الأرق النفسي: ما ينام الليل إلا خالي البال
الأرق ببساطة هو إنك ماتستريحش في النوم. يعني مشاكل النوم كلها من أول النعاس الصبح أو السهر لوقت متأخر أو القلق كتير خلال النوم أو إنك تنام أقل أو أكتر من المدة اللي جسمك محتاجهـا لأسباب كتير منهـا النفسي والعضوي، منها المؤقت أو المستمر. كلامنا هنـا أكتر عن الارق النفسي.
مبدئياً في تلات أنواع من الأرق
- الأرق المؤقت: وده بيستمر لفترة من يوم لـ شوية أسابيع .. ودي تقريباً ماسلمش منهـا حد.. ومافيش حد مجالوش أرق فيوم من الأيام بسبب حاجات كتير من أهمها القلق أو التفكير أو الإجهاد.
- الأرق الحاد: ده اللي بيحصل لمدة مش أقل من تلات أسابيع ومش أكتر من ست شهـور.. وعادة بيبقى سببه تغيرات في نظام الحياة سواء العضوية أو النفسية.
- الأرق المزمن: وهو ده اللي بيحصل لما الأرق يستمر لفترة طويلة توصل لسنين، وطبعاً ده النوع الأكتر خطورة، لأن ببساطة “النوم” هو وقت الصيانة اللي بياخدها جسم الإنسان عشان يعرف يكمل.. فلو الصيانة دي ماتعملتش في معادها.. يبقى منطقي الدنيا هاتبوظ.
طيب إيه أسباب الأرق النفسية؟
- الاضطرابات النفسية عامة هي أكتر سبب بيؤدي للأرق لدرجة إن في دراسات بتقول أن 40% من اللي عندهم أرق – زي ما ويكيبيديا بتقول – عندهم اضطرابات نفسية.
- الاكتئاب (وغالباً بيشكي المرض إنه مابيعرفش يصحى بدري)
- القلق (وغالباً بيشكي المرض إنه مابيعرفش يرووح في النوم بسهولة)
- وطبعاً الضغوط العائلية والوظيفية والتفكير والكلام ده كله (وما ينام الليل إلا خالي البال 🙂 )
- في معظم الأحيان المصاب بالأرق الناتج من اضطرابات نفسية مايعرفش إن الأرق اللي عنده مُتعلق بالاضرابات النفسية دي ده لو معترف إن عنده اضطرابات نفسية أصلاً
في أسباب تانية زي:
- التدخين والكحول والشاي والقهوة
- الناس اللي قالبة نظام يومها وبتشتغل بالليل
- انك ماتنظمش الوقت اللي بتنام وتصحى فيه كل يوم
- طبعاً في أدوية كتير ممكن تكون بتاخدها وبتسبب الأرق ده (راجع النشرة بتاعت الدوا)
