الضغط النفسي في الشغل : كل حاجة وليها حل كمل شغلك
الشغل والحياة العملية، سلاح ذو حدين، الحد الجميل والنجاح والطموح، والحد القاطع من الضغط النفسي في الشغل ومشاكل زمايلك من حسد وغيره وتقليل منك، ومشاكلك مع مديرك، فبيجيلك أوقات بتقرر خلاص تسيب كل حاجة وتقعد في البيت وتكبر دماغك، أو تحول شغل تاني، ولأن كل مكان وليه قلقه وتعبه، فلازم تقلل الضغط النفسي والمشاكل وتتعامل معاهم بهدوء وبحكمه وتكمل حياتك
المبادىء العشرة عشان تقلل الضغط النفسي في شغلك
1- خليك في حالك :
- ملكش دعوة بكلام حد، ولا نقدهم لأن معظمه نقد هدام، أنت ليك شغلك تعمله على أكمل وجه لما تحب تأخد رأي حد خد رأي خبير يفيدك
- قلل كلامك معاهم، ومتسمحش ليهم يعرفوا كل تفاصيل شغلك، عشان هيستغلوا أي حاجة ويغيروا ويعملوا مشاكل
- متدخلش في مشاكل حد وخليك في نفسك عشان ميبقاش ليهم حجة يتدخلوا في حياتك
2- رتب أفكارك :
- الترتيب لأفكارك وحياتك هيخليك مركز على هدفك وشغلك مش مركز على مين بيحسدك أو مين بيغير منك وعايز يأذيك
- جدد أفكارك وطريقة تنفيذها وفكر في التجديد كل فترة عشان تفضل مركز مع نفسك
3- مشاكل الشغل هي شغل :
- متكبرش مشاكل الشغل وتخليها معاك للبيت وتفضل تفكر فيها طول اليوم، الشغل خلص يبقى التفكير فيه خلص ونكمل حياتنا عادي
4- الحرب عادية :
- عادي جداً تلاقي حد بيكرهك وبيحاول يوقعك، الناس بتكره الأقوى منها وبتحارب القوي، فأي محاربه ليك أعتبرها حافز ودليل أنك ناجح
5- الأعذار :
- التمس العذر لمديرك إلي كلمك بطريقة وحشه الصبح، متقولش هو قاصدني قول عنده ضغط ومرتبات شايل همهم
- زميلك إلي مردش عليك عادي مراته مطلعه عينه وقرفان في الشغل مش قاصدك بحاجة
الضغط النفسي في الشغل من علامات النجاح
6- الصراحة :
- اتكلم معاهم بصراحة لما تقلق وتحس التعامل غريب، اسألهم فيه عندكم مشكلة معايا؟ مش يمكن أنت منقص شغلك أو عملت حاجة بدون قصد ولو قالوا لا مفيش حاجة يبقى عادي اتعامل عادي بمبدأ الأعذار
- كلم رئيسك في الشغل واسأله لو حاسس بمعاملة غريبة منه تعمل أيه عشان تطور من نفسك، ولو المشاكل من زمايلك زادت تقدر تكلمه وهو يهدي الموضوع
7- الإحسان قصاد ألإساءة :
- قابل كل معاملتهم مهما كانت سيئة بالأحسن منها، مش عشانهم عشان نفسك، تغافل وتناسى وأغفر، وعدي ليهم وساعدهم، قولهم بتنجز الشغل أزاي، بتعمل أفكارك أزاي، أطمن عليهم وكلمهم بطريقة كويسة
8- بعض التغير مطلوب :
- مش عيب أنك تغير من نفسك، لو أنت شخص متباهي بشغلك ومبتمدحش حد، بطل تباهي وأمدح في صحابك، لو بتروح متأخر وبتتعامل بعصبيه، غير الطبع دا، لو هما مركزين على صفة فيك ومضيقاهم ممكن تكون كسل قلل منها، ولو مفيش حل وأنت تعبت من التصرفات دي ممكن تغير فرع شغلك لفرع تاني بس أفتكر أن كل مكان وفيه مشاكله، وممكن تقرا المقال دا عشان تعرف تزود دخلك وأنت في شغلك ازاى توجد مصدر جديد للدخل؟
9- المقارنة :
- أوعي تدخل نفسك في دائرة المقارنات، سواء هتقارن نفسك بزميلك الأحسن منك، أو تسمح لحد أنه يقارن نفسك بيه، خليك دائماً في خانه الأمان كل شخص مميز في شغله بطريقته، محدش شبه التاني
10- الغيران هو الخسران :
- حد بيضايقك بيغير منك وبيعملك مشاكل، أنت مركز في شغلك وناجح مين فيكوا الخسران هو، تفكيره الزيادة فيك هيخليه يبطل يتقدم وينجح وهيتعبه، فليه تفكر فيه وتشغل بالك بيه
شاركوا بأيه الضغط النفسي إلي بيحصلك في شغلك واتعاملت معاه أزاي؟
