ممكن تسيطر على قلقك وتهدى نفسك، بص على مسئولياتك وشوف اية هي المسئوليات اللى تقدر تأجلها او تتخلى عنها او تفوضها لشخص تانى ممكن يعملها بدالك.
- استرخى، لازم تهتم بممارسة الاسترخاء باستمرار، ممكن تتأمل وانت صاحى وممكن ترخى عضلاتك وتتنفس بعمق، كل الحاجات دى هتقلل من احساسك بالتوتر والقلق وهتعطيك إحساس بالاسترخاء والسلام النفسي.
- أتمرن بانتظام، التمارين وسيلة طبيعية للتخلص من القلق وتقليل التوتر، عشان توصل لأحسن نتيجة اهتم إنك تعمل تمارين ايروبكس لمدة 30 دقيقة كل يوم (ممكن تقسمها على مدار اليوم لو دة كان أسهل ليك)، وتعتبر التمارين الايقاعية التي بتحرك فيها ذراعيك وقدميك هي الأكثر فاعلية، ممكن كمان تجرب المشى والجري والسباحة وفنون الدفاع عن النفس والرقص.
- احصل على قسط كاف من النوم، قلة النوم هتزود الأفكار السلبية ومشاعر القلق، عشان كدة حاول تنام عدد ساعات كافية يوميا من سبع الى تسع ساعات كل ليلة.
- قلل من تناول الكافيين والكحول والنيكوتين، الكافيين والكحول هيزودوا مستوى الرهاب عند، على الرغم ان ناس كتير فاكرين ان السجائر ممكن تهديهم، الا انه على العكس تماما النيكوتين منبه قوى جدا هيزود معدلات القلق والرهاب مش هيقللها، عشان تتخلص من التدخين راجع طريقة الإقلاع عن التدخين.
- وقف القلق، القلق هو مجرد عادة عقلية لازم تتعلم ازاى تتخلص منها، وفى شوية استراتيجيات هتساعدك تعمل كدة زى إنك تتحدى أي أفكار مقلقة تجيلك وتتعلم تقبل أي تغيرات وبكدة هتقدر تهدى نفسك وتحارب قلقك.
أمتى تلجأ لمساعدة متخصصة؟
انت ممكن تساعد نفسك وتطبق استراتيجيات التأقلم لمقاومة القلق ودي حاجات فعالة جدا، لكن لو حسيت ان مخاوفك ونوبات الرهاب عندك زادت لدرجة انها بتسبب ليك ضغط نفسي كبير او بتعطل روتين حياتك اليومي، لازم تلجأ لمساعدة متخصصة.
لو كان عندك أي اعراض جسمانية لازم تعمل فحص طبي، والطبيب هيقدر يحدد إذا كان قلقك ناتج عن حالة طبية مثل مشكلة الغدة الدرقية او انخفاض معدل السكر في الدم او الربو، او بسبب بعض الادوية او المكملات ممكن تتسبب في القلق الزائد، ولازم تبلغ طبيبك بأي وصفات طبية او اعشاب أو ادوية مخدرة قد تكون تناولتها بدون اشراف الطبيب.
إذا استبعد الطبيب المعالج أي أسباب عضوية، لازم تستشير معالج نفسي عنده خبرة في علاج حالات اضطرابات الرهاب، لمعالج النفسي هيبحث معاك عن سبب ونوع الاضطراب اللى بتعانى منه وهيعمل خطة علاجية مناسبة لحالتك.
علاج اضطرابات الهلع
اضطرابات الرهاب تستجيب جدا للعلاج خلال فترة زمنية قصيرة نسبيا، ويعتمد نوع العلاج على نوع الاضطراب المصاب به الشخص، لكن بشكل عام يتم التعامل مع أغلب الحالات بالعلاج والأدوية او بالاثنين مع بعض، العلاج السلوكي المعرفي والعلاج بالتعرض من أنواع العلاج السلوكي، بيركزوا على السلوك بدل من التركيز على الصراع النفسي او مشكلات الماضي ويمكن من خلالهم علاج نوبات القلق والرهاب.
العلاج السلوكي المعرفي بيساعدك إنك تحدد أنماط التفكير السلبي والمعتقدات الغير المنطقية اللى بتزود قلقك.
العلاج بالتعرض هيشجعك تواجه قلقك ومخاوفك في بيئة آمنة تحت سيطرتك، من خلال إنك تتعرض للحاجات او المواقف المخيفة بالنسبة ليك سواء في خيالك او في الواقع، ودة هيديك إحساس أكبر بالسيطرة، ولما تواجه مخاوفك من غير ما تتعرض لأي أذى ده هيقلل من القلق جواك.
