مبروك يا فندم: مراتك مش مجنونة

رجاله كتير مقتنعين ان مرتاتهم مجانين ! ودا عشان مودها اللي بيتغير علي طول , او ان مشاعرها و انفعالتها مبتبقاش لايقه علي الموقف اللي هي فيه ,

الموضوع مش لازم يتصنف انه جنان او هرمونات زياده ,لان ممكن اوي يبقي عندها نوع من انواع الاضطرابات اسمه اضطراب المزاج، ودا اضطراب شائع اوي وسهل يجي لاي حد حتى لو فترة صغيرة وساعتهـا ما بيتصنفش مرض نفسي إنمـا بياخد نفس الأعراض.

وعدم فهمك للكلام ده هاتخليها مجنونة بحق وحقيق 😀

و فالاغلب مش بيكون موجود لوحده ,هو بيحب يجيي مع انواع اضطرابات تانيه زي الاكتئاب – الحزن المبالغ فيه – القلق – اضطراب ثنائي القطب مشكلته الاساسيه ان الناس اللي عندهم اضطراب المزاج بيكتئبوا وبيضايقوا بيفرحوا بشكل مبالغ فيه ,ودا للاسف عشان مش بيقدروا يتحكموا في مودهم ومشاعرهم بشكل كبر.

هنتكلم بعدين عن  اسباب الاضطراب وعلاجه بس المهم دلوقتي لو انا مراتي بتعاني من اضطراب المزاج اعمل ايه عشان اساعدها.

رقم واحد : افهم الاضطراب بتاعها كويس :

لازم تبقي عارف ان مودها اللي بيتغير كل شويه مش اوبشن في ايديها , ودا لان الدراسات اثبتت ان الناس اللي عندها اضطراب المود عندهم اختلاف في كيميا المخ عن الاشخاص الطبيعين ودا اللي بياثر وبيتحكم في مودهم الغير مستقر

رقم اتنين : اتكلم معاها كتيييير  :

سبب اساسي من اضطراب المود شعورهم بالوحده وان مفيش حد فاهمهم ولا مقدر اللي هما فيه , حاول تتكلم معاها كتير في كل الحاجات اللي بتضايقها وبتخوفها لحد ما تحس انها مش لوحدها وان ليها شخص موثوق تقدر تتكلم معاه

رقم تلاته : شجعها انها تروح لدكتور نفسي :

الاضطراب المود مش صعب في علاجه بس الافضل بكتيير عشان المعالجه تبقي فعالها انها تروح لشخص متخصص دا هيقدر يساعدها اكتر انها تتحسن بسرعه وتحقق نتايج ملموسه ودا هيريحها كتيير

رقم اربعه : اصبر عليها :

معظم المصابين باضطراب المود وخصوصا البنات بيفقدوا صحابهم والناس اللي حواليهم ,لان مش وضع مريح للناس انها تتعامل مع شخص مش مستقر في مشاعره ,ودا بعد فتره بيخلي الشخص المريض يفقد احساسه بالامان في اي علاقه ,فانت محتاج تصبر عليها وتطمنها طول الوقت وتساعدها في حل مشاكلاها مع اصحابها اللي بسبب انفعلاتها عشان متخسرش ناس اكتر ,

رقم خمسه  :عرفها انها مش لوحدها :

اخر دراسات بتقول ان تقريبا ١٠٪ من امريكا عندهم اضطرابات المود ودا عشان نمط الحياه الغير مستقر

ما بالك بقي بمصر !!!!!

دا هيطمنها يمكن بعديها تحطوا خطه بسيطه اسبوعيه للتحكم اكتر في مشاعرها واحتفلوا بعد كل انجاز عملتوه عشان تقدروا تستمروا :))

لو طبقت الكلام نضمنلك ان مراتك بعد فتره هتتطور بشكل كبير في التعبير عن مشاعرها ,ومش هتتخانق معاك وتتنرفز من اقل حاجه ,,

كل اللي عليك ببساطه انك تهتم ,تساعد , تسند , تسمع وبس ,,,,,