ما اسباب الاكتئاب اثناء الحمل؟
في الحمل جسم الست بيمر بتغييرات كتيرة. الضيقة من التغييرات دي ممكن يسبب الاكتئاب في الحمل. ودا بيأثر على نظرة الست لنفسها واللي حواليها. لو الموضوع زاد معاكين لازم تروحي لدكتور يساعدك في حل المشكلة.
خدي بالك أن الستات اللي بيجلها اكتئاب في الحمل، بيكونوا عرضة أكتر لنوع تاني من الاكتئاب اسمه اكتئاب ما بعد الولادة.
شاكك إن عندك اكتئاب؟ دوس هنا واعمل اختبار الاكتئاب أونلاين
المحتويــات
أي هو الاكتئاب؟
الاكتئاب حالة بتأثر على على المزاج والحالة العاطفية، بيسبب مشاعر الحزن. أه المزاج المتقلب والحزن رد فعل طبيعي للخسارة أو التغيير في الحياة أو ضغوطات الحياة أو غيرها من المشاكل. لكن الاكتئاب بيكون أصعب من كدا، وبيستمر مدة متقلش عن أسبوعين وبيمنع الإنسان من أنه يعيش حياته الطبيعية، وممكن يوصل للتفكير في الانتحار. لازم التواصل مع دكتور علشان يساعدك في علاج الاكتئاب.
اكتئاب الحمل بييجي لستات كتير، وأصلًا الاكتئاب عمومًا بييجي للستات أكتر من الرجالة، ودا لأن طبيعة الستات حساسة دا غير أنهم بيمروا بتغيرات في الهرمونات في أوقات كتيرة من حياتهم. يعني مثلًا في فترة الدورة الشهرية، والحمل، والولادة، وسن اليأس.
حاجات بتزود فرص اكتئاب الحمل:
- العمر في وقت الحمل، الستات الأصغر عرضة أكتر للاكتئاب
- الوحدة
- مفيش دعم من اللي حواليكي، أو الدعم قليل
- تاريخ من الاكتئاب أو الاضطراب المزعج السابق للحيض (PMDD)
- خلافات كتيرة مع جوزك
- كنتي مترددة في قرار الحمل
هل الحمل يسبب الاكتئاب؟
أه الحمل بيسبب الاكتئاب. لأن الجسم بيمر بتغييرات كتيرة، وكمان ضغوطات الحمل وتعبه بيسبب كدا. لكن مش كل الحوامل بيجلهم اكتئاب. لو كان جالك اكتئاب قبل كدا، فممكن الأعراض ترجع تاني والأمور تسوء في الحمل. علشان كدا لازم تتواصلي مع دكتورك علشان يساعك.
أعراض الاكتئاب في الحمل
علشان جسمك بيمر بتغييرات كتيرة فالحمل، فممكن تحسي بمشاعرة مختلفة يعني مثلُا تكوني فأعلى درجات الفرحة والحب وفجأة تتحول لخنقة دا عادي بيحصل للكل. لكن لو حصلك حاجة مالأعراض الجاية فممكن يكون اكتئاب ووقتها لازم تتصلي بالدكتور. الأعراض هي:
- أفكار كتيرة عن الموت أو الانتحار.
- الاكتئاب معظم اليوم
- شعور بالذنب أو اليأس أو انعدام القيمة.
- صعوبة في التفكير أو التركيز أو أخد قرار.
- مفيش اهتمام أو استمتاع بمعظم الحاجات طول اليوم
تأثير الاكتئاب على الحمل
الاكتئاب ممكن يأثر على صحة الأم بكذا طريقة:
- متقدريش تاخدي بالك من نفسك. في الحمل أنتي محتاجة تاخدي بالك من صحتك. لكن الاكتئاب بيخليكي مش قادرة تهتمي ومبتنفذيش كلام الدكتور كويس. كمان نومك بيكون وحش والأكل مش كفاية أو مش صحي. طبعًا كل دي حاجات بتضرك. كمان لما صحتك هتتأثر الجنين كمان بيتأثر. علشان كدا لازم تهتمي بعلاج اكتئاب الحمل وأنه ميتطورش علشان صحتك وصحة ابنك أو بنتك.
- بيعرضك لخطر استخدام مواد الضارة. يعني شرب السجاير أو الخمرة أو المخدرات. الاكتئاب ممكن يوصل للحاجات دي وهي طبعًا مضرة لحملك.
- مبتقدريش ترتبطي بطفلك. الطفل وهو في بطن أمه بيحس بيها وبصوتها وطريقتها، والاكتئاب بيخليكي مش قادرة تحسي بيه ولا تفرحي. فمبيحصلش ارتباط ما بينكم وكمان دا غالبًا بيستمر فترة بعد الولادة.
إزاي تتخلصي من اكتئاب الحمل؟
لو كان عندك اكتئاب حمل، ففي خطوات ممكن لو عملتيها تساعدك في أنك تتحسني. أيوة مسئولية طفل حاجة صعبة لكن لازم تستعدي وتهتمي بصحتك علشان تقدري تهتمي بيه. ومن الحاجات اللي هتساعدك:
- متهتميش بأنك تخلصي كل حاجة. متوتريش نفسك بالحاجات اللي وراكي. لأ قللي شغلك اليومي سواء فالبيت أو الشغل. اعملي الحاجات اللي بتساعدك تسترخي. وافتكري أن الأهتمام بنفسك جزء من الأهتمام بطفلك اللي لسه مجاش.
- اتكلمي عن خوفك. لازم تطلعي اللي جواكي مع أصحابك أو جوزك أو أهلك. لو لقيتي دعم منهمن أكيد هتتحسني.
لو ملقتيش نفسك مرتاحة بعد ما تعملي كدا، يبقى لازم ترجعي لدكتور متخصص يساعدك في العلاج قبل ما الاكتئاب يتطور ويأثر عليكي أكتر.
هل الأدوية المضادة للاكتئاب آمنة في الحمل؟
كتير من الأدوية المضادة للاكتئاب الموجودة حاليًا آمنة نسبيًا لعلاج الاكتئاب في الحمل، على الأقل من ناحية الآثار قصيرة المدى على الطفل. لكن الآثار طويلة المدى مفيش دراسات كافية عنها. علشان كدا لازم الدكتور هو اللي يوصفلك الدواء ويقولك فوايده ومخاطره.
