إزاي تكون صاحب صاحبك؟
لو عندك صُحاب بتحبك وبتدعمك وتقدّرك وتقف في ضهرك يبقى أكيد هتعيش حياة سعيدة، وعشان دورهم مهم في حياتك وفارق لازم يكونلك انت كمان دور في حياتهم وترُد الجميل ده وتتعلم إزاي تكون صاحب جدع كُل ما يحتاجوه ميتأخرش.
المحتويــات
إيه أهمية الصُحاب في الحياة؟
الأبحاث بتقولك إن لو عندك صُحاب كويسين فده معناه إنك هتعيش بشكل صحيّ وسعيد وإنك كُل ما تبقى انت كمان كويس وحاسس إنك عايش لحد وفيه حد عايشلك بتلاقي أهمية لحياتك.
طيب مين هو الصاحب اللي تقدر تقول عليه صاحبك بجد؟
الصُحاب بتروح وتيجي مهما طالت مدة وجودهم في حياتك أو قصرت، مفيش حاجة بتقولك إن عِشرة العُمر هما أحسن ناس في حياتك، أحسن ناس في حياتك بجد هما اللي يتقبلوك ويدعموك في كُل لحظة.
والصاحب الجدع بيبان من تصرفاته، زي إنه مثلًا:
- دايمًا في ضهرك مهما كان الموضوع صعب
- مبيحكمش عليك
- مش بيحبطك
- لطيف معاك
- بتتبسط معاه
- مُخلص
- بتقدر تثق فيه وتأمنه على أسرارك
- بيضحك معاك طول الوقت وبيهوّن عليك
- مش بيسيبك في الظروف الصعبة
- بيفرحك
- بيسمعك
- بيختار معاك الحاجة اللي تريحك انت
إزاي تكون صاحب جدع؟
زي ما قولنالك علامات الصاحب الجدع فانت لازم تبقى كدة مع صُحابك، وطبعًا عشان مشاغل الحياة مش دايمًا هتقدر تبقى موجود هنقولك تعمل إيه زي إنك مثلًا:
تسمعهم
حاول تسمعهم بجد وتعرف شايفين إزاي المواقف من وجهة نظرهم هما، مش دايمًا صُحابك بيكونوا مستنين النصيحة بس دايمًا بيكونوا مستنين حد يسمعهم.
دوّر على الحقيقة
لو لقيت صاحبك عنده مشكلة بتبعده عنك متظنش فيه بسوء ودوّر عالسبب الحقيقي اللي مغيره لإنه ممكن يكون تعبان أو بيعاني ومحتاجك جنبه.
شوف هما محتاجين إيه
أسهل طريقة تساعد بيها حد إنك تساعده بالحاجة اللي هو محتاجها مش باللي انت عايز تعمله، عشان كدة انت عليك تسألهم هما محتاجين إيه بالظبط وانت تعمله ليهم.
عبّرلهم عن مشاعرك
الأفعال مش دايمًا كفاية للتعبير عن الحُب، انت لازم تقولهم انك بتحبهم ومبسوط بوجودهم جنبك لإن الكلام الحلو دايمًا بيفرق.
خاطِر عشانهم
لو لقيت صاحبك بيضيع منك في مشكلة أو سِكة غلط متستناش يطلب منك طوق النجاة، لازم تنقذه مهما كان الوضع صعب لإن ده حق الصاحب على صاحبه.
