الدمـاغ

أسهل 3 حاجات هتساعدك تحافظ على وقتك

ظبط-وقتك

الوقت بيضيع بشكل رهيب، و مبقتش ملاحق على اى حاجة؛ بس فرصة انك فى بداية السنة تحاول تعود نفسك على روتين يومى جديد يساعدك تكون منتج اكتر.

الفطار مالوش اى لازمة

الموضوع كله ان الاكل بيتهضم جوة معدتك بشوية احماض، يقال ان الاحماض دى لو لمست البشرة تحرقها!

فا انت بإختصار شديد بتحرق فى جدار معدتك فى اول ساعتين فى اليوم و بتهلك معدتك و انت لسه حتى ما روحتش الشغل و قابلت مديرك! ?

فا مفهاش مشكله لو كلت حاجة بسيطة بس لغاية ما يبقى فى وقت انك تاكل وجبة كاملة.

موبايلك نفسه مالوش لازمة لومش بيفيدك في حياتك أو شغلك

الموبايل بقى رفيق الدرب، في  زحمة تشغل مزيكا، النت فاصل تلعب كاندي كراش، مخنوق و ملكش مزاج تخلص شغل بتفتح السوشيال ميديا!

طب بدل ما الموبايل للتسلية بس، ما ممكن يبقى له استخدامات تانية كتير!

  • فى ابلكيشن اسمه Water drink reminder ده بيفكرك كل ساعة تشرب كوباية مية علشان  كالعادة فى زحمة اليوم بتنسى فا بيحصلك Dehydration (جفاف) و ده بيخليك تحس بصداع و متقدرش تكمل شغلك!
  • و ابلكيشن Shealth  ده بيعدلك الخطوات اللى انت بتمشيها و بيشجعك تبقى نشيط اكتر، و كمان بيديك تقرير اسبوعى بالوزن اللى خسرته و المسافات اللى مشيتها، ده غير انك تقدر تدخل عليه الوجبات اللى بتاكلها و مواعيد نومك علشان يحسبلك وزنك بدقة، و كل ما نشاطك زاد كل ما جسمك فرز هرمون الاندروفين اللى بيسبب السعادة و التوازن النفسى، فا هتقدر تركز اكتر و تنتج بشكل اكفأ.
  • و Evernote ده بقى يعتبر المساعد الشخصى بتاعك، كل حاجة عاوز تسجلها و ترجعلها بعدين، اى حاجة عاوز تفتكرها، تقدر تدخلها عليه و هو هيعمل كل حاجة، ده غير انك ممكن تعمله Sync بالفيس بوك علشان يرتبلك كل ال Activities حسب اولوياتك و اهميتها.
  • و Bluelight filter ده بيمنع النور الازرق اللى بيطلع من شاشة الموبايل اللى بينبه مخك طول الوقت (تأثيره زى الكافيين) فا يخليك مصدع  و عينك توجعك و انت مش عارف ايه السبب! (هيساعدك كتير لو انت بتمسك الموبايل كتير قبل ما تنام).

 

سخّـر الحاجات التـافهة لخدمتك

دايماً هيئ لنفسك جو لطيف تعرف تشتغل فيه، شغل مزيكا بتحبها، اقعد قدام في جو مريح لعينك.

لو شغلك كله انترنت، اعمل Customization للجوجل كروم بتاعك، و اختار خلفيه للسيرش تكون مريحة لعينك، فى ابلكيشنز عليه  بتساعدك تنظم وقتك و بتقسملك وقتك و تديك بريك انت بتحددها لنفسك، حط معطر للمكان اللى انت فيه، هيحسن حالتك المزاجية و هيساعدك تفتكر بشكل أكفأ (لو كنت بتذاكر) لان العقل قدرته على استرجاع المعلومات المرتبطة بمشاعر او مؤثرات حسية اعلى من المعلومات اللى اتحصلت فى بيئة مجهدة و مش مريحة.

فى حاجات كتير تقدر تعملها علشان تبتدى سنة جديدة بعادات صحية و مفيدة، مش ال3 حاجات دول اللى هيغيروا من حياتك او طريقة تفكيرك، دول اعتبرهم  طرف خيط تقدر تكمل منه الطريق اللى يناسبك، و افتكر ان المشوار بيبتدى بخطوة.

عن الكاتب

إنجي عادل

"ماذا سيكون العالم، اذا تحدثنا بقوة، لأناسِ تنصت بوعىِ، فى مكانِ مهيأ لهذا الغرض تحديداً".