كيف تشخص حالتك النفسية؟
كتير مننا بيمر بظروف صعبة سواء في حياته الخاصة أو في الشغل، بتغير موده وبتخلي عنده حالة من الحزن والعزلة. وممكن يتطور الموضوع ويوصل لإكتئاب أو مشكلة نفسية كبيرة وهتحتاج تروح لمتخصص يشخص حالتك .
شاكك إن عندك اكتئاب؟ دوس هنا واعمل اختبار الاكتئاب أونلاين
لو معندكش الجرأة تروح لدكتور نفسي كمل قراية الموضوع وشوف إزاي تقدر تشخص حالتك النفسية…
أول حاجة هتساعدك أنك تشخص حالتك النفسية، أنك تتأكد أن جسمك سليم وتعمل الفحوصات الطبية اللي تأكد ده، زي مثلا، فحص وظيفة الغدة الدرقية . تاني حاجة لازم تعرف أي هى أنواع الإضطرابات النفسية وأعراضها، وهقولك دلوقتي شوية معلومات عنها..
-
المحتويــات
اضطرابات النمو العصبي:
ودي بتكون في مراحل النمو والطفولة، ممكن تكون بتعاني من طيف التوحد وانت مش واخد بالك، وده بيخليك تفضل العزلة وعدم الإختلاط واللعب مع زمايلك في المدرسة. وكمان فيه إضطراب نقص الإنتباه وفرط الحركة، وده بيعاني منه أطفال كتير وبيشخصوهم على إنهم “عيال أشقية” بس الحقيقة أن الأطفال دي بتواجه صعوبة في الفهم والتركيز وحتى الإنتباه.
-
طيف الفصام :
وده أعراضه الأوهام والهلوسة والتفكير طول الوقت .
-
اضطرابات الاكتئاب:
وهنا بتكون مشاعر الحزن والعزلة مسيطرة على الشخص، وممكن تعطل حياته الشخصية والعملية كمان.
-
اضطرابات القلق:
طبيعي أنك تقلق لو مستني نتيجة إمتحان مثلا، لكن الإفراط في القلق ده مرض هيخليك تخاف تعمل أي حاجة لأنك قلقان من النتيجة. دايما وأنت قلقان هتفكر أن في خطر أو محنة في المستقبل، وممكن يتطور الموضوع لحاجة إسمها “الرهاب” وهنا هتخاف من كل حاجة في حياتك ودايما هتتوقع الأسوأ.
-
الوسواس القهري :
لما تلاقي نفسك بتغسل أيدك أربع مرات وبتفكر في المرة الخامسة، ده ممكن يكون علامة على أنك بتعاني من الوسواس القهري اللي بيخلي الهواجس والأفكار والأفعال المتكررة تسيطر علي دماغك.
-
اضطرابات التغذية والأكل:
لما تحس أن ملكش نفس تاكل يوم واتنين وتلاتة، دي علامة أن عندك إضطراب في التغذية اللي بيخليك فاقد تماما للشهية.
-
اضطرابات الإخراج:
كتير من الأطفال وأوقات الكبار بيعانو من سلس البول وعدم التحكم في عملية الإخراج، وده في الغالب بيكون سببه نفسي مش عضوي.
-
اضطرابات النوم والاستيقاظ:
وهنا هتلاقي نفسك مش قادر تنام ساعتين متواصلين، وممكن يحصل مشاكل في التنفس وقت النوم .
-
تقلبات الشخصية:
وده اضطراب بيحصل لما بتمر بأزمة عاطفية أو تفسخ خطوبتك مثلا.
إزاي تحسن من حالتك النفسية؟
ممكن ناس كتير تساعد في تحسين حالتك النفسية، وأولهم الأسرة والأصدقاء، وأحيانا بيكون لازم تروح لمتخصص، والسطور الجاية فيها أكتر من طريقة لعلاج حالتك النفسية .
1- العلاج بالأدوية:
ممكن تستعين بشوية أدوية زي مضادات الاكتئاب. وطبعا لازم تكون تحت إشراف الطبيب، والأدوية دي هتقلل من مشاعر الحزن واليأس ونقص الطاقة وصعوبة التركيز وقلة الاهتمام بالأنشطة.
لو بتعاني من القلق وقلة النوم، ممكن تستعين بالأدوية اللي بتستخدم لعلاج اضطرابات القلق، زي اضطراب القلق العام أو اضطراب الهلع.
2- العلاج النفسي :
الطريقة دي من خلالها بتقدر تعبر عن كل مشاعرك السلبية وعن اللي بيسبب ليك حالة الحزن والكآبة اللي بتعيش فيها. واللي هيسمعك لازم يكون متخصص وهو هيساعدك في التغلب على المشاعر السلبية والتأقلم مع أي ظروف سيئة بتمر بيها .
عشان تتخطي حالتك النفسية السيئة بسرعة، لازم تختار معالج تحس بالراحة وأنت بتتكلم معاه ويقدر يفهمك بسرعة ويكون مستمع جيد. ومن المهم برده أنه يفهم رحلة الحياة والظروف اللي ساعدت في تشكيل شخصيتك .
3- العلاج في المستشفيات :
أوقات بتتطور الحالة النفسية للمريض لدرجة أنه ممكن يأذي نفسه وبكده هيحتاج لرعاية في مستشفى للأمراض النفسية. وده بيكون أفضل لما المريض ميكونش قادر يعتني بنفسه وكمان ممكن يكون خطر على نفسه واللي حواليه.
4- العلاجات المنزلية:
ممارسة الرياضة باستمرار هتساعدك في التخلص من أعراض الاكتئاب والتوتر والقلق، وكمان الرياضة هتبطل تأثيرات بعض الأدوية النفسية اللي بتسبب زيادة الوزن.
كمان لازم تعمل لنفسك جدول زمني وتلتزم بيه، ومن خلاله هتقدر تحصل علي قسط كافي من النوم وتتناول طعام صحي وتعمل أي نشاط بدني لتحسين صحتك العقلية.
حاول تقلل من المهام المطلوبة منك وابعد عن المهام والمشاكل الكبيرة. نظم وقتك بحيث تنجز ولو مهمة بسيطة خلال اليوم، وده هيخليك تحس بالنجاح وتحسن من حالتك النفسية.
خليك دايما على اتصال مع الأصدقاء والعائلة، وشارك في الأنشطة الاجتماعية، وزود من قعدتك مع اللي بتحبهم .
