6 حاجات ماتضيعش وقتك أنك تغيرهم

زى أغلب الناس وبالذات الشباب ، حاجة من أصعب الحاجات الى بتواجهنا هي أزاى نقدر نعيش في سلام مع نفسنا ومنضيعش طاقتنا ، ومن أهم الحاجات الى ممكن تستنفذ الطاقة هي أننا نحاول نغير حاجات عمرها ما هتتغير زى :

1- مش كل الناس هتحبك :

الحقيقة الى ممكن تضايقنا لكن لازم نبقى عارفينها هي أن مش كل الناس هتحبنا ، وده بينطبق علينا كلنا حتى الإنسان المثالى الى معندوش غلطة ولازم كمان أحنا منسعاش أننا نعجب كل الناس لأن ده هيخلينا مش حقيقين وهنبقى مجرد أقنعة ، خليك عارف أنك مش محتاج لشهادة العالم كله عن نفسك .

2- تأنيبك لنفسك مش هيغير حاجة :

إحساسك بالذنب طول الوقت مش هيغير حاجة بالعكس هيعطلك أنك تأخذ خطوة جديدة إيجابية أكتر في حياتك ، بدل من أنك تتبع أسلوب جلد النفس حاول أنك تعترف بغلطك وتتعلم منه .

3- أنت مش هتقدر تغير أي حد :

أي محاولة لتغيير شخص معندوش استعداد ونية أنه يغير معتقداته وسلوكه الغلط هيجيب نتايج عكسية ، ده لأنه دايما هيحاول يدافع عن نفسه بكل الطرق ومش هيسمحلك أنك تنصحه . أحسن طريقة عشان تساعده هو أنك تسيبه زى ما هو وتعرف أن ليه طريقه الخاص بيه لوحده وهيعرف أزاى يتعامل مع حياته بأسلوبه هو أو أنك تساعده بطريقة غير مباشرة .

4- مش هتعيش طول العمر :

أغلبنا دايما عايش في دايرة مغلقة وحياتنا عبارة عن شغل بس ، وبننسى في النص أننا ناخد بالنا من نفسنا أو نرتاح أو نقضى وقت مع الناس الى بنحبها . لازم نبقى مدركين أننا مش هنفضل خالدين في الدنيا . وكل ما قدرنا نستوعب الموضوع ده كل ما هنبطل نستنفذ نفسنا ونحس بتقدير أكتر للحياة .

5- أنت بتتنافس بس مع نفسك :

متحاولش أبدا أنك تقارن نفسك بالناس وتقيس نجاحك بنجاح غيرك لأن بالطريقة دى أنت هتخسر نفسك . لازم تبقى عارف أن أنت مختلف عن أي حد علشان كده مينفعش تتنافس مع حد تانى غير نفسك أو تخلى حياة حد غيرك تشغلك وتقلقك . الحاجة الوحيدة الى تشغلك هي أزاى تخلى كل يوم يبقى إضافة ليك وتبقى شخص أحسن.

6- أنت مسئول عن شعورك :
مفيش أي كلمة من أي حد ممكن يكون ليها تأثير إلا لو أنت سمحت بكده . أحنا منقدرش نتحكم في تفكير أو سلوك الناس ، لكن ممكن نختار أزاى نتحكم في مشاعرنا تجاهها . اتعلم متخليش ردود فعل الناس تأثر عليك وده هيساعدك كتير أنك تحسن من نفسك .