٨ طُرق مُختلفة بيدمرلك الطلاق بيها صحتك

صوابعك مش زي بعضها عشان كدة مش هتلاقي اتنين عندهم نفس أعراض ما بعد الطلاق، ولكن كُلهم بلا استثناء بيحسوا بألم بدرجات مختلفة، ولإنك وقت الطلاق بتكون مشغول في الأوراق القانونية والإجراءات فصحتك بتتأثر بشكل كبير من أول لخبطة النوم لحد خطر الإصابة بالأمراض القلبية.

وفي المقال ده هنقولك على الأعراض دي ومدى صعوبتها عشان تقدر تواجهها وتحافظ على صحتك وتقوم بكل اللي في وسعك عشان تمنع إنها توصل لحالة حَرِجة:

 القلق

“اللي بيكون القلق صاحبه، يا ويله ويا سواد ليله”، والقلق للأسف دايمًا مُلازم لحالات الطلاق، واللي بدوره بيخليك خايف من الجاي لأن حياتك الجاية هتكملها لوحدك وبنسبة كبيرة هتغير مكان سكنك وأوقات وظيفتك و دوشة نقل الولاد لمدرسة تانية ومساعدتهم إنهم يتأقلموا، وعُلماء النفس بيقولوا عن القلق ده إنه بيخلي صاحبه يتصرف بشكل غير منطقي زي إنك تبعت رسايل بشكل هيستري للمحامي بتاعك من باب إنك تتطمن، أو إنك تسحب كل فلوسك في البنك عشان حاسس إنك هتدخل على أزمة مالية.

التغيُر الجذري في الوزن

أكتر تغيير بيبان على أي حد بيمُر بتجربة الطلاق هو الزيادة الكبيرة في الوزن أو الخسسان الشديد، في ناس بتلجأ للأكل بشراهة عشان تطّلع “غِلها” وعشان تحِس بالسعادة المؤقتة اللي بيسببها الأكل الدسم والشكولاتة، وعلى الجانب التاني ناس الدكاترة بتقول عنها إنها بتتصاب “بمُتلازمة الحُزن” اللي بتخليهم مش طايقين حتى الأكل لأن الحُزن مخيم على كل أفعالهم.

مُتلازمة الأيض

الأشخاص اللي بيعانوا من الأمراض المُزمنة زي الضغط والسُكر أو زيادة نسبة الدهون بيكونوا عُرضة للإصابة بمتلازمة التمثيل الغذائي، ولإن المصائب لأ تأتي فُرادى فده بيخليهم مُعرضين للأصابة بأمراض زي القلب والجلطات الدماغية، والدراسات أثبتت إن الستات المُطلقات أو الأرامل أو اللي مش مبسوطين في جوازاتهم هما أكثر ناس مُعرضة للأمراض دي كُلها أكتر من الستات اللي تجربة جوازها ناجحة وسعيدة.

الإكتئاب

بعد الإنفصال بيتعرض الطرفين للشعور بالفَشل، ولو طرف فيهم اتعرض للخيانة بيحس كمان باليأس وثِقته في نفسه بتتدمر، والدكاترة النفسيين بتقول أن هي دي اللحظة المحورية في حياة الإنسان واللي لازم فيها يطلب الدعم النفسي من مُختص وإنه يعيد حساباته وأساس اختياراته-واللي منها اختياره لشريك حياته السابق- ويقرر يفتح صفحة جديدة مع نفسه ويكون بطل قِصته.

 تعاطي المُخدرات

في اعتقاد خاطِئ عند أغلب المُدخنين إن السجاير بتصبرهم على المشاكِل لإنهم بينفخوا همومهم مع دُخانها، فَبعد الطلاق بيزيد مُعدل التدخين وبعدين ممكن يدخلوا في سِكة اللي يروح مبيرجعش وبيلجأوا للمخدرات لتسكين مشاعر الألم وفُقدان الشريك والدعم الإجتماعي ولإن دي حالة وهمية من النسيان بيرجعوا للواقع بأمراض زي الإكتئاب والقلق المُزمن اللي بيجر رجلهم أكتر للتعاطي والأبحاث أكدت إن أغلب اللي بيلجأوا للحل ده بيكونوا الرِجالة اللى مُعدل إصابتهم بخطر التعاطي بيكون كبير جدًا مُقارنة بالستات المُطلقة أو الرِجالة السعيدة في جوازها، والسبب في كدة إن الرِجالة بطبعها بتكابر في إظهار مشاعرها لإنهم بيعتبروه ضعف فبيلجأوا للحلول المؤقتة والخطيرة زي كدة.

 الأرق

أجدادنا قالوا إن الهم بيطير النوم من العيون، والأرق من أشهر الأعراض اللي بتلازم المنفصلين، وحتى لو غلب عينيهم النوم لوقت قُليل بيكون كُله كوابيس، والأرق هو شعور تابِع للإكتئاب المُصاحب للإنفصال، يعني دايرة بيدخُلها الأشخاص بعد الإنفصال وبتسلّم كُل نُقطة النُقطة التانية لحد ما تتأثر صِحته النفسية والجسدية.

الأمراض المُزمِنة

لإن الصحة النفسية بتتأثر بأمراض زي القلق والإكتئاب بعد الإنفصال فده بيأثر على صحة الجسم كمان بتعريضه للأصابه بأمراض زي صعوبة الأكل وعُسر الهضم وصعوبة تأدية الحركات الرياضية، وده بيفتح الباب لأمراض خطيرة، والأبحاث أثبتت إن المُطلقين والأرامل بيتعرضوا لده بنسبة ٢٠ % زيادة عن الأشخاص اللي جوازهم ناجح ومستمر، غير إن الأعراض دي بتسببلهم فيما بعد صعوبة القدرة عالحركة ودايمًا الدكاترة بتنصحهم إنهم يعملوا كُل سنة فحص شامل عشان يحافظوا على صحتهم بقدر الإمكان.

أمراض القلب والأوعية الدموية

الأبحاث بتقول إن الرجالة والستات اللي في منتصف العمر وبيمروا بتجربة الطلاق أكثر عُرضة من غيرهم المتجوزين بالإصابة بأمراض القلب والأوعية الدموية، وإن الأكثر تأثرًا هما الستات لإن في الغالب بيكون مصدر رزقهم مُعتمد على أزواجهم فبعد الطلاق بيحصلهم أزمات مالية بتخليهم يمروا بتجربة أمراض القلب وأزماته.