الكسل الشتوي: أسبابه وعلاجه عشان تكسر القوقعة وترجع النشاط

عندك شعور دائم بالبيات الشتوي وكل إلي عايزه أنك تأخد لحافك بالحضن وتنام طول اليوم، كل ما تحاول تبذل مجهود أو تقوم ترجع تاني تقول لأ هنام شوية والنوم دا يكمل لباقي اليوم، دي أعراض الكسل الشتوي إلي بتحولنا كلنا لكائن  السلحفاة  لما تقفل على نفسها وتتقوقع وتنام.. الوضع حلو جداً مقدرش أنكر والدفا حلو بس لأن عندك شغل وحياتك واقفه بسبب بياتك الشتوي يبقى لازم نكسر القوقعة ..

أسباب الكسل الشتوي :

1- التغيرات المناخية : عدد ساعات النهار بتقل والليل بيزيد والجو بارد والمطر ورعد وبرق، ودا بيخلي أحتمالية خروجك من البيت في الوقت دا صعبه لأنك بتحسب هتبهدل أد أيه وهيجيلك كام نوع برد لما ترجع من برا، فبتكسل تخرج وبتقرر تأخد لحافك بالحضن وتنام

2- ضوء الشمس: ولأن ضوء الشمس بيختفي بسرعة فالشتا وأنت مبتلحقش تتعرض ليه هيبقى عندك  خلل فى مستوى هرمون الميلاتوبين ودا المسؤول عن تظبيط ساعة جسمك البيولوجية وساعات نومك ونشاطك ودا كله بيخليك مش متظبط وعندك أرق ممكن تقرأ المقال دي عن أسباب الأرق الأرق النفسي: ما ينام الليل إلا خالي البال

3- الحالة العامة : كل ما تتصل بحد تقوله يلا نخرج، يقولك أحنا في الشتا يا عم مش شايف الجو عامل أزاي، طيب تعالى عندي عايز أشوفك، منا بقولك لا الجو وحش، طيب أعزمني عندك، العيلة كلها عندها برد، حتى الأفلام هتلاقيها كلها عن الشتا والمطر والحب تحت المطر، فبتقول لنفسك ما زي زيهم وأقعد واتغطى ماله اللحاف

4- الأمراض : طبيعي البرد والسخونية والأذن الوسطى وفيروسات أنت مش فاهم اسمها هتلاقيها بتهاجمك في الشتا وطبيعي هتخليك تنام في السرير بتاع يومين ثلاثة أسبوع

عشان تكسر قوقعة الكسل الشتوي :

1- الرياضة : رياضة  لمدة نص ساعة، مشي، نط حبل وطلوع سلم أو أرقص زومبا هتدي لجسمك طاقة وهتدفيه بما فيه الكفاية عشان يقدر يعمل كل شغله وخروجاته باقي اليوم

2- فيتامين  د: حاول تخرج قبل الظهر من 7 ل 10 فترة الشمس الجميلة المفيدة كلها فيتامين D هيساعدك على النشاط باقي اليوم

3- النوم : نام بليل مدة كافية من 6 ل 8 ساعات أكثر من كدا جسمك هيجيله خمول

4- شغل الأنوار : الصبح جه أفتح كل الشبابيك والنور ودخل الشمس البيت، عشان تحسسك بالنشاط فيه تغير في اليوم أحنا الصبح كل ما هتقلل الأضاءه كل ما هتنام أبدأ قللها بليل عشان تنام بدري

5-النظام الغذائي : بلاش تأكل كثير بليل ووزع وجباتك وكثر من الخضار والفاكهة والألياف

مشروبات الطاقة : عصير الأناناس الطبيعى، عصير البرتقال البلدى،  لبن  بالعسل الطبيعى كل يوم  على الريق.عصير الليمون المغلى أقرأ عن الأكل الصحي يخلصك من الإكتئاب ويديك طاقة ممكن تقرأ دي 7 أطعمة تخلصك من الاكتئاب و القلق و التوتر

6- الموسيقى : متسمعش موسيقى هادية في النهار دي بليل وبس، نوع الموسيقى وهدوئها بيرخي الأعصاب وهتخليك حاسس أنك عايز تنام

7- الهوايات : مارس أي هواية بتحبها، أكتب، ارسم غني حتى لو صوتك وحش المهم تخرج الطاقة السلبيه إلي هتخليك تنام وتحس بالإنتعاش

8- الصحاب : دور على صحابك إلي بيحاولوا يكسروا القوقعة زيك وأخرجوا أي خروجه حتى لو هتلعبوا بالتلج في الشارع

9-بلاش وقت الفراغ : أي وقت فراغ هيقولك طب ما تنام، لا عندك وقت فراغ، أقرا، رتب بيتك، أقعد مع أهلك، أنزل نشاط تطوعي، المهم، أقتل فراغك إزاي تحول ساعة الفراغ لـ ساعة الحظ؟

لو عندك كسل شتوي جرب الخطوات دي وقولولنا رأيك ولو عندك خطوة جديدة لكسر الكسل؟