شوف يا سيدي؛ لغة الجسد باختصار هي اللغة اللي بيتلكمهـا جسدك.. يعني الرسالة اللي بتقدر توصلها بحركات جسمك من غير ما تتكلم. زي حركات إيدك أيديك أو تعبيرات وشك أو وضع رجليك أو كتافك أو راسك أو حتى نبرة صوتك.

حالياً وإنت بتقرا المقال ده عندك نوعين من لغة الجسد دي.. لغة إنت بتتحكم فيها بسهولة بالفعل، ولغة إنت ما بتتحكمش فيها أو بتفضحك بمعنى أصح. طبعاً معظم الحاجات العلمية اللي بتتكلم عن لغة الجسد بتقولك إزاي تتحكم في اللغة دي وتوظفها بحيث توصل للي قدامك المعنى اللي إنت عايزه في الوقت المناسب.

أبسط مثال على كدة هتلاقي ناس واخدين حذرهم جداً في اللغة اللي جسمهم (وخاصة) وشهم بيتكلمها ودول هتلاقيهم بيقدروا مثلاً يثبتّـوا ملامح وشهم في حالات الحزن عشان ما محدش يعرف هما بيفكروا في إيه دلوقتي؟ إنما لو حد فاهم لغة جسد كويس هايعرف يفهم ده من خلال كذا حاجة تانية زي حركة الإيد ونبرة الصوت وهكذا..

في دراسة بتقول إن الكلمات بتمثل 7% بس من طرق التوصل بين الناس. النسبة الأكبر رايحة لنبرة الصوت ولغة الجسد كلها بشكل عـام.

فهمت يا روح أمك؟

دي كلمة ممكن المدرس يقولها بزعيق أو تريقة لتلميذ عنده في الفصل (ساعتهـا هايبقى إسلوب عدواني).

إنمـا كمان ممكن تقولهـا كريمة مُختار بكل حنية لأي ممثل بيقوم بدور إبن أختها في أي فيلم أو تمثيلية (ساعتهـا هايبقى إسلوب حنين).

طريقة التواصل عليها عامل كبير جداً في العلاقات بين النـاس عشان كدة بنتخـانق وبنحب. عشان كدة بنحب كتير نتدارى ورا الرسايل والتليفونات والإنترنت. عشان إحنا بنخاف نتفضـح.

كلنا بلا استثناء بنستخدم لغة الجسد سواء بشكل إرادي أو لا إرادي. ومطلوب قوي من الناس اللي دورها توصل المعلومة لنـاس تانية إنهـا تتقن لغة الجسد وتعرف توظفها صح.

أكتر ناس بتستخدم لغة الجسد والمفروض إنهـا تبرع فيها هم الدكاترة وخاصة النفسيين، مدربين التنمية البشرية ومدربين الحياة Life Coaches، والمدرسين والممثلين وخاصة المسرحيين منهم.

إيه هي أدوات لغة الجسد ؟

• الحواجب:  أشهر حركة في التاريخ. لما حد بيرفع حاجب واحد ده معناه إنه مستغرب، ولو رفع الاتنين فده معناه إنه متفاجئ.
• المناخير: لما حد بيسند مناخيره على إيده أحياناً كتير بتدل على الإنصات وأحياناً برضه بتدل على إنه بيحاول بفهم إيه المطلوب منه.
• هز الأكتاف: لما البني آدم بيهزلك كتفه فهو بيديلك رسالة إنه مش عارف أو بيقولك إنه مش فاهم إنت بتتكلم عن إيه أو بيقولك فيما معناه ماليش دعوة (على حسب الموقف).
• الأصابع: نقر الشخص بصوابعه على الكرسي أو على المكتب بيدل إنه عصبي أو إن صبره قرب يخلص (طبعاً في ناس دي عادة عنجهم ومالهـاش علاقة بالعصبية خالص وعشان كدة لازم دايماً تقرا أكتر من علامة عشان تكون صورة معينة عن الشخص اللي قدامك).
• المناخير: في نظرية بتقول إن كتير من اللي بيكذبوا بيلمسوا مناخيرهم وهم بيتكلموا .. بس طبعاً مش مقياس 🙂 خاصة إن كتير من الناس عارفة المعلومة دي فبتتحكم فيها 🙂 .
• اتجاه الرجل: في كذا دراسة اتعملت بتقول إن إتجاه رجلك وإنت قاعد بيحدد إنت عايز  تعمل إيه؟ فمثلًا الطالب اللي مش طايق الحصة بتلاقي وهو قاعد فارد رجله في اتجاه باب الخروج (المدرس أو الدكتور اللي بيدير الحصة أو المحاضرة لازم يبقى بيفهم ده) . أو الضيف إياه اللي واقف عالباب ومش عايز يخش البيت هتلاقي وضع رجليه في اتجاه الخروج (وده يفضحلك اللي فعلاً مش عايز يخش ومكسوف وبين اللي بيمثل إنه مكسوف).
• لما حد بينسى بيضرب قورته (جبهته) بإيده ضربة خفيفة أو تقيلة أحياناً .. محدش علمنا الحاجات دي كلها ولكنهـا لغة الجسد المعروفة عالمياً.

لغة الجسد هاتنفعك جامد جداً في الفصال على فكرة