الصُحاب مش بالكلام..تعالى نقولك أومال الصُحاب بإيه؟
الكلام عن الصُحاب يطول ويتغنى فيه مواويل بس ده في حالة إنهم صُحاب فِعلًا، وعشان تعرف اللي حواليك دول صُحاب ولا لأ هنقولك كُل حاجة المفروض تكون موجودة فيهم وبتأثر عليك إزاي ولو لقيتها في اللي حواليك هيكونوا دول الصحاب فعلًا.
المحتويــات
ليه وجود الصُحاب مُهم في الحياة؟
علاقتك بصُحابك لازم تكون علاقة صحية مش مجرد علاقة سد خانة وخلاص، فتحس معاهم إنك بتتحسن نفسيًا وجسديًا واجتماعيًا وقادِر تحِب نفسك وتثِق فيها وتطّور منها لإن حواليك اللي بيوصلك الدعم ده، وده دورهم الفِعلى اللي هيعملك كُل اللي قُلنالك عليه ده واللي بتأكدهولك الأبحاث بإن وجود صُحاب حقيقة بيطوّل العُمر وبيأثر بالإيجاب على كُل مجالات الحياة.
طيب إيه فوايد الصحوبية؟
بيحسنوّلك المود بتاعك
لإن وجود ناس خفيفة عالقلب بيعملك جو جميل ميخليكش متعصب ومتنرفز طول الوقت.
بيساعدوك توصل لأحلامك
صاحبك الحقيقي بيعتر نجاحك هو نجاحه فبيساعدك تاخد الطريق الصح وبيحتفل بوصولك لهدفك.
بيخففوا من عليك الحِمل
طول ما انت مش لوحدك في الحياة ومعاك اللي يسندك بتكون أقل عُرضة للإصابة بالإكتئاب غير إنك مش بتواجه نوبات القلق والتوتر بشكل شَرِس لإن فيه اللي بيهوّن عليك.
بيدعموك
ودعم الصُحاب دعم مُستمر ومش مشروط بموقف صعب ولو إن دعمهم في الأوقات الصعبة هو أكبر وسيلة بتساعدك تتخطى أي حاجة.
طيب إيه لو لاقيته في اللي قدامك يخليك تقول عليه صاحب جدع؟
زي ما بيقولوا كدة الصاحب الجدع مالوش مُرتجع، يعني مش هتقدر تتخلى عنه ولا له بديل ولو لاقيت العلامات دي في صاحبك يبقى يا بختك بيه، زي إنه:
- بيهتم بيك وبأمورك اهتمام حقيقي مش مُزيف ولا من باب الفضول.
- بيقبلك زي ما انت ومش عايز يغيّر فيك حاجة.
- بيسمعك من غير ما يُحكم عليك.
- بيحسسك بالراحة بمجرد وجوده وبتلاقي معاه الوَنس.
وهنا انت لازم تسأل نفسك سؤال، لو انت لاقيت كُل اللي انت محتاجه في صُحابك واتأكدت إنهم صُحاب جدعة وحقيقية، إيه بقى اللي لازم يكون فيك عشان تكون انت كمان صاحِب جدع؟
خليك الصاحب اللي تحِب تلاقيه
الدُنيا أخد وعَطا مش هينفع تبقى طول الوقت مستني صحابك يكونوا كويسين ومتفاهمين وبيدعموك وانت مبتقدمش ليهم حاجة قدام ده، لو عايز طريقة مُعينة تتعامل بيها يبقى لازم تشوف انت بتعمل ليهم إيه أصلًا من الأول.
اسمعهم
حتى لو مش بتقدر تدي حلول او تواسي حد وقت مُشكلة كفاية إنك توصلهم الاهتمام والدعم وانك حاسس بيهم وبتهتم لمشاكلهم.
اديهم مساحتهم الشخصية
كُل حد في الحياة محتاج مساحة شخصية يعمل فيها اللي يريحه وده مش معناه إنه مبيحبش شريك حياته أو صاحبه أو أهله بالعكس المساحة دي اللي بتساعده يقدر يتعامل معاهم بشكل أحسن ودماغ رايقة لأن ده حقه في الراحة فمتحرمهمش من الحق ده.
مترفعش سقف توقعاتك
صُحابك هما بشر زيك، هيجي عليهم وقت ومش هيكونوا قادرين يدعموك بالشكل اللي انت محتاجه وعشان كدة متكونش متخيل طول الوقت إنهم مُسخرّين ليك ولسعادتك، وارد جدًا إنهم ميعرفوش يتعاملوا معاك في أوقات زي ما انت كمان مش هتبقى عارف تعمل إيه في وقت تاني.
وعشان الصُحاب مش بالكلام قولنالك تلاقيهم وتميّزهم إزاي وتكون انت كمان صاحب جدع الكُل يتمنى يكون معاه.
