۷ حاجات تقولك إنك بتعاني حاليًا من صدمة نفسية

109

ناس كتير بتخاف من كلمة “الصدمة النفسية” ولكن في الحقيقة هو وصف للطريقة الطبيعية والصحية لعقلك وجسمك لما يتعامل مع مع التجارب الصعبة واللي ممكن تاخد وقت عشان تتجاوزها، ومن الشائع إن الناس تتصرف بشكل مختلف أو يحسوا بمشاعر معينة بشكل قوي بعد الصدمة النفسية، ممكن تتجاوز الصدمة النفسية دي بعد أسبوع أو شهور، والصدمة عادة بتظهر بسبب قلق بنعاني منه أو تكرار صدمة حصلت قبل كده وممكن تطور لمرض نفسي.

دي سبع علامات توضحلك لو كان عندك صدمة نفسية:

1. الخوف: لما يحصل حاجة مكنتش متوقعها ومش قادر تمنع حدوثها، ولو كنت بتعاني فعلا من القلق، الصدمة النفسية كفيلة انها توصلك لنوبات قلق.

2. مش عارف تفكر صح: هتحس كأن مخك بقى “هريسة” أو كأن مخك اتشوش وفيه ضباب وإن الحياة مبقتش واقعية، كأنك برا جسمك وشايف كل حاجة من براه بس جسمك مكمل في اللي بيعمله.

3. الاثار الجانبية: لما مخك بيقرر إن في “خطر” حواليه، فبيبقى في حالة مبدئية من “الكر والفر”، أو حالة الهروب”، ودا بيبعت كوكتيل من الهرمونات عن طريق جسمك بيخلي ضربات قلبك تتسارع وتتوتر عضلاتك وتصدع ويحصل اوجاع والام عشوائية في الجسم.

4. إرهاق شديد: غالبًا ما بيتأثر النوم لما بنعمل مجهود مرهق، في الحالة دي الأرق شائع. على الرغم من أن التوتر عند بعض الناس بيخليهم يناموا كتير حتى لو نوم مش مستقر (كله أحلام وكوابيس).

5. انك متبعتر نفسياً: لما عقلك يبذل مجهود عشان يستوعب موقف صعب، مش بيقدر يديلك مساحة عشان تتعامل مع كل حاجة تانية في موضع اهتمامك، ودا السبب اللي بيخليك تتصرف بطرق تحسها مش منطقية أو تكون بتتصرف بعاطفية وحساسية زيادة في مواقف متستاهلش المبالغة، عشان كده في يوم هتصحي تلاقي نفسك تمام انا جامد وأعرف اتعامل مع أي موقف صعب وتاني يوم هتحس نفسك عايش دور الضحية و”الدراما كوين” وتلف في دايرة الذنب(كل دا غلطتي) والعار(يا ترى الناس هتشوفني ازاي) واللوم (انا بكره اللي عمل فيا كده).

6.  بتتصرف كأنك-شخص متعرفوش: لما الشخص بيمر بصدمة نفسية بتأثر بشكل كبير على شخصيته، ودا اللي هيخليك تتغير فترة يعني لو كنت شخص اجتماعي هتبقى عايز تنعزل وتفضل قاعد في البيت كأنك بتستخبى من العالم، ولو كنت العكس انطوائي هتلاقي نفسك بتخرج كل يوم وعايز تعمل كل حاجة تشغلك عن الوحدة أو التفكير.

7. فقدان الشغف: لما بتحصل صدمات او مواقف صعبة بتخلينا بجد- نتضايق- لدرجة ان الحياة كلها بتبقى في نظرك ملهاش معني، وبتكتر في دماغنا الأفكار السلبية زي “اهتم ليه؟ او اتعب ليه؟ ما كل حاجة كده كده بتبوظ؟”

امتي هقدر اتجاوز الصدمة النفسية؟

التجارب المؤلمة اكيد هتتفاعل مع نقط ضعفك ومع التجارب الصعبة اللي عديت بيها قبل كده ودا معناه ان كل واحد فينا مدته في تجاوز الصدمة هيكون مختلف عن غيره، يعني لو كنت سيبت شغلك السنة دي ودا أثر عليك واتعرضت لاصابة هتاخد وقت أطول في الشفا من شخص محصلوش حاجة غير الإصابة، ودا اللي بيخلينا نشوف ناس بتفوق من صدماتها بعد ساعات وناس غيرهم بتاخد أسابيع وناس ممكن توصل لشهور وبرضو مش حاسين بتحسن، وخد بالك إن في حاجة اسمها “الصدمة النفسية المتاخرة” إن موقف حصلك وتحس انه عادي انا مش زعلان، بس بعد أيام أو أسابيع بتظهر عليك الأعراض.

الأعراض دي انا حاسس بيها طول حياتي!!

بعض الناس بيعانوا في حياتهم من ” الصدمة الممتدة” ودي بتحصل بعد ما الواحد يعيش طفولة صعبة ومش سوية نفسيا، وعلماء النفس بيسموا “تجارب الطفولة المعاكسة”، ولما الشخص بيكبر بيلاقي انه عنده قلق مستمر وأرق في النوم أو صعوبة انه يكون علاقات قوية، أو حتى تظهر عليه اعراض فرط الحركة أو قلة الانتباه ADHD، ودا بيبقى عبارة عن إن الواحد دايما في تشتت ومش بيقدر يفكر في وضوح أو بشكل محدد وتقدر تشوف دا كمثال حي في شخصية أمينة خليل في مسلسل “خلي بالك من زيزي”، ودكاترة علم النفس بيشخصوا الصدمات النفسية للأشخاص دول على انها “طويلة الأمد” أو ” اضطراب ما بعد الصدمة”.

لو فعلا شايف ان الكلام دا كله متفصل عليك، وقتها لازم مساعدة طبية أو معالج نفسي، هيساعدك تحكي عن تجاربك وصدماتك من غير ما يأذي نفسيتك وهيعلمك كمان ازاي تسيطر على حياتك من تاني، واللي بنرشحه برضو هو العلاج المعرفي السلوكي CBT لانه في الأساس بيساعد مرضى القلق والاكتئاب واضطراب ما بعد الصدمة، هيوضحلك ازاي تحول تفكيرك من سلبي لتفكير واقعي ومتوازن وينظم سلوكياتك وحالتك النفسية.

اترك تعليق