نأسف على الدخول الكوميدي شوية في العنوان، لكن بصراحة العلاج المعرفي السلوكي فعلاً هدفه الأول والأخير -وباين من إسمه- إنه يساعدك على تغيير إزاي بتفكر (معرفي) و وازاي وليه بتتصرف (سلوكي) النهاردة.

التغييرات دي ممكن جداً تساعدك إنك تشعر بشكل أفضل بدون الدخول في سكة العلاجات النفسية التانيـة. وده مش بيقلل من قيمتهـا وإنمـا الفكرة هنا في حاجة:

المرض النفسي ليه زاويتين حاجة حصلت قبل كدة وتأثير الحاجة دي على حياتك اليومية. العلاج المعرفي السلوكي هدفه الأساسي إنه يعالج تأثير الحاجة دي على حياتك اليومية بغض النظر عن إيه اللي حصل زمان.

هل ده معناه إن العلاج المعرفي السلوكي مابيخشش في تفاصيل زمـان زي أنواع العلاج النفسية التانية؟

لا طبعاً .. بيخش في التفاصيل القديمة خاصة لما يلاقيهـا مأثرة على حياتك اليومية إنما هو بدل ما بيركز على أسباب المحنة بتاعتك وأعراضها في الماضي طول فترة العلاج.. بيركز على تحسين حالتك الذهنية دلوقتي وعلاج تصرفاتك المتأثرة بالصدمة دي. بس الفكرة إن العلاج السلوكي بيحاول يبقى عملي عن طريق إنه يبقى “سريع” و “مؤثر”.

العلاج المعرفي السلوكي أثبت قدرته (بالدليل والإحصائات) على المساعدة في:

• القلق
• الاكتئاب
• نوبات الذعر
• رهاب الخلاء و الرهابات الأخرى
• الرهاب الاجتماعي
• الشره المرضي
• اضطراب الوسواس القهري
• الاضطراب النفسي ما بعد الصدمة
• الفصام

إزاي العلاج المعرفي السلوكي بيشتغل؟

بيساعدك على فهم المشاكل المسيطرة عليك عن طريق تقسيمها لـ أجزاء صغيرة، وده بيسهل عليك إنك تعي وتشوف إزاي الحاجات دي بتتواصل مع بعضها عشان تعملك مشكلة وكمان بيساعدك تشوف تأثير الحاجات دي عليك إيه.

يقوم يقسم المشكلة اللي عندك لـ خمس أقسام كل الأقسام دي بتؤثر على بعضها:

1. الموقـف الفلاني اللي بتمر / مريت بيه
2. الأفكار الـ بتيجي فـ دماغك لما بتمر بالموقف ده
3. الأحاسيس اللي بتحس بيها لما الأفكار دي بتيجي فـ دماغك
4. المشاعر الجسدية اللي بتجيلك نتيجة 2 و3
5. الأفعال اللي إنت بتقوم بيها بناءاً على 2 و3 ويمكن 4

خلينا ناخد مثال للكلام ده كمحاولة لشرح الموضوع.

الموقف: روحت قعدت عالقهوة شوية وبتلعب في الموبايل وإنت قاعد عدى من جنبك واحد يعرفك وتعرفه (ومافيش بينكو أي عداوة أو حاجة) وجت عينك في عينه ومشي من غير لا سلام ولا كلام.

الأفكار الإيجابية: مشافنيش كويس،  باله مشغول
الأفكار السلبية: مابيحبنيش عشان موقف أنا عملته قبل كدة “وتقعد تدور على أي حجة تثبت صحة الفكرة السلبية دي”

الأحاسيس الإيجابية: مهتم وعندك فضول ليه الشخص ده ماسلمش عليك، ممكن كمان تحس إنك قلقت عليه يمكن في حاجة مهمة شاغله باله مخليه سرحان، وهكذا..
الأحاسيس السلبية: إحساس بالرفض والتجاهل، إحساس بالحزن و / أو الذهول، الخ..

المشاعر الجسدية الإيجابية: ولا أي تأثير خالص. زي ما جه زي ما مشي.
المشاعر الجسدية السلبية: مغض حتى لو بسيط، هبوط حتى لو خفيف، الخ..

الفعــل الإيجابي: تحاول تلحقه تسلم عليه .. أو يمكن تتصل بيه عالموبايل تطمن عليه
الفعــل السلبي: تتجنبه، تلومه إنه شافك وماسلمش عليك، الخ..

لو خدت بالك في المثال إن نفس الموقف أدى الى نتيجتين مختلفتين معتمد فـ ده على طريقة تفكيرك وشعورك وفعلك.

العلاج المعرفي السلوكي هدفه إنه يمشي مع التفكير السلبي (اللي بالأحمر ده) في الحلقة المفرغة دي اللي ممكن تخلي الشخص يحس إحساس مش لطيف وممكن تخليه يعتقد بحاجات غير واقعية في نفسه وتأثر على ثقته بنفسه وتزود عنده حالة القلق اللي بيعيشهـا ويخليها تتفاقم.

دور العلاج المعرفي السلوكي أنه يساعد الشخص إنه يكسر الحلقة المفرغة دي ويفصل التفكير المشوش والمشاعر والسلوك اللي بيترتب على التفكير المشوش ده. لأن لما الدنيا دي بتتفرد قدامك بتسلسل واضح ساعتها بس تقدر تبص للمواقف بشكل مختلف وتتعامل معاها بحيادية ومن غير اندفاع وتسرع في الحكم السلبي عليها.

اللي بيحصل في جلسات العلاج السلوكي إن المعالج النفسي بيمشي مع الشخص في المراحل الخمسة بعد بناء علاقة قوية معاه.. وعلاقة قوية هنا معناها إنه يفهم المريض كويس .. ويقيم كلامه .. لأن المريض نفسه تعبيره عن الموقف ممكن يبقى مغلوط.. ورؤيته للظروف ممكن تبقى مشوشة، وبالتالي شرحهـا للدكتور بيطلع بنفس الصيغ. من الآخر دول المعالج إنه يفهم اللي المريض بيقوله واللي ما بيقولوش.

وارد يبقى في أحاسيس مدفونة جوا البني آدم .. هو شخصياً بيتكسف أو بيخاف يقولهـا بينه وبين نفسه،، فما بالك شخص تاني. وارد يبقى في أحاسيس كتير هو المريض نفسه مش عارف يوصفهـا وبالتالي مش عارف يقولهـا.

هنـا بييجي دور المُعالج وخبرته.

معلومات سريعة عن العلاج المعرفي السلوكي

• ممكن تستمر فترات العلاج والجلسات من 6 أسابيع الى 6 أشهر و ده بيعتمد بشكل كبير على نوع المشكلة و مدى استجابة المريض للعلاج
• العلاج المعرفي السلوكي بيساعد على التحكم بأعراض الأمراض أكتر منه بيكلم المرض نفسه لكن بما إن مشكلة المرض النفسي والعضوي في أعراضهم ومضاعفات الأعراض دي.. يبقى علاج.
• بناءًا على الدراسات الكتير الـعلاج المعرفي من أكثر العلاجات فعالية لحالات القلق أو الاكتئاب وبعض اضطرابات الشخصية
• العلاج المعرفي السلوكي مش لكل الناس لأن في أنواع تانية من العلاج النفسي بتناسب كل حاجة
• كتير من الدكاترة بيكتبوا أدوية مختلفة حسب كل حاجة بتمشي مع فترات العلاج السلوكي عشان يحسنوا استجابة المريض للعلاج النفسي زي حالات الاكتئاب الشديد مثلاً