حتى المُلحد بيعمل خير: 7 فوايد نفسية -مش دينية- للصدقة

عمرك حسيت بحماس شديد بعد ما قمت بعمل خير؟ طيب لاحظت قبل كدة أزاي بتكون هادى ومرتاح بعد يوم طويل من التطوع فى الأعمال الخيرية؟ طيب عمرك حسيت بالحماس لعمل الخير بعد ما افتكرت آخر مرة كنت مبسوط أزاي وانت بتعمل حاجة فيها خير ومفيدة للناس؟ لو كانت اجابتك نعم على أي سؤال من الأسئلة دي، فالموضوع طلع ليه أسباب علمية هنقولك عليها.

سبع فوائد علمية لعمل الخير

1. عمل الخير بيقلل من التوتر

في دراسة علمية أجريت سنة 2017 لمجموعة من الناس أعمارهم فوق الخمسين، وكانوا بيتطوعوا لأعمال خيرية لمدة 4 ساعات أسبوعيا، الدراسة أثبتت انهم كانوا أقل عرضة للإصابة بارتفاع ضغط الدم من غير المتطوعين، عودة لأن التطوع للأعمال الخيرية والعطاء بدون مقابل بيقلل من افراز هرمون الكورتيزول في الدم وهو الهرمون المسئول عن التوتر في الجسم وبالتالي بيقلل إحساس القلق اللي الشخص ممكن يتعرض ليه.

2. التطوع في الاعمال الخيرية بيطول العمر

ودي حقيقة علمية مثبتة لأن العلماء وجدوا ان في علاقة بين العطاء والإيثار وبين انخفاض خطر الموت المبكر على الشخص، عشان كدة هتلاقى الناس اللي بتهتم بخدمة بغيرها او بيقدموا مساعدات ملموسة لأصدقائهم او لأفراد أسرهم (زي انجاز أي مهمة او حتى رعاية الأطفال) بيكونوا أقل عرضة للإرهاق وبيقل معدل الموت المفاجئ عندهم، بمعنى ان مساعدة الخير بتقلل التعرض للقلق وبالتالي بتقلل الارتباط بين التوتر والضغط العصبي وحدوث الوفاة.

3. عمل الخير بيمنح شعور إيجابي أفضل

دايما بعد التطوع في الاعمال الخيرية الشخص بيشعر بإحساس بالسعادة ودة بيكون نتيجة افراز مادة الاندروفين في الدماغ وهي المادة الكيميائية المسئولة عن الشعور بالرضا في الدماغ، ولما بتقوم بعمل تطوعي او مساعدة شخص تانى بتنشط مراكز المتعة في العقل وبيتم افراز مادة الاندروفين وبالتالي بتشعر بإحساس من السعادة والرضا، ده غير مشاعر الامتنان والسعادة اللى بنشعر بيها مع القيام بأعمال خيرية.

4. عمل الخير بيخلينا أسعد في شغلنا

بعد عمل دراسات كثيرة على ناس في مختلف الاعمار، أكتشفوا ان الناس المُحبة لفعل الخير غالبا بيكونوا ملتزمين أكثر بعملهم واحتمالية تركهم العمل بتكون أقل كتير من غيرهم، ده غير ان الناس في مرحلة الثلاثينات من العمر اللي اتعودوا على العطاء وممارسة اعمال الخير بيكونوا أكثر سعادة في حياتهم وشغلهم في المستقبل من الناس اللي مش بتحب تساعد غيرها.

5. القيام بأعمال خيرية بيحسن الصحة العقلية

المشاركة في الاعمال الخيرية بيقوم بدور كبير في تحسين الصحة العقلية، لأنه بيحسن من شعور الرضا والسعادة عند الناس، ده غير انه بيحمى من الاكتئاب.

6. عمل الخير ممكن يحقق السعادة

الأشخاص اللي اتعودوا على ممارسة اعمال الخير دايما بيكونوا أكثر سعادة بمرور الوقت، اعمال الخير بتخلي حياتنا أحسن في كل حاجة لأنها بتمنحنا شعور بالرضا عن حياتنا وبتساعدنا نحقق ذاتنا وكمان بتحسن من صحتنا البدنية، وفى أسباب نفسية كثيرة بتشجع الناس على التبرع وعمل الخير.

7. الخير بيجر خير أكتر

مجرد التفكير في شعور السعادة اللي حصلت عليها من مساعدة الآخرين هيشجعك إنك تعمل خير أكثر، وهيساعدك تتخلص من الانانية وتفكر في الحاجات اللي تقدر تساعد بيها الناس وتخرج من دائرة التفكير في نفسك، كل الحاجات دي هتشجعك تستمر في عمل الخير.