تأثير البلاسيبو: معناه وبيعمل إيه؟

البلاسيبو في الأول خالص، يعني الحاجة اللي تبان كعلاج او دوا، بس هي في الحقيقة مش كده.
وكلمة Placebo لاتينية معناها “I will please”  او بالفُصحى؛ سأُدخل السرور.

تأثير البلاسيبو

معناه كبير شوية؛ هو الشعور الايجابي الناتج عن جرعة الدوا الفارغة اللي هي البلاسيبو.

معلش، تعالى نبسط.

تخيل كده لو جبنا خمس أشخاص في غرفة، وعندهم صداع، وادينالهم حباية حمرا مثلًا وقلنالهم انها علاج سحري للصداع. تلات حبات هما فعلًا مسكنات ألم، وفي حبايتين عبارة عن سكر.
الخمسة هيقولوا ان الصداع راح.

طب ازاي، ده في اتنين واخدين حباية “فستك” يبقى دول خفّوا ازاي؟
هو ده تأثير البلاسيبو اللي بيقولوا عليه. والإجابة هنا انهم خفوا بالإيحاء. وتأثير البلاسيبو ده بيحصل لواحد من كل 3 أشخاص، ودي نسبة مش قليلة ابدًا.

يعني لما يجيلك دكتور طول بعرض كده ويديلك حباية ويقولك دي هتعالج المشكلة اللي عندك تمامًا. هتاخدها وتلاقي نفسك خفيت.
طب استنى، ده انا شفت في فيلم عربي قديم قبل كده ان اول ما بياخد الدوا ويتسأل: “بقيت أحسن؟” بيجاوب بـ أيوه بقيت احسن.  هو الدوا لحق؟

البلاسيبو برضو.

طب تعالى نتكلم في موضوع تسكين الالم، علشان ده اكتر حاجة شائع استخدام البلاسيبو فيها.

لو قلنا ببساطة ان الشخص فعلًا صدق انه هيخف من الألم بمساعدة الحباية، جسمه هيفرز الإندورفين، ودي حاجة عجب كده، المماثل الطبيعي للمورفين. المورفين اللي هو مُسكن ومُخدر برضو.
يبقى مش مهم الحباية تبقى فاضية، طالما كده كده الجسم هيفرز ده.

طب معلش، طالما الموضوع خدعة يعني، الدكاترة بيستخدموه ليه؟ مش حرام عليهم؟

لأ تعالى نتكلم في النقطة دي علشان فعلًا استخدام البلاسيبو مُفيد

أبسط حاجة، انت عارف اننا كمصريين بنسيء إستخدام المضاد الحيوي. أى حد عنده اى حاجة بتلاقيه راح اشترى شريطين مضاد حيوي وبلعهم. مع انه مالوش علاقة وهيدمر مناعة الجسم تجاه امراض تانية كان ممكن يحاربها بسهولة..
يبقى نعمل ايه؟
نديله بلاسيبو.

بنجرب دوا جديد، بيساعد في كذا وكذا، وعندنا عينة من الناس اللي هنجرب معاهم مفعول الدوا واعراضه الجانبية.
يبقى نوزع حبوب او جرعات للدوا بتاعنا، وحاجات تانية بلاسيبو (حبوب فارغة او فيها سُكر او محلول ملح او أى حاجة يعني) ونشوف ردود الفعل.

الموضوع ده مُثير علشان احيانًا في ناس اخدت البلاسيبو وقالت ايه ده انا خفيت وبقيت كويس وصحتى زى البومب (بيقولوا كده في الأفلام) بينما اللي اخدوا الدوا الحقيقي لسه بيشتكوا!

يبقى الدوا مش فعال يا معلم، إذا كان اللي خد حباية سكر بقى كويس بالإيحاء.
طب استنى، تعالى نقيس الأعراض الجانبية، ده في ناس بتشتكي من صداع وسخونة ووجع بطن…
آه، بس الناس دي خدت دوا حقيقي ولا حباية فاضية؟

النوسيبو Nocebo:

معناها أعراض جانبية او ردود فعل وحشة بتيجي للبني آدم من حباية فاضية، بالإيحاء برضو. كله بالإيحاء بيفُك.
يعني كده لما تقول لحد “الحباية دي هتخليك تمام وزى الفل” بيخف، ولما تقوله “ممكن تجيبلك شوية صداع او اسهال” بيجيله.

لأ طب تعالى نقول بقى ان في دراسة كاملة على مرضى اخدوا بلاسيبو علشان اعراض اكتئاب وبقوا كويسين!

طب تعالى نقول حاجة كمان مُثيرة للإهتمام؟

في دراسة هنا بتقولك ان لو عملت تجربة على مسكنات ألم، والدوا الحقيقي جاب نتايج اكبر من البلاسيبو، ده مش معناه انه فعال وقوي.. لأنك لو اديت نفس الدوا لناس تانية عندها صداع، ومش قايلها ان ده مسكن ألم.. مش بيخفوا من الصداع!

لو حاسس ان دماغك لفت وبقيت تشك في الأدوية، فخليك فاكر ان في نصب كامل قايم على حاجات زى الوخز بالإبر وبخار المش عارف ايه، والكلام ده بيعمل مليارات سنويًا، وكله بالإيحاء.

بصة أشمل على إزاي التأثيرين بيشتغلوا

ونكمل على ده بجزئية كمان، وهي ان الـPlacebo والـNocebo، الاتنين معتمدين على حاجة اسمها ..

تأثير التوقُع.

تعالى دي مثال ونقول ان لو شخص عنده مستوى توتر وقلق عاليين، ومستنى ان الحباية السحرية تساعده، وواثق في الدكتور، وعنده شعور إيجابي تجاه الدوا.. كل ده ساهم في ان جسمه يقلل مستوى الهرمونات اللي بتسبب القلق.

بس دي نتيجة قصيرة الأمد، لإن السبب نفسه متعالجش. لو سبب القلق عضوي مثلًا وعنده اضطراب هرموني، فالبلاسيبو معالجش ده.
بس في حالة مُعينة هنا، البلاسيبو جاب فيها نتيجة عكسية، ومجابش اى نتيجة خالص!

دي كانت حالة ألزهايمر اتسجلت، وتم اختبار البلاسيبو عليهم، والمرضى اشتكوا ان مفيش نتيجة حصلت. ايه ده طب ازاي؟
لكذا سبب، زى ان المريض نسي انه اخد مسكن ألم، او نسي تأثير مسكنات الألم الحقيقية عليه، او نسي هو كان قلقان ليه.. دي محتاجة انك تقرا مقالة مرض الزهايمر.

تأثير الشرط.

ودي حالة مُثيرة للإهتمام، في دراسة كده جابوا مجموعة من الأشخاص وقسموهم مجموعتين.
مجموعة اخدت مسكن ألم حقيقي، ومجموعة خدت حبوب بلاسيبو فاضية… وبعدها بكام يوم، المجموعتين كلهم اخدوا حبوب بلاسيبو مشابه بالظبط للي اخدوها قبل كده.

وهنا المُفاجأة.

اللي اخدوا الدوا الحقيقي المرة اللي فاتت، والمرة دي اخدوا بلاسيبو، كان عندهم قدرة تحمل أكبر تجاه الألم، مُقارنة باللي اخدوا بلاسيبو في المرتين.

ليه؟
علشان الموضوع ارتبط في دماغهم بالشرط ده، الحباية دي، بلونها وشكلها دول، خلوني مسترخي ومبسوط وخففت ألمي المرة اللي فاتت، فالمرة دي، التوقعات زادت، والبلاسيبو اللي شبه الدوا بالظبط.. جاب نتيجة أعلى.

مش مؤامرة ولا حاجة

لما دكتور بيدي حقنة محلول ملحي لحد عنده عرض مُعين، بيبقى عارف ان الحالة مش مستحملة دوا حقيقي. زى مثلًا ان حد مر بعمليات جراحية كتيرة، وعنده ألم في مناطق عديدة من جسمه، وبالفعل مر بجرعات مهولة من البنج، فصعب ياخد مخدر تاني.. ياخد بلاسيبو.

وعمومًا، ففي البلاسيبو، الحقن بتجيب مفعول أسرع من الحبوب او الدوا الُشرب.

وفي حاجات كتير، لما بتاخد روشتة من دكتور وتروح تصرفها من الصيدلية، لو اللي واقف فيها صيدلي فعلًا وعارف ان في حاجة من الروشتة بلاسيبو، بيصرفه ويأكد على النتيجة المرغوبة، علشان الثقة في الدكتور من ناحية، وعلشان هو عارف ان الدكتور كشف عليك وعرف تاريخك وأعراضك وبالتالي قرر ان ده مناسب ليك من ناحية تانية.

ده غير ان مفيش حاجة بلاسيبو 100% ولازم يبقى في نسبة معينة من الدوا الحقيقي، وده معناه سعر أقل للدوا، وطالما ده هيجيب نفس النتيجة من الدوا الحقيقي.. يبقى ليه لأ؟

مش استخسار ولا حاجة، بس في حالات مُعينة مش هينفع يتصرف فيها مضاد حيوي زى ما قلنا مثلًا، وحاجات تانية الأعراض اللي فيها مش مستاهلة دوا حقيقي تمامًا وتمنه غالي، يبقى ليه المريض يتكلف فوق طاقته طالما النتيجة هتبقى واحدة؟

وعلشان الأمانة العلمية، لازم هنا نوضح ان مش علشان الدوا أرخص من اللي متعود عليه يبقى بلاسيبو. لأ.
في حاجة اسمها Generic Drugs، وفيها بتبقى نسخة من الأدوية المشهورة، بنفس المادة الفعالة والتأثير والاعراض الجانبية.. بس مالهاش نفس العلامة التجارية، او اسمها مختلف. يعني بديل أرخص مع انه طبق الأصل الدوا اللي اسمه مشهور.

ودي متنفعش تبقى بلاسيبو لأن نسبة المادة الفعالة متحددة قانونًا والمفروض ميتلعبش فيها.
ده غير ان في أعراض معينة مستحيل يكون البلاسيبو هو اللي عالجها، زى ان مستحيل مثلًا البلاسيبو يوقف نزيف، لإن اللي جايلك وبينزف فعلًا مينفعش تقوله لأ متهيألك، ولا هياخد حاجة هتهيأله ان النزيف وقف.