كيف يتعامل الطبيب مع المريض النفسي؟
الكلام عن المشاكل النفسية والعقلية بيكون صعب على ناس كتيرة، وممكن ميلاقوش اللي يفهمهم صح ويقدر حالتهم. لكن المرض النفسي خطير ولازم يتعالج قبل ما يتطور وأضراره تكتر. كمان المريض النفسي مش لوحده دا الدراسات بتقول إن 1 من كل 5 بيمروا بمشكلة نفسية أو عقلية في حياتهم. علشان كدا مش لازم تتكسف من طلب المساعدة من اللي حواليك، وخاصة دكتور نفسي متخصص.
في ناس صعب عليهم أنهم يتكلموا مع الدكتور عن مشاكلهم واللي بيحسوا بيه. لكن دا مش صح، لازم تكون في شجاعة ويتكلموا، والدكتور هيفهمهم كويس ويطمنهم هو مؤهل لكدا. كمان مينفعش نسيب المرض لأنه مش هيختفي من نفسه وممكن يتطور للأسوء.
شاكك إن عندك اكتئاب؟ دوس هنا واعمل اختبار الاكتئاب أونلاين
المحتويــات
هل أحتاج إلى زيارة الطبيب؟
كل مرض عقلي او نفسي ليه أعراضه، لكن عمومًا في أعراض بتوضح أن في مشكلة. زي:
- فقدان الشهية.
- التفكير بأفكار سلبية عن نفسك.
- إحساس بالقلق بشكل متكرر.
- التهيج أو المزاجية.
- صعوبة في التركيز.
- مفيش استمتاع بالحياة.
- صعوبة في الحياة اليومية، يعني مثلًا أنك تروح الشغل أو أصلًا تقوم من السرير،.
- صعوبة في النوم أو النوم مدة طويلة.
- بتشوف أو تسمع حاجات مش موجودة.
لو لاحظت أي تغييرات من دي خلال الأسابيع أو الشهور القليلة اللي فاتت، فلازم تفكر في أنك تروح للدكتور. ومتقلقش الدكتور بيعرف إزاي يتعامل مع المريض.
كيف يتعامل الطبيب مع المريض النفسي؟
يمكن متحسش بالراحة أنك تكلم دكتور عن مشاكلك، لكن دا مش صح لأن الدكتور هو الشخص اللي مؤهل إنه يساعدك وكمان بيعرف إزاي يتعامل ويطمنك. وهيعمل الحاجات دي:
- هيسألك عن أفكارك ومشاعرك، علشان يفهم أنت بتمر بأي.
- هيطمنك أنت مش مجنون، إنت بس عندك مشكلة نفسية ومحتاج حل.
- هيقولك الحاجات اللي هتساعدك في العلاج.
- الدكتور بيوصف أدوية لو كانت مناسبة ليك.
- بيطلب منك تغير أسلوب حياتك علشان تتحسن، يعني مثلُا تلعب رياضة.
- ممكن يحولك لحد متخصص أكتر، ويقدر يفيدك.
- هيتفق معاك على مواعيد المتابعة علشان يتابع حالتك ويشوف الإستجابة للعلاج.
نصايح لمساعدة المريض النفسي قبل مقابلة الطبيب النفسي
حط هدف معقول
المرض النفسي والعقلي بياخد وقت كبير في تشخيصه وعلاجه. علشان كدا لو حد حط هدف أنه يتخلص من أعراضه حالًا فطبعًا دا مش هيحصل، وبالتالي هيحس بخيبة أمل وممكن حالته تسوء أكتر. الدكتور ممكن يساعدك في تحديد الهدف لما تحكيله أعراضك وتحطوا خطة علاج.
اكتب المعلومات المهمة
قبل ما تروح للدكتور، خد وقتك واكتب افكارك وكل حاجة عايز تتكلم معاه فيها. دا هيساعدك أنك متنساش حاجة، والحاجات اللي ممكن تكتبها زي:
- الأعراض الخاصة بيك. زي التغييرات الجسدية أو العقلية أو العاطفية أو السلوكية.
- إزاي بيأثر مزاجك على حياتك اليومية.
- المعلومات الشخصية الرئيسي، زي الأحداث المؤلمة في الماضي، أو المواقف العصيبة التي بتواجها حاليًا.
- معلوماتك الطبية، زي الحالات الجسدية أو العقلية اللي بتعاني منها حاليًا. كمان اكتب كل الأدوية التي بتاخدها، بما فيها الأدوية اللي بتصرف من غير وصفة طبية وأو حتى المكملات العشبية.
- أسئلة تحب تقولها لدكتورك.
العلاجات اللي بيستخدمها الطبيب النفسي؟
الطبيب النفسي بيستخدم مجموعة علاجات، ومنها العلاج النفسي، والأدوية، وغيرها زي العلاج بالصدمات الكهربائية. والعلاج بيتحدد على حسب حالة كل مريض.
العلاج النفسي
بيسموه بردوا العلاج بالكلام، ودا يعني الكلام اللي بيحصل بين المريض والدكتور. النوع دا مالعلاج بيستخدموه مع الاضطرابات النفسية والصعوبات العاطفية. الهدف منه السيطرة على الأعراض المزعجة أو التخلص منهان علشان يقدر المريض يعيش حياته. ممكن العلاج يستمر كام مرة في الأسبوع أو أسبوعين أو يستمر لسنين. كمان ممكن العلاج يكون بشكل فردي يعني كل مريض لوحده، أو بشكل جماعي يعني جلسات مجمعة للمرضى علشان يستفيدوا من تجارب بعض، وميحسوش أنهم لوحدهم.
في أشكال كتيرة للعلاج النفسي. يعني في علاجات نفسية هدفها تغيير سلوكيات وتفكير المريض. وعلاجات بتساعده أنه يعرف تأثير علاقاته وتجاربه على سلوكه. وفي علاجات بتساعده يحل مشاكله ويركز عليها، زي مثلُا العلاج النفسي السلوكي المعرفي.
الأدوية
الطبيب النفسي بعد ما بيخلص تشخيص المرض وبيشوف أن المريض محتاج دواء فبيوصفه. الأدوية بتساعد المريض في أنه يتخلص من أعراضه أو يسيطر عليها. هي بتشتغل على مواد معينة في الدماغ، في مرضى بيحتاجوا يخدوها مدة طويلة، لكن طبعًا يقابلوا الدكتور كل فترة علشان يتابعوا تأثيرها ولو ليها آثار ضارة. الأدوية زي:
- مضادات الاكتئاب. دي بيستخدموها علشان يعالجوا الاكتئاب واضطراب الهلع واضطراب ما بعد الصدمة والقلق واضطراب الوسواس القهري واضطراب الشخصية الحدية واضطرابات الأكل.
- الأدوية المضادة للذهان. بتستخدم لعلاج الأعراض الذهانية (الأوهام والهلوسة) والفصام والاضطراب ثنائي القطب.
- المهدئات ومزيلات القلق. بتستخدم لعلاج القلق والأرق.
- المنومات. بتستخدم علشان تساعد في النوم.
- مثبتات الحالة المزاجية. بتستخدم لعلاج الاضطراب ثنائي القطب.
- المنشطات. بتستخدم لعلاج اضطراب فرط الحركة ونقص الانتباه.
في الغالب الدكاترة بتوصف الأدوية مع العلاج النفسي. كمان ممكن أدوية تانية زي:
- العلاج بالصدمات الكهربائية (ECT). دا علاج بيطبقوا فيه تيارات كهربائية على الدماغ، وفي الأغلب بيستخدموه لعلاج الاكتئاب الشديد اللي مش بيستجيب للعلاجات التانية.
- العلاج بالضوء. بيستخدموه في علاج الاكتئاب الموسمي.
- التحفيز العميق للدماغ (DBS)، وتحفيز العصب المبهم (VNS) ، والتحفيز المغناطيسي عبر الجمجمة (TMS). دي علاجات جديدة بيستخدموها في شوية اضطرابات عقلية.
