هل يوجد علاج للاكتئاب؟
المريض بالاكتئاب دايمًا بيسأل أنا هفضل كدا؟ هو مفيش علاج؟ وهنا لازم تعرف أن في أمراض ملهاش علاج نهائي، لكن علاجها بيكون تخفيف للأعراض وسيطرة عليها. مثلًا، السكر في ناس كتير عيانة بيه، بياخدوا أدويتهم في مواعدها وبياخدوا بالهم من أكلهم وبيلعبوا رياضة. كلها حاجات بتساعدهم في مواجهة المرض.
نفس الفكرة مع الاكتئاب العلاج بيساعدك على السيطرة عليه ومنعه من أنه يبوظ حياتك. وكمان في أنواع علاج كتيرة للاكتئاب على حسب اللي يناسب كل شخص.
شاكك إن عندك اكتئاب؟ دوس هنا واعمل اختبار الاكتئاب أونلاين
لو عايز تعرف أكتر عن علاج الاكتئاب كمل قراية وهتعرف:
علاجات الاكتئاب كتيرة ومرتبطة ببعضها ومنها تغيير أسلوب حياتك، والاشتراك في مجموعات الدعم علشان متحسش أنك لوحدك. وكمان الأدوية اللي مينفعش أبدًا تاخدها من غير ما يوصفها الدكتور ليك. طبعًا هتحتاج تتواصل مع دكتور عشان يوضحلك اللي يناسبك.
المحتويــات
هو الاكتئاب بيرجع تاني؟
الاكتئاب بييجي في نوبات، يعنى ممكن يتكرر فلازم تعرف تتعامل معاه صح إزاي. لكن في ناس مبيرجعلهاش. يعني حوالي تلت اللي عندهم اكتئاب مش هيجيلهم تاني. ونص المصابين بتجلهم الأعراض أكتر من مرة. لكن المهم اهتم بالعلاج عشان تقلل فرصة أنه يرجعلك. وكمان العلاج بيعرفك إزاي تتأقلم مع الوضع لو اتكرر.
علاج الاكتئاب
لو الدكتور شخصك بالاكتئاب، فغالبًا هيوصفلك مجموعة علاجات وهي:
-
علاج نفسي
في أغلب الحالات، الخطوة الأولى في العلاج بتكون التواصل مع أخصائي صحة عقلية. وومكن العلاج النفسي يكون ليه أكتر من شكل.
- “العلاج السلوكي المعرفي (CBT)” في العلاج دا الدكتور بيعرفك إزاي تتعرف على الأفكار والسلوكيات اللي مش مفيدة. وإزاي تحولها لشكل إيجابي.
- العلاج الشخصي (IPT). بيساعدك في أنك تعرف التحديات الموجودة في علاقاتك الشخصية وإزاي تتعامل معاها. لأنها بتلعب دور مهم في أعراض الاكتئاب. هتتعلم إزاي تتحكم في مشاعرك وتتواصل مع الناس وتشترك في الأنشطة الخيرية.
- العلاج المعرفي القائم على اليقظة (MBCT). بيعتمد على التأمل وأنك تعيش اللحظة بلحظتها من غير تفكير كتير في المستقبل.
-
الأدوية
الأدوية لوحدها مش كفاية، لازم تكون جمب العلاج النفسي. والأدوية هي:
- مثبطات امتصاص السيروتونين الانتقائية (SSRIs)، غالبًا طريقة أولى للعلاج
- مثبطات امتصاص السيروتونين والنوربينفرين (SNRIs)، ودي بتتوصف لو كنت بتعاني من الاكتئاب وألم مزمن.
- مضادات الاكتئاب ثلاثية الحلقات، بتخفف الأعراض اللي مش بتستجيب لمضادات الاكتئاب التانية
- مضادات الاكتئاب غير النمطية، بتخفف الآثار الجانبية الجنسية لمضادات الاكتئاب
- مثبتات المزاج أو مضادات الذهان، بتحسن تأثيرات مضادات الاكتئاب
مضادات الاكتئاب ممكن تتوصف للأطفال أو المراهقين لما تظهر عليهم أعراض شديدة و:
- تأثر على حياتهم اليومية
- تخليهم ميروحوش المدرسة ومينجحوش
- إذا كانوا مبيتحسنوش مع العلاجات التانية
خد بالك أن مينفعش توقف أي مضاد للاكتئاب من غير مالدكتور يقول. لأن دا ممكن يتسبب في انتكاسة. كمان لو أخدت مضادات الاكتئاب كام أسبوع ومفيش تحسن، فلازم تقول للدكتور عشان يشوف أي البديل المناسب ليك.
-
تحفيز الدماغ
أوقات بتستمر أعراض الاكتئاب، حتى بعد شهور من العلاج والأدوية. إذا كنت كدا، فالدكتور هيوصفلك طرق تانية للعلاج زي:
- العلاج بالصدمات الكهربائية (ECT). العلاج بيعتمد على توصيل نبضات كهربائية للدماغ علشان تغير النشاط الكهربائي في الدماغ. هيخدروك في العملية فمش هتحس بأي حاجة أبدًا.
- التحفيز المغناطيسي عبر الجمجمة (TMS). دا بيوصل نبضات مغناطيسية للدماغ، بتساعد في تحفيز الأعصاب في الدماغ وزيادة نشاط الدماغ.
- تحفيز العصب المبهم. العلاج دا بيحفز العصب المبهم عن طريق زرع جهاز في الصدر، ييساعد في فأن يحصل توازن بين المواد الكيميائية في الدماغ اللي ليها علاقة بالاكتئاب.
العلاجات التكميلية والبديلة للاكتئاب
العلاج والأدوية وتحفيز الدماغ هي أول طرق علاج الاكتئاب. لكن في علاجات تانية ممكن تكون مفيدة، زي:
- العلاج بالإبر. نوع من العلاج موجود في الطب الصيني التقليدي. مفيد في علاج الاكتئاب سواء استخدمته لوحده أو مع مضادات الاكتئاب.
- نبتة سانت جون. بتساعد في تخفيف أعراض الاكتئاب الخفيفة للمتوسطة، لكنه مش هينجح مع الكل. عشان كدا لازم تسأل الدكتور قبل ماتاخده، أو أي علاجات عشبية تانية.
- المكملات. إنك تضيف المكملات الغذائية لأكلك دا هيساعدك في علاج الاكتئاب. مثلًا فيتامين د، والزعفران، والمغنيسيوم.
- ممارسة الرياضة. الرياضة بتحسن النفسية وبتخرج الطاقة السلبية. الدكاترة بتنصح بلعب رياضة ساعتين ونص كل أسبوع. وكمان اللعب في بره في الهواء أحسن بكتير من الأماكن المقفولة.
- تقنيات الاسترخاء. زي اليوجا والتأمل وغيرها بتحسن من أعراض الاكتئاب.
نصايح بتساعدك في أن الاكتئاب ميرجعلكش
- الاكتئاب مفيش طريقة مؤكدة لمنعه، لكن متيأسش واعمل اللي عليك. لما تلتزم بالعلاج دا بيقلل من رجوع الاكتئاب أو بيخليك تتعلم إزاي تتعامل معاه. ومن الحاجات اللي تساعدك:
- خليك على اتصال مع حبايبك واتكلم معاهم عن مشاعرك، دا بيديك الدعم اللي محتاجة وكمان بيقلل فرصة رجوع الاكتئاب.
- اهتم بصحتك، يعنى كل حلو ونام كويس والعب رياضة دايمًا، وكمان متشربش أي حاجة مضرة.
- قلة النوم بتجيب اكتئاب أو بتزوده. لازم تنام عدد ساعات كفاية حوالي 9 وحاول تثبت مواعيد نومك وصحيانك.
