كيف يمكن الخروج من حالة الاكتئاب؟
حالة الاكتئاب مرض مش دلع منك أو مشكلة فيك، وبننصحك تستشير دكتور عشان يقدر يساعدك. ممكن يوصفلك علاج نفسي وجلسات تقعد فيها مع ناس تانية عندهم نفس المشكلة عشان تسمعوا بعض وتستفيدوا من تجارب بعض. لكن ممكن دا ميكونش كافي ويكتب أدوية زي مضادت الاكتئاب. لكن أوعى تاخد علاج من نفسك أو توقف علاج من غير ما ترجع لدكتورك. عشان ممكن دا يتسبب في انتكاسة.
شاكك إن عندك اكتئاب؟ دوس هنا واعمل اختبار الاكتئاب أونلاين
لكن عمومًا في حاجات لو عملتها هتساعدك تتخلص من الاكتئاب، زي:
المحتويــات
إزاي أخرج من حالة الاكتئاب؟
ساعد غيرك
لما تساعد غيرك هتقدر تساعد نفسك، علشان هتحس بقيمتك وأنك تقدر تكون ناجح وهتخرج من حالة العزلة واللامبالاة اللي حابسك فيها اكتئابك.
حدد أهداف تقدر عليها
ناس كتيرة بتكتئب لأنها بتحط لنفسها أهداف أكبر من امكانيتها في وقتها. ركز على هدف تقدر توصله ولما توصله بص لغيره. يعني اطلع السلم درجة درجة أحسن ما توقع. كمان الهدف اللي تقدر عليه هو اللي تتحكم فيه بنفسك، من غير مانجاحك يكون واقف على مساعدة حد تاني.
اعمل جدول
اتعود دايمًا تعمل لنفسك جدول عشان تقدر تخلص اللي وراك في الوقت المظبوط. لأن لو اتراكمت عليك الالتزامات وقتها هتحس بخنقة وتوهه ومش هتعرف تحقق حاجة.
اتمرن وكل كويس
اتمرن علطول حوالي 5 مرات في الأسبوع، ولو لمدة نص ساعة. دا هيساعدك في تحسين مزاجك ويديك طاقة. لكن خد بالك الأكل بردوا له عامل كبير في أنه يخرجك من الاكتئاب. لما تاكل أكل صحي صحتك النفسية والجسدية هتكون أحسن. ولازم تبعد عن الأكل اللي كله كربوهيدرات والوجبات السريعة ومشروبات الطاقة.
خليك مع الناس الايجابية
علشان تخرج من حالة الاكتئاب اتعامل مع الناس الإيجابية مش المحبطة. وطبعا ممكن تقضي أوقات مع نفسك، لكن حاول توازن ومتعزلش نفسك خالص.
نام حلو
حاول تحافظ على عدد ساعات نوم كفاية. لا هي اللي قليلة ولا كتيرة. كمان أنك تفضل سهران طول الليل وبعدين تنام كتير طول النهار دا طبعا بيزود الاكتئاب.
اتحمل المسئولية
لما بتكون مكتئب ممكن تطنش أي مسئوليات عليك في البيت أو الشغل. متعملش كدا لأن استمرارك في حياتك وأنك تقوم باللي عليك، بيساعدك في التخلص من الاكتئاب. والعكس كل لما تهرب والمسئوليات تزيد كل ما هتكتئب وتحس بالفشل وأن مفيش لوجودك قيمة.
بطل تفكير سلبي
التفكير السلبي بيكون مسيطر عالشخص اللي عنده اكتئاب. وعشان تتخلص منه لازم تفكر بطريقة إيجابية.
اسأل الدكتور
قبل ما تاخد أي علاج للاكتئاب ولو كان حتى مكمل غذائي، لازم تسأل الدكتور. لأن بعض الأدوية ليها أضرار، وكمان المكملات زي زيت السمك وحمض الفوليك ممكن تكون مش مناسبة للكل.
اعمل حاجة جديدة
الملل بيزود الاكتئاب. حاول تعمل أي حاجة جديدة، مثلًا قراية كتاب أو زور متحف أو جنينة أو اتعلم لغة، أو حتى اعمل أكلة جديدة في البيت.
ابعد عن المخدرات
الخمرة والمخدرات مش هتخلصك من الاكتئاب، بالعكس دي هتزوده. كمان ممكن تخلي الانسان يعمل أي حاجة عشان يوصلها حتى لو هيسرق. وتأثيرها ممكن يتطور لحد ما يوصل لمشاكل في العقل.
إزاي تعرف الاكتئاب:
لازم تعرف أعراض الاكتئاب اللي بتستمر لأسبوعين أو أكتر عشان تعرف تفرق ما بين حالة الحزن العادية اللي بيمر بيها الكل في وقت معين وما بين مرض الاكتئاب. والأعراض هي:
- مزاج مكتئب أو عصبي
- مشاكل النوم، بتنام كتير أو قليل، بتنام بالنهار
- تغيير الاهتمامات، يعنى مبقتش مهتم باللي كنت بتحبه
- شعور بالذنب على كل حاجة حتى لو مش مستاهلة
- معندكش طاقة
- التركيز قليل بطريقة غريبة
- شهية متغيرة، يعني تاكل كتير أو متاكلش خالص
- القلق الشديد
- الخوف
- التفكير فالانتحار كتير أو أنك تأذي نفسك بأي طريقة زي جرح أو حرق
