ماذا لو أن الدين تم اختراعه أصلًا كعلاج نفسي للإنسان؟

خلينا نتكلم بصراحة شوية ونقول إن التدين بالنسبة لناس كتير مش أسهل حاجة! الصلاة والصوم والعبادات وغيرها.. العيد بعد رمضان أكبر دليل على كدة.. ناس تبقى زعلانة إن رمضان خلص.. وناس مبسوطة إنه خلص.. سواء عشان قدرت تخلصه كويس أو عشان مخلصتوش كويس فعايزة ضميرها يبطل يأنبها.

العبادات كتير بيعملوها عشان مطلوبين منهم (ده لو عملوهم أصلاً) مش عشان حاجة بيحبوها.. يبقى إزاي الدين حل لأي حاجة؟ وإزاي يبقى الدين اتعمل عشان الإنسان يبقى أحسن؟ والناس مغصوبة عليه من أهلها أو من نفسها عشان متخشش النار؟

كل دي أسئلة ممكن نكون بنسألها لنفسنا وبنلوم نفسنا إننا بنسألها.. بس..

مـاذا لو إن الدين إختياري مـش إجباري؟

ما يمكن الدين هو أول كتاب CBT اتعمل عشان الإنسان يعرف يعيش في سلام ويعرف يتعامل مع ضغوطات الحياة لكن إحنا بس اللي مقريناهوش صح.. أو ماسمعناهوش من ناس صح.. أو في وقت صح.

تنويـه: المقال مش ديني خالص! أنا قليل الأدب في معظم الحاجات اللي بكتبها أصلاً لكن أنا مقتنع إننا نقدر ناخد من الدين اللي ممكن يساعدنا في حياتنا.. تتدين بقى ماتتدينش .. دي حاجة ترجعلك ومش موضوعنا.

إيه المشكلة لما آجي أقولك إن في حلول نفسية ومادية ومعنوية للمشكلات اللي بتمر بيها؟ وفي بالفعل أجوبة على أسئلة كتير ممكن تكون بتسألها لنفسك كل يوم؟ يبقى إيه المانع إننا نستكشف ده مع بعض؟

من وجهة نظري إننا بنواجه 3 مشاكل مع الدين.. وهم:

مشكلة الثواب

إن الإنسان عايز يشوف ثواب لحظي.

إحنا مش عارفين نفكر في الجنة إنها ثواب لحظي مش ثواب مستقبلي بس.

يعني بمعنى إن إنت مش بتعمل 1 و2 و3 عشان تنجح في الآخر

إنت بتعمل 1 و2 و3 عشان بتحب تعملهم.

وده الفرق بين واحد تخين* اكتشف إنه بيحب رياضة معينة وبدأ يعملها وبين واحد تخين برضه قرر يعمل رياضة عشان يبقى جسمه حلو.. مين في دول فرصته إنه يلتزم في التمرين أكبر؟

* آه لازم يبقى تخين عشان يبقى في تحدي كبير اللي هو زي الدنيا كدة

مشكلة الجنة

بسم الله الرحمن الرحيم كدة .. ماحدش عنده تصور كامل للجنة.

عندنا شوية معلومات في القرآن والسنة آه.. لكن بالظبط بالظبط إيه اللي يبحصل؟ وحتى لو الجنة حلوة .. طيب مش هانزهق؟ طب مع احترامي لحور العين، اللي بيحب مراته يعمل إيه؟ وبننسى الحاجات الوحشة اللي حصل في حياتنا إزاي؟ طب لو نسيناها هانفتكر الحلو عادي؟ طب لو افتكرناه.. هانحس بيه ونقدره إزاي وإحنا مانعرفش الوحش أصلاً؟ ويعني إيه نبيذ مابيسكرش؟طب لو مابيسكرش الناس هانشربه ليه؟

كلنـا بلا استثناء عندنا أسئلة عن الجنة!

لكن برضه الجنة صعب تتوصف بالظبط.

لأ مش صعب تتوصف من حلاوتها لأ (ولو إن المنطقي إنها تبقى حلوة) 😊

إنما هي صعب تتوصف لأنها مالهاش مثيل إنت شوفته بعينك.

كأني بقولك ريحتها أزرق وطعمها أخضر. وإنت ماعندكش reference أصلا عن ريحة الأزرق وطعم اللون الأخضر.. يعني باختصار كدة مواصفات الجنة إنت ماتقدرش تقارنها بحاجة إنت تعرفها في الدنيا.. فمهما إتوصفتلك مش هاتعرف تتخيلها بنسبة 100%.

كل التشبيهات والوصف اللي وصلنا كان تقريب للحاجات اللي نعرفها في الدنيا فنقدر نكون صورة مبدئية عن حلاوتها لكن مش عنها هي شخصيًا.

زي النار كدة.. عندنا أمثلة عن النـار موجودة عندنا هنا.. وأعتقد مافيش ماتلسعش من نار بوتاجاز ولا ولاعة ولا أي حاجة سخنة. فعندنا أمثلة “تقربلنا عذاب النار” ممكن يبقى عنيف إزاي.

نفس الكلام عن الجنة .. كلها تشبيهات نقدر نفهمها لكن المنطق بيقول إنها أعظم وأحلى من كدة بكتير. الجنة مش لازم تكون ثواب مستقبلي بس .. إنما ممكن تكون كمان إحساس دنيوي نابع من الإيمان بيها.

وأخيرًا مشكلة السعادة؟

وهل المفروض تعيش سعيد في الدنيا.. لا مش المفروض. يعني وارد آه .. لكن مش لازم.

ربنا قال: لَقَدْ خَلَقْنَا الْإِنْسَانَ فِي كَبَدٍ {البلد:4}

واحد من تفسيرات الآية دي إن الإنسان خُلق أصلاً في مشقة.

وَنَبْلُوكُمْ بِالشَّرِّ وَالْخَيْرِ فِتْنَةً وَإِلَيْنَا تُرْجَعُونَ {الأنبياء:35}

يعني الدنيا عبار عن شوية كدة وشوية كدة، وعمرها مكانت معمولة إنها تبقى زبادي في الخلاط وجنة عالأرض.

يعني ببساطة لو إن الجنـة (وده مثال مش أكتر) عبارة عن مكان مجرد من كل حاجة وحشة شوفناها في الدنيا.. فـ ده في حد ذاته شيئ جميل جدًا وهدف واضح لحياتنا.

يعني كمان من مميزات المشقة اللي عايشها ناس كتير، إنهم مشتاقين للجنة أكتر من الناس اللي حياتهم جنة عالأرض.

طيب والناس اللي حياتهم عالأرض جنة؟ هانتكلم عليهم كمان شوية دول .. ما تقلقش 😀

يعني العادي ان الدنيا ماتبقاش سهلة.. ولو هي سهلة وسالكة فـ حسابك في الآخرة هايبقى مختلف.

كمـان.. فكرة إن الدنيا جزء من رحلة وفي حاجة إسمها آخرة .. هي فكرة مريحة للإنسان أصلاً.. لإن ده بيحط الدنيا في حجمها الحقيقي اللي هو صغير جدًا وإن الحياة الحالية هي مجرد نقطة في خط الأبدية.

المشكلة الحقيقية إننا مقتنعين بالكلام ده نظريًا مش عمليًا

والنتيجة إننا مش متحمسين للجنة لإن كتير مننا ماعندوش أي تصور قوي أو اقتناع تـام ازاي الجنة هاتبقى أحسن مليون مرة من الدنيا.. لكن عندنا تخيل قوي عن الدنيا لما تبقى حلوة هاتبقى عاملة إزاي.

فكرة إننا عايشين في الدنيا بنحاول نوصل للسعادة برضه في الدنيا .. دي أصلاً فكرة غلط لأن أولا حياتك مش دنيا بس.. ثانيًا البحث عن السعادة هي عملية في حد ذاتها تعيسة جدًا!

الفيلسوف “إريك هو”،  وده مش شيخ، ده فيلسوف أمريكاني مُلحد.. بيقول:

The search for happiness is one of the chief sources of unhappiness

إن البحث عن السعـادة من أهم مصادر البؤس

عشان ببساطة إحنا بنأجل الفرحة لحد ما حاجة معينة عايزينها تحصل وبننسى ننبسط بالحـاجة اللي في إيدنا… في حين ان الحكماء والفلاسفة على مر التاريخ نشف ريقهم عشان يقولولنا عيشوا اليوم، عيشوا اللحظة، كفاية يا بابا انتظار لأي حاجة حلوة أو وحشة. إنبسط باللي فـ إيدك يابني.. وهكذا..

شبه إيه دي؟ أيوا سامعك ياللي ورا .. على صوتك!! .. إجابتك صح متخافش..

أيوا؟!

الرضـاااا!

برافو! السعادة في الرضا.

الدين عنده إجابات أسرع من العلاج النفسي

العلاج النفسي مش بيديك إجابات مباشرة لأنه مالوش مصداقية عندك وده طبيعي.. فـ بيحتاج دايمًا يخليك تطلع الإجابات من عندك جوا فتقتنع بيها أكتر.. ويفضل يأكد عليها كل شوية.. وده تكنيك مُثبت علميًا في الـ CBT كدة.. تكنيك بيأدي غرضه أنا مش بغلط فيه..

إنما الدين برضه واخد أسلوب مختلف شوية يكاد يكون أسرع بكتير (ده لو عندك الأساسيات بتاعته يعني) وهو إنه الدين فعلًا عنده إجابات لكتييير من الأسئلة الـbasic اللي ممكن تعمل مشاكل نفسية اللي من عينة.. أنا عايش ليه؟ دوري إيه؟ إيه الصح وإيه الغلط؟ إيه اللي المفروض أعمله في موقف زي ده؟ .. وغيرها من الإجابات اللي في رأيي ممكن تقلل بشكل كبير جدًا مشاكل زي الـOverthinking .. اللي هو هو بيوصلنا للـ negative thoughts اللي هي هي بتودينا لحاجات زي الـAnxiety وغيرها من المشاكل النفسية التانية..

ما يمكن الدين أصلاً أصلاً .. ما هو إلا كتالوج Manual بيقولنا إزاي نتعامل مع الدنيا عشان نعيشها في سلام نفسي على قد ما نقدر .. فـ لما نستخدم الكتالوج ده نعرف نستخدم الدنيا بكل صعوباتها وتحدياتها .. مش هي اللي تستخدمنا وتودينا وتجيبنا..

وبعد ما الدين إداك الكتالوج اللي تعرف تعيش بيه في الدنيا.. قالك إيه كمان؟ إن الدنيا أصلا نقطة في بحر رحلة كبيرة .. فحتى لو الدنيا صعبة جدًا عليك دلوقتي فهي في الأول والآخر مرحلة مؤقتة أصلاً.

كلام صعب ونظري لناس كتير زي الكيميا كدة .. ممكن تحفظها وتقفل المادة بتاعتها لكن عمرك ماحطيت مثلًا شوية صوديوم في مياه شوفت بيعملوا إيه.. وحياة أمك ماتجربهاش عشان القصة دي ممكن تعمل إنفجار.. مش حصة كيميا هي.

 وأعتقد هو ده الإيمان.. اللي لما توصله هاتحس لوحدك إن الكلام مش نظري خالص.. هاتحس بيه في هدوءك وصبرك وتغير شخصيتك للأحسن والأهدى.

أسئلة أو حيرة ممكن تضايقنا وتعينا وتمرضنا أو عالأقل عدم الإجابة الصح عليها ممكن تودينا في طريق مش مناسب لينا ولشخصيتنا

أنا شغلي مُهم؟ دراستي مُهمة؟ طالما مش حرام يبقوا مُهمين جدًا جدًا طبعًا

انا مش لاقي شغل! اتعلم حاجات أكتر + ربك بيرزق. ضيق الرزق ثوابه كبير

أيوا أعمل إيه دلوقتي؟ غالبًا انت جربت كل حاجة تعرف تعملها.. فاضل تقتصد وتصبر.

أنا إيه أهميتي؟ اللي بعمله ده ليه لازمة ولا لأ؟ بتعمر الأرض؟ بترزق حد معاك؟ بتتصدق؟ بتساعد الناس تبقى أحسن؟ بتنشر علم؟ وغيرها وغيرها من الحاجات اللي تخلي أي حاجة بتعملها أكيد أكيد ليها أهمية مهما كانت!

مين المفروض يبقى مثالي الأعلى مُغنـي مشهور ولا دكتور جامعة؟ مين بينفع الناس أكتر؟ أكيد دكتور الجامعة..

بس التاني معاه فلوس أكتر ومبسوط أكتر! .. ماشي وفي دكاترة جامعة معاهم فلوس على فكرة.. وفي مغنيين صوتهم حلو وبيشحتوا.. اللي بيبان كتير بس هو اللي إنت بتشوفوه. بس ما علينا .. يمكن الدكتور مش معاه فلوس زي المغني بس عالأقل ماخسرش نفسه..

عندي اكتئاب من موضوع فلسطين؟ مبروك إنت بني آدم.. بس لا يكلف الله إلا وسعها.. وسعي إيه؟ شير، قاطع، اتبرع، إدعي. في حاجة تانية؟ ماعتقدش.. طب وإحساس قلة الحيلة؟ عندنا كلنا وطبيعي يبقى عندك.

أتعامل إزاي مع الناس؟ إنفعهم ماتضرهمش ولو حد جيه عليك خُد حقك. ربنا بيقولك خد حقك (وخد بالك تاخد حقك ده مش معناه تنتقم)

القرف اللي في حياتي أتعامل معاه إزاي؟ أصبر

أصبر لحد إمتى أنا تعبت! لحد ما ربنا يفرجها أو ممكن مايفرجهاش عشان كله بيزود رصيد حسناتك

شوف الحديث الجميل ده: “مَا يُصِيبُ الْمُسْلِمَ مِنْ نَصَبٍ وَلاَ وَصَبٍ وَلاَ هَمٍّ وَلاَ حَزَن وَلاَ أَذًى وَلاَ غمٍّ، حتَّى الشَّوْكَةُ يُشَاكُها إِلاَّ كفَّر اللَّه بهَا مِنْ خطَايَاه.” يعني حتى أمراضك النفسية بتشيل عنك سيئات 🙂

طيب أنا هستفيد إيه من اللي بيحصل؟ الجنة يا عم.. وممكن تبقى أسعد في الدنيا كمان.. تبقى برنس .. تبني شخصيتك. حاجات كتير قوي..

في ناس مستريحة قوي في حياتها! مانعرفش نفسيتهم ولا أسرارهم.. يمكن شايلين الهم ومش باين.

بس في ناس مستريحة فعلاً! صح فيه طبعًا.. بس حسابهم غيرك.. هايتحسبوا على حاجات تانية وبمقياس تاني من منطلق إن ربنا عدل.. عارف شبه إيه؟ شبه الحـج. ربنا هيحاسب اللي قادر يحج ومحجش غير اللي مكنش قادر يحج ومحجش.. صح؟ يبقى بُص في ورقتك لو سمحت.

والله أسئلة كتير قوي بنسألها لنفسنا كل يوم .. لأ وأسئلة قد تكون عميقة جدًا لناس كتير ممكن توقعهم في حيرة وتخليهم يتوهوا في أفكارهم وأحياناً في حياتهم.. الدين بيحاول يرد عليها في كلمة أو إتنين!

الفكرة بس إن الدين مش دنيا بس.. دنيا وآخره. عشان كدة الإجابات ممكن تبان نظرية لمعظمنا عشان كل تركيزنا على الدنيا.

إنما الدين أعم وأكبر من كدة بكتير.

عشان إنت أعم وأكبر من كدة بكتير.

إنت جسد وروح. مش جسد بس.

حاجة زي طيب اللي أنا بعمله ده صح ولا غلط؟ شوف حلال ولا حرام سهلة.. مش قادر تحكم؟ إسأل.

أكتر من أوبشن حلال؟ إختار اللي ينفعك وينفع الناس.

هو أنا مستاهلش أبقى سعيد؟ لا تستاهل عشان ربنا بيحبك .. هو قال كدة مش أنا.. ولو دنيتك مش سعيدة هيعوضك في الآخرة.. ربنا اللي قال كدة برضه.

ليه بحس إن الكلام نظري؟

المشكلة الدين مزنوق ومظلوم معانا في الحتة النظرية وهو أصلًا عملي.

الدين عملي جدًا .. بس بيشتغل على حاجتين .. حاجة ملموسة اللي هي الجسم والعقل اللي عايزين يبقوا أسعد في دنيتهم.. وبين الروح اللي هي محتاجة تبقى أهدى وأسعد في حياتها (وحياتها دي دنيا وآخره).

المشكلة إننا شايلين الشق الروحاني والإيماني من المعادلة.. وحاصرينه بس في الجزء المادي والدنيوي. وإنت ببساطة مش متصمم عشان تعيش في الدنيا بس. ومش متصمم جسم بس.

مش دعوة للتدين

تــاني يا جماعة.. دي مش دعوة للتدين والله.. وأنا أبعد ما يكون عن التدين.. أنا بكلم نفسي قبل ما أكتب لك..

ولأ.. مش بقول أنا مش متدين عشان أحسسك إني شبهك أو أقل منك يعني .. وإحنا زي بعض وبتاع .. فتقتنع بكلامي.. دي دعوة للتفكير في الموضوع بطريقة أكبر من كدة.. دعوة للهدوء شوية والسلام النفسي.

مش لازم تبقى متدين عشان تاخد الحلو في الدين!

محتار في إحساس شوف الدين بيقول إيه أو بينصحك بـ إيه؟ يمكن عنده إجابات أو Hacks تفيدك.. مش لازم تبقى متدين أبدًا عشان تستنفع باللي الدين بيقولهولك.. الدين مش حكر على المتدين يعني.. مش هايقولك لأ بما إنك مش متدين.. فعقابًا ليك .. خليك محتار المفروض تعمل كدة أو لأ.. أو تفكر كدة ولا لأ..

خد اللي ينفعك.. يمكن تكسب الدنيا والآخرة مع بعض.. يمكن الآخره بس.. يمكن الدنيا بس.. أي حاجة.. أي حاجة تستفيد بيها ولو صغيرة.. مصلحة صح؟ 😊

صباح الفل.

________________________

…

تنويه وكدة: انا مش بلغي اهمية علم النفس. ومش بقول ان المتدين مابيجيلوش اكتئاب واللي مش متدين بيتعب نفسيًا! وأكيد مش بقول ان الدين ممكن يستبدل علم النفس. ممكن يستبدله آه .. وممكن لأ.. مش حتتي دي.. وماعرفش احصائيات برضه .. بس متوقع ان اللي عنده اساسيات في الدين قدر على الأقل يتفادى حاجات اكتر من اللي معندوش.. بغض النظر هو متدين ولا لأ.. إنما يعني اللي بقوله ان في جزء كبير من مشاكلنا .. ليه حلول بالفعل واضحة وبسيطة في الدين.. ممكن جدًا تفيدنا.