العلاقة بين الضغط والتوتر النفسي وألم الضهر
الضهر هو السند -حرفيا- نقدر نقول إن الام الضهر من أكتر الأعراض شيوعا اللي دايما بنحس بيها، واللي بتخلي يكون في صعوبة في النوم والشغل، مفيش شك ان الام الضهر دي مشكلة كبيرة في حالات كتير، دا غير انه ممكن يشغل تفكيرك بشكل كبير، يا ترى حركت عضلة غلط؟ ولا اتحركت في اتجاه غلط؟ وفي الاخر ممكن يكون بس الضغط النفسي هو اللي مسببلك كل الوجع.
المحتويــات
أسباب وجع الضهر
في أسباب كتير في منها مش واضح، وفي أسباب تانية زي صدمة أو إصابة مباشرة هي اللي مسببة الألم الحاد أو المزمن، ومن الأسباب الأكثر شيوعا لآلام الضهر:
- إصابة.
- شد عضلي.
- إجهاد الرباط الصليبي.
- تشنجات عضلية (نتيجة الإجهاد).
- انزلاق غضروفي.
- انتفاخ القرص القطني.
- هشاشة العظام.
- التهاب المفاصل.
غالبا الأنشطة اللي انت شايفها مش مؤذية زي انك تشيل حاجات بطريقة مكررة أو حركة متكررة زي قعدتك قدام الكمبيوتر ن غير ما تفرد ضهرك صح، الحقيقة ان الأنشطة دي هي اللي هتخلي عضلاتك واربطة جسمك تكون في توتر مستمر ودا اللي هيعمل آلام في الضهر، الحالات المزمنة أو التنكسية زي المذكورة في الأسباب لو مش منطبقة عليك فغالبا ألم ضهرك هيكون بسبب حاجة تانية.
ممكن الضغط النفسي يسبب آلام في الضهر
أكيد مش سهل إن الواحد يصدق إن تفكيره بس ممكن يكون سبب معاناة جسمه وألم ضهره، الحقيقة في قايمة طويلة من الاعراض الجسدية تم اثبات ارتباطها بالقلق والتوتر، منهم:
- التعب (الخمول العام)
- صداع الراس
- ألم في الصدر
- مشاكل الجهاز الهضمي
- أرق
- انخفاض الرغبة الجنسية
ازاي اخفف وجع ضهري؟
الخطوة الاولي في التخلص من الألم هو تحديد سببه، بمعني اصح لو الألم بسبب إصابة يبقى لازم مساعدة دكتور، اما لو ألم بسبب الضغط النفسي، يبقى ممكن تتخلص منه وانت في البيت، عموما ممكن تجرب وصفات بيتية زي:
- التلج أو الحرارة، في بداية الألم اعمل كمادات باردة ل 15 دقيقة 3-4 مرات يوميا.
- بعد كام يوم لازم تحط كمادات دافية -الشاور الدافي برضو هيخفف الامك بشكل كبير-.
- وممكن تجرب العلاج بالتدليك في تخفيف الأعراض.
- لو محستش بتحسن يبقى لازم علاج طبي محترف زي دكاترة العلاج الطبيعي.
طبعا في حالات اكتر خطورة زي مرضى الديسك وهشاشة العظام وقتها لازم تدخل دكتور متخصص، دكاترة بتوصي بالتدخل الجراحي وغيرهم بيرجحوا العلاج بالتردد الحراري (ودا علاج بالحقن بدون تدخل جراحي)، وغالبا ما بيكون موجه لاصحاب الالام المزمنة في الضهر لكن في الأول والأخر لازم الدكتور يشخصك ويشوف الأنسب ليك.
ازاي امنع الآم الضهر في المستقبل؟
دي شوية نصايح ممكن تساعدك تتجنب آلام الضهر في المستقبل:
- خلي ضهرك في وضع مستقيم وانت نايم.
- افرد ضهرك! واتدرب على قعداتك وانت ضهرك مفرود.
- حاول تمدد جسمك بانتظام.
- لازم تاكل أكل صحي – النصيحة الازلية-.
- مارس الرياضة بانتظام.
- افــرد ضهرك دلوقتي!
- تجنب رفع حاجات تفيلة.
- تخلص من الوزن الزايد.
- قلل من مستوى التوتر عندك.
- افرد ضهرك دايمًا.
لو بتعاني من آلام أسفل الظهر ومعتقد أنها ممكن تكون مرتبطة بالضغط أو القلق أو حالة جسدية ، الخطوة الأولى نحو الراحة هي أن يتم فحصك من قبل طبيب متمرس، لازم تروح لجراح عظام أو دكتور عظام وتكتشف ايه انسب طريقة علاج لتشخيصك!
