معلشني شكراً: لقد أوشك رصيدك على النفاذ

كلنا بنتحط في موقف محرج جداً لما صحابنا يحكولنا عن حاجة ويكون ردنا عليهم معلش، كل ردنا عليهم عبارة عن كلمة خالية من أي شعور أنساني مكونة من 4 حروف وهي معلش .. وفي نفس الوقت لما نتحط في نفس الموقف ونحكي بنكون أحنا نفسنا محتاجين حاجات وإجابات تانيه غير معلش ، حتى لو إجابات مش منطوقة.. إجابات تحسسك بالأمان والهدوء والراحة..خليك سند وراحة من تعب اليوم خليك الأمان في الأيام الصعبة ..

في نظرية معلشني شكراً( hug and food(VS هنتعلم سوا طرق أحنا عارفينها نستخدمها بدل كلمة معلش حاجات بسيطة بس بتفرق كتير 

الأعتذار

صاحبك/ صاحبتك .. بتقولك أنا زعلانة منك جداً بسبب موقف امبارح بدل ما تقوليلها معلش وتزعليها أكثر .. لو بنت هاتيلها شكولاته أو وردايه صغيرة وقوليلها حقك عليا مقدرش على زعلك وأحضنيها الحضن بيخلص أي زعل  .. لو ولد أعزمه على أكل وماتش كورة أو بلاي شتشن

الحزن

بدل الرد المعتاد على كلام زي أنا حزينة جداً سواء كان الحزن بسبب حادثة -وفاة – فقد – أي كان سببه تحت مسمى الحزن بدل ما تقولهم معلش خرجهم الخروج مهم عشان تفك من أي حزن أو اكتئاب وكفاية أنه هيحس أنك بتخرجه عشان تفرحه .. طبطب عليه أمسك كتفه وابتسم في وشة، غير الموضوع، أتفرجوا على أفلام كوميدي، هاتله أكل واحضنه

الغضب

بلاش جملة أهدي معلش وقت الغضب والعصبية لأنه مش بعيد يرميك وقتها تحت أي مترو أنفاق ويقولك معلش اهدى والمترو بيعدي عليك .. خليه يشرب ماية، أغسل وشه، طبطب على رأسه وظهره، شغل موسيقى هادية، وأهم قاعدة بلاش تعاند دلوقتي أي حاجه يقولها هي صح حتى لو قالك شايف حمار معدي قوله أيوة صح مش وقت عند أتناقشوا لما يهدى و ممكن بردو تحضنه وتجبله أكل بعدها

الانفصال العاطفي

معلش يعني خلي معلشك لنفسك لما حد يقولك أنه موجوع عشان انفصال عاطفي حصله، ممكن تبدلها وتساعده يملى وقته برياضة بيحبها، بحضور ندوات، بنشاط، خليه يهتم بشغله أكثر، وقته الفاضي أخرجوا واتكلموا في كل حاجة وخليه يتكلم في الموضوع دا لو حب خليه يفضفض مش محتاج منك حلول هو بس محتاج حد يطبطب واحضنه وهاتله أكل

المرض

شايف حد تعبان ومش قادر يتحرك بلاش كلمة معلش مش هي دي اللي هترجعه زي الحصان، خليك جمبه على أد ما تقد، أدي حب وحنان واهتمام بمواعيد الدواء والأكل والضحكة لازم نرسم الضحكة على وشنا حتى لو مش حقيقة ضحكة تنسي الوجع وتخفف التعب وتقول أن فيه أمل وبكرة يتحسن

وهاتله أكل

سقط في الإمتحان .. ساب شغله

اللي حصل حصل خلاص، هتقوله معلش وهيقعد يعيط على اللبن المسكوب، والنبي دا كلام!

هون عليه بأن اللي جاي أحسن وساعده يذاكر للمواد الباقية ولو في الشغل خليه يشوف شغل تاني ورجع ليه ثقته في نفسه أنه يقدر يلاقي شغل في أكثر من مجال وأنه موهوب ومتنساش هاتله أكل واحضنه

عدم التقدير 

والشعور دا بيحس بيه الأهل أكثر من الصحاب أن كل مجهودهم وتعبهم معانا ملوش تقدير لما أهلك يحكولك عن تعبهم في شغلهم عشانك متقولش معلش قولهم أنتو الخير والبركة وملناش غيركم وبوس أيدهم وأحمدوا ربنا على نعمة وجودهم ..ولو حد من صحابك مش حاسس بالتقدير منك أعمل دا وريه أنك بتقدره سواء كانت بهدية أو مكالمة، أسأل عنه أديله من وقتك وفي الحالتين متنساش تحضنهم وتجيب أكل

مواقف وحلول بسيطة وصغيرة هتكون أفضل من” معلش” خليك سند وحسسهم أنك جمبهم بالكلمة الطيبة بالحنيه بالأكل بالحضن وبلاش تمعلشني شكراً..