ما هو سبب حدوث الاكتئاب؟
ما هو سبب حدوث الاكتئاب؟ سألت نفسك في يوم السؤال ده؟ وليه الاكتئاب بييجي لناس وناس لأ!. لازم تعرف أن الاكتئاب مرض معقد، ومحدش يعرف سببه بالظبط.
لكن في حاجات كتير ممكن تكون السبب. مثلًا، فراق شخص، أو تغيير مكان العيشة أو الشغل، أو وراثة في العيلة وغيرها من الحاجات. وممكن ناس يجلها اكتئاب من غير ما يعرفوا السبب.
شاكك إن عندك اكتئاب؟ دوس هنا واعمل اختبار الاكتئاب أونلاين
المحتويــات
أي أسباب الاكتئاب؟
حاجات كتير ممكن تزود فرصة ان يجيلك اكتئاب، وهي:
- السن. الناس الكبيرة أكتر عرضة لأن يجلهم اكتئاب. وممكن يزداد الموضوع بسبب إنهم عايشين لوحدهم أو محدش بيدعمهم ومهتم بيهم.
- أدوية. في أدوية ممكن تزود فرصة إن يجيلك اكتئاب زي الإيزوتريتنون (اللي بيستخدم بردوا لحب الشباب)، أو العلاج المضاد للفيروسات وإسمه إنترفيرون ألفا، أو الكورتيكوستيرويدات.
- الخلافات. الخلافات الكتيرة مع عيلتك أو أصحابك أو زمايلك في الشغل أو حتى نفسك، بتجيب اكتئاب.
- الموت أو الخسارة. الحزن على فقدان حد قريب بيجيب اكتئاب.
- راجل ولا ست. عدد الستات اللي عندهم اكتئاب أكبر من الرجالة، حوالي الضعف. ومحدش عارف سبب دا بالظبط. لكن تغير الهرمونات عند الستات ليه دور كبير.
- جينات. لو في حد في العيلة جاله اكتئاب دا بيزود فرصة الإصابة بيه عند باقي العيلة. دا معناه أن في جينات مشتركة بينكم بتسبب الاكتئاب.
- أحداث كبيرة. سواء كانت حلوة أو وحشة ممكن تجيب اكتئاب. اه حتى الحاجات الحلوة ممكن تسبب اكتئاب. مثلًا، اكتئاب ما بعد الولادة بييجي لكتير من الستات، على الرغم من فرحتهم الكبيرة بخلفتهم. لكن الاكتئاب الشديد بيحصل بسبب الحاجات الوحشة زي موت أو مفيش شغل.
- المشاكل الشخصية. الوحدة أو الأمراض العقلية وغيرها من المشاكل الشخصية بتسبب الاكتئاب.
- أمراض خطيرة. أوقات بيحصل الاكتئاب نتيجة لحالة طبية خطيرة. مثلًا في ناس بيجيلها اكتئاب لما يكتشفوا إن عندهم سرطان. لكن فالغالب دول معندهمش حد يخفف عنهم ويقف معاهم علشان يمروا بالمشاعر الحزينة دي، ويقدروا يواجهوا رحلة العلاج.
- المخدرات. خلي بالك الاحصائيات بتقول أن 30% من اللي بيشربوا مخدرات بيجلهم اكتئاب شديد. المخدرات لو أدت إحساس بالسعادة فهو مؤقت وبعدين بيظهر الاكتئاب.
تركيبة الدماغ وعلاقتها بالاكتئاب
العلماء اكتشفوا أن تركيبة الدماغ عند المكتئبين بتختلف عن الناس العادية. مثلُا، في منطقة في الدماغ اسمها “الحصين” مسئولة عن تخزين الذكريات، ودي بتكون أصغر عند المصابين بالاكتئاب. الحصين الصغير فيه عدد قليل من ” مستقبلات السيروتونين” والسيروتونين واحد من مواد كيميائية تانية في الدماغ اسمها “الناقلات العصبية” وهي اللي بتسمح بالاتصال بين مناطق الدماغ المسئولة عن العواطف.
العلماء مش عارفين ليه الحصين أصغر عند بعض المكتئبين. بيقولوا أن هرمون الإجهاد اللي اسمه “الكورتيزول”، بيتفرز كتير عند اللي عندهم اكتئاب. وفي علماء تانيين بيقولوا أن المصابين بالاكتئاب مولودين بحصين أصغر، وعشان كدا بيجلهم اكتئاب.
مضادات الاكتئاب اللي بيوصفها كتير من الدكاترة، مهمتها بقى أنها تحافظ على تركيبة الدماغ دي. بانها تحمي الخلايا العصبية من الموت وبتحسن وظيفتها.
الجينات والاكتئاب
إحنا عارفين أن الاكتئاب ممكن يكون وراثي أوقات. مثلًا الأب لو عنده اكتئاب ممكن يورثه لأولاده. في جينات كتيرة بتتفاعل مع بعضها وتسبب انتشاره. والموضع مش معتمد على جين واحد، لأ دا مجموعة من الجينات.
الأدوية اللي بتسبب اكتئاب
في أدوية بتأثر على بعض الناس وتسببلهم اكتئاب. ومن الأدوية دي؛ الباربيتورات، والبنزوديازيبينات، وعقار الإيزوتريتينوين لحب الشباب. كمان أدوية الكورتيكوستيرويدات، والمواد الأفيونية (الكودايين والمورفين)، ومضادات الكولين اللي بتتاخد لتخفيف تقلصات المعدة بتسبب أوقات تغييرات في المزاج. حتى أدوية ضغط الدم اللي اسمها حاصرات بيتا.
العلاقة بين الاكتئاب والأمراض المزمنة
الأمراض المزمنة ممكن تسبب اكتئاب عند بعض الناس. لأنها بتستمر فترة طويلة، وكمان ممكن متتعالجش بالكامل. أمثلة عالأمراض دي؛ مرض السكري وأمراض القلب والتهاب المفاصل وأمراض الكلى وفيروس نقص المناعة البشرية والإيدز والذئبة والتصلب المتعدد (MS) وقصور الغدة الدرقية.
علاقة الهرمونات بالاكتئاب
الهرمونات مواد بتتفرز عن طريق الغدد الصماء ودي بتأثر على الجسم كله. زي عملية النمو والتطور والعلاقة الجنسية. ومن أكتر الحاجات التى بتأثر عليها المزاج. مثلًا المشاكل في هرمونات الغدة الدرقية بتسبب الاكتئاب. وكمان الهرمونات المتغيرة قبل الدورة الشهرية، أو الهرمونات في سن اليأس وانقطاع الدورة الشهرية.
علشان الارتباط الكبير بين الاكتئاب والهرمونات والحالات الطبية. غالبًا بيطلب الدكتور تحاليل دم، عشان يتأكد الاكتئاب بسبب الأمراض ولا أي.
