5 طرق علشان تكون منتج أكتر انهارده

عايز تكون منتج أكتر؟ في عالم التكنولوجيا، عادى جدا أنك تقضى يوم كامل في إنك ترد على رسايل على الايميل أو تقضيه على الفيسبوك بدل من إنك تنجز إنجازحقيقى. وده ممكن يحصل لأحسن حد فينا. النصايح دى هتفيدك انك تنتج أكتر:

1- ابدأ يومك بخمس دقايق للتأمل :

ده هيساعدك أنك تحدد أهم مهمة عندك وتركز فيها . أوقات كتير بيبقى عندك حاجات كتير تعملها في اليوم ، بس لو صحيت وأنت مشتت نفسك هتفضل كده طول اليوم . التأمل هيديلك الفرصة أنك تنظم نفسك . لو اتأملت 5 دقايق ، عقلك هيبدأ يرتب مهامك . في الآخر ، هتلاقى أن كل حاجة بقت أوضح في راسك وتقدر تحدد ايه أهم مهمة تبدأ بيها .

2- خلى عندك نية للحاجة الى عايز تحققها :

لما يبقى عندك نية وهدف في شغلك هتبقى متحمس أكتر وده هيساعدك أنك تلتزم بيه . وجود نية في بداية يومك أنك هتخلص حاجة محددة هيخليك تحققها . في أقات كتير، في مشاريع بتبقى محتاجة خطوات كتير علشان تكمل وده ممكن يشتت تفكيرك. ورغم كده ، من الناحية العلمية أنت أكيد ممكن تنجز مهمة أو مهمتين في اليوم . علشان كده حدد لنفسك مهام محددة كل يوم ، وخليك متأكد أن مشروعك هيخلص في الوقت المناسب .

3- اقفل الفيسبوك :

لوأنت بتستخدم الفيسبوك في التسويق لشغلك هتحتاج تخصصله وقت محدد ، لكن ممكن تتشغل كمان فى متابعة البوستات والتعليقات وتضيع جزء كبير من يومك . استغل طاقتك في أهم مهمة بالنسبالك بعد كده لما تخلص مهمتك وتحس أن مستوى طاقتك بدأ يقل ده هيكون الوقت المثالى أنك تفتح الفيسبوك مش وأنت في أعلى مستوى نشاطك . إلا لو كان في أسباب استراتيجية هتكون محتاج إنك تنشر في أوقات معينة، ممكن تستعين بأدوات زى buffer و tweetdeck. خصص أكتر وقت أنت نشيط فيه لشغلك لأن الفيسبوك ممكن يستنى .

4- اقفل موبايلك :

اقفل الموبايل والتليفون الأرضى .ممكن متقدرش تعمل كده طول اليوم ، بس لو عملت كده لمدة ساعة واحدة ده هيساعدك إنك تنجز حاجات كتير.المكالمات والرسايل بتزعجك وتعطلك وممكن تحتاج 20 دقيقة علشان ترجع تانى لشغلك وتركيزك .

5- خصص وقت معين :

خصص وقت لمشروع معين . العقل البشرى مش بيشتغل لمدة 8 ساعات متواصلة ، والفرق بنلاحظه بين الى بشتغل بجهد و الى بيشتغل بذكاء وهدف أكتر . العقل بيشتغل من 60 ل 90 دقيقة بتركيز عالى . بعد كده، اخرج شويه ابعد عن المكتب واتمشى ، أواستمتع بمشروب، حتى لو لمدة 5 دقايق بس ،لأن ده هيساعد عقلك يسترجع نشاطه وهيديلك طاقة جديدة.

عن تجربة شخصية لو طبقتوا الخطوات الى فاتت هتندشوا بالحاجات الى هتحققوها ، لو محتاج تنجز وتخصص وقت لنفسك اعمل بالنصايح دى وضاعف إنتاجك.