أشهر ۷ أنواع للإدمان وأزاي بنقدر نتعامل معاها ونعالجها؟

إيه هو الإدمان؟ السؤال ده معقد حبتين لأن الإدمان هو إدمان الشخص على ممارسة سلوك معين او أفعال معينة ليها تأثيرات ونتايج سلبية وغير صحية. اتضح ان الإدمان بينتج عن خلل وظيفي في الدماغ مرتبط بعوامل وراثية وبيئية، ودة بيخلق شغف قهري في الدماغ تجاه مادة معينة او سلوك معين، وساعتها الشخص بيلاقى نفسه بيلف في دائرة مفرغة من الإدمان.

الإدمان تلات فئات

• الإدمان السلوكي: زي ما قلنا قبل كدة الإدمان مش بس إدمان مخدرات، لكن ممكن يكون كمان إدمان سلوكيات معينة، زي إدمان الشوبينج وإدمان الجنس والقمار وألعاب الفيديو.
• إدمان المواد: زى مثلا إدمان العقاقير الغير مشروعة او المخدرات زي الافيون والكوكايين والهيروين، ده طبعا غير إدمان الكحول.
• الإدمان الاندفاعي: بيحصل نتيجة اضطراب التحكم في الانفعالات وبالتالي إدمان السلوك الاندفاعي، زي مثلا إدمان السرقة القهري او إدمان السلوكيات المدمرة، والدراسات الحديثة أكدت ان أكثر من 10% من الناس بيعانوا من اضطراب عدم القدرة على السيطرة على الانفعالات، والنوع ده من الاضطراب ممكن يكون مصاحب لمشكلات تانية زي تعاطى المخدرات.

أشهر ۷ انواع الإدمان

إدمان الخمرة

في أكثر من 14 مليون شخص في أمريكا بيعانوا ن إدمان الكحول، طبعا في أوساط اجتماعية ومجموعات كثيرة بيكون شرب الكحول والخمور فيا شيء طبيعي، بس طبعا إدمان الكحول ليه آثار جانبية خطيرة زي الضعف الإدراكي ومشاكل صحية زي أمراض الكبد، وممكن إدمان الكحول يوصل للتسمم الكحولي اللي ممكن يؤدى الى الوفاة.

إدمان السجاير

التبغ بتحتوى على مادة النيكوتين اللى بتوصل للإدمان، سواء كان التبغ ده موجود في السجائر او التبغ الممضوغ، والأبحاث أكدت ان 9 من كل 10 اشخاص مدمنين تبغ بيبدأوا إدمان التدخين قبل بلوغ سن 18، النيكوتين بيسبب زيادة في الادرينالين والدوبامين في الجسم وهو ده اللي بيوصل للشخص المدخن إحساس المتعة أثناء التدخين، وطبعا الاضرار السلبية للتدخين معروفة وممكن تعرفها بالتفصيل من مقال إدمان النيكوتين ومخاطرة واضرارة.

١١ حيلة مجربها شخصيًا قدرت بيهم أقلل السجاير بشكل كبير

إدمان الجنس

الجنس شيء صحي في حياة الناس، لكنة ممكن يتحول لإدمان مدمر، وإدمان الجنس مرتبط بالسلوك الجنسي القهري اللي هو الاستهلاك المفرط للمواد الإباحية او حتى الافراط في ممارسة العادة السرية، وإدمان الجنس بيوصل الشخص لعدم التحكم في الأفكار والسلوكيات الجنسية.

إدمان المخدرات

عادة بتكون المخدرات هي اول حاجة بتيجى في بالنا لما بنتكلم عن الإدمان، وممكن يحصل إدمان لأنواع كثيرة من المخدرات وبيكون صعب التعافي منها زي الكوكايين والهيروين والميثامفيتامين، والمدمنين بيظهر عندهم سلوك عدواني قهري للحصول على المخدرات وطبعا حياتهم بتدمر بسبب الإدمان، وبيسبب إدمان المخدرات مشاكل صحية واجتماعية ومالية، ده غير ان الإدمان بيكون وصمة عار للمدمن بتوصله لفقدان علاقته بعائلته وأصدقائه.

إدمان الألعاب الإلكترونية

على الرغم من ان الفيديو جيمز من الحاجات الممتعة جدا اللي ممكن تكون وسيلة تقضى بيها وقت ممتع مع اصحابك، الا انه ممكن يتطور ويبقى إدمان سلوكي، وفى حالة إدمان الفيديو جيمزبتلاقى الشخص بيدى الأولوية للألعاب بدل من علاقاته الاجتماعية وانشطة حياته المعتادة في الشغل او الدراسة، وعلى الرغم من ان النوع دة من الإدمان مش واضح ومش سهل تشخيصه زي إدمان المخدرات او الكحول، لكن إدمان الفيديو جيمز برضة ليه آثار جانبية ضارة جدا.

إدمان الانترنت

الانترنت بقي موجود دوقتي في كل مكان، بنستخدمه في الدراسة والشغل والتسلية كمان خاصة بعد ما بقي الموبايل موجود في أيدينا على طول، ومش هنقدر ننكر ان الانترنت سهل علينا حاجات كتير جدا في حياتنا وبقينا نقدر نتواصل مع أهلنا واصحابنا بسهولة ونقدر نوصل لأى معلومة بسهولة جدا، بس المشكلة ان في ناس كتير مننا بقت مدمنة استخدام انترنت وممكن تقضى ساعات من وقتها بتتصفح بدون تفكير منصات التواصل الاجتماعي بدون تفكير، ومقال ليه السوشيال ميديا بتسبب الإدمان ممكن يفهمك اكثر موضوع امان الانترنت.

إدمان الشوبينج

كلنا لما بنكون متضايقين او زهقانين شوية بنحب نخرج نعمل شوبينج عشان نغير المود شوية، ودة حاجة مش مضرة خالص لو قدرت تخرج المشاعر السلبية اللي جواك من خلالها، لكن المشكلة ان أحيانا السلوك دة بيتحول لسلوك قهري وبيبقى إدمان عند بعض الناس، وبتلاقى الشخص عمال يزود ميزانية الشوبينج ومش قادر يوقف نفسه عن الشراء، ودة طبعا ممكن يكون عبء مالي كبير على الشخص ممكن يوصله انه يكون مديون او انه يعمل مشاكل مع شريك حياته على الفلوس خاصة لو كانوا بيتشاركوا في المصاريف. اعرف أكتر عن إدمان التسوق من هنا.

إدمان القمار

هو نوع من أنواع الإدمان السلوكي، اللى بيرتبط مع الشخص بإحساس المكافاة اللى بيحصله اثناء وضع الرهانات بصرف النظر عن الخسائر اللى ممكن يتعرض ليها، ودة ممكن يوصل مدمن القمار الى انه يخسر كل أملاكه ومدخراته عشان يقدر يكمل لعب قمار، وإدمان القمار زيه  زي أي نوع تانى من الإدمان الشخص بيعتاد عليه بعد فترة، وبيحتاج يلعب قمار أكتر ويعمل رهانات اكبر عشان يحس بنفس القدر من المتعة، وفى إدمان القمار هتلاقى  ناس بتدمن نوع واحد من القمار زى البوكر على الانترنت، وفى ناس تانية ممكن تدمن أنواع تانية زى طاولات القمار في الملاهي الليلية او المراهنات الانترنت.

إدمان الاكل

إدمان الأكل ممكن يتسبب في آثار جسدية ونفسية خطيرة، وغالبا الشخص اللي بيعانى من إدمان الاكل بيعانى من السمنة وألم المزمن وأعراض القلق والاكتئاب، وممكن يكون إدمان الاكل في اساسه وسيلة للتغلب على المشاعر المتعبه زي القلق، وممكن بأنواع معينة من الاكل خاصة الغنية بالدهون والسكر والملح انها تحفز نظام المكافأة في الدماغ ودة بيخلىك تاكل غصب عنك حتى لو مش جعان، وممكن إدمان الأكل يكون لأى نوع من أنواع الاكل ولكنة غالبا بيكون إدمان للأيس كريم والحلويات والمكرونة والشيبس.

ازاى نقدر نتعرف على الإدمان؟

في أنشطة كتير ممتعة ممكن تتحول لإدمان، بس ازاى نعرف ونستوعب ان في تحول بيحصل من مجرد التسلية والمتعة للإدمان؟ هنقولك على شوية علامات هتوضحلك ان سلوكيات معينة اتحولت معك لإدمان:

• تغيير الاولويات: يعنى لما تلاقى اولوياتك في الحياة اتغيرت وبقي عندك إنك تاخد دواء معين او تشرب حاجة معينة او تلعب لعبة معينة، أهم من شغلك او دراستك او حياتك الاجتماعية.
• فقدان السيطرة: لما تلاقى نفسك بتكرر سلوك معين غلط ومش قادر تبطل تعمله رغم إنك عارف أضراره.
• زيادة مقاومة الجسم: يعنى هتلاقى نفسك محتاج تتعاطى كميات أكبر من المخدرات او تشرب كمية أكثر من الكحول عشان توصل لنفس الشعور اللي انت بتحبه واللي كان بيحصلك في بداية الإدمان، وفي حالات إدمان الاكل والشوبينج والألعاب.هتلاقى نفسك عاوز تاكل اكتر او تعمل شوبنج اكثر او تلعب اكتر.
• زيادة المخاطرة: بمعنى إنك مش هتيقى مهتم بأي عواقب او مخاطر ممكن تحصل نتيجة الإدمان دة، المهم توصل للشعور الممتع اللي بيصاحب الإدمان، وغالبا المدمن مش بيفرق معاه أي حاجة وممكن يضحى بصحته وسلامته وأمانة عشان الإدمان.
• أعراض انسحابيه: ممكن تظهر اعراض انسحابيه جسدية ونفسية مزعجة لو حاولت تبطل او تقلل من الإدمان او من العادة اللي انت مدمن عليها.

ازاي العادات ممكن تحول لإدمان؟

العادة هي حاجة بنتعود نعملها وبتكرر كتير في أوقات معينة، يعنى مثلا في ناس اساسى عندها لازم تشرب قهوة كتير الصبح، وتدريجيا بتكون عادة يومية اتعودوا عليها، وبتتحول القهوة من مجرد مشروب لشىء أساسي نبدأ بيه اليوم ونواجه بيه التوتر، ساعتها ممكن تتحول القهوة من مجرد عادة لإدمان، وبالتالي أي حاجة او نشاط يبقى عمله إجباري على الشخص ومش قادر يبطله او يتوقف عنه يبقى إدمان، تقدر كمان تعرف أخطر 5 أسباب نفسية للإدمان من المقال دة.

لما الإدمان يكون بيأثر على كل جوانب الحياة، ويكون ليه عواقب سلبية على الجسم والحالة النفسية والعاطفية والمالية، لازم الشخص يتحرك لعلاج الإدمان، والعلاج ممكن يكون لفترة او يستمر مدى الحياة.

ازاى بيتم علاج الإدمان؟

يختلف علاج الإدمان بحسب نوع الإدمان وطبيعة كل شخص، ده غير ان الإدمان ساعات بيصاحبة أنواع من اضطراب الشخصية او مشكلات عقلية، ودة بيحتاج تكنيك مختلف للعلاج، وفى بعض أنواع الإدمان بيحتاج علاجها الدخول لفترة لمستشفى او مصحة، وفى أنواع تانية بيتم علاجها من خلال برامج العلاج في العيادات الخارجية، وطبعا الاستجابة للعلاج بتختلف من شخص لشخص.

علاج الإدمان السلوكي

ممكن علاج الإدمان السلوكي زي إدمان القمار او الجنس او الشوبينج بطرق مختلفة، زي مثلا مجموعات الدعم اللي بتوفر فرصة الكلام مع اشخاص بيمروا بنفس التجربة، وممكن العلاج السلوكى المعرفى انه يغير كتير من أنماط السلوك الضارة، وفى بعض الادوية اللى ممكن نستخدمها لتقليل اعراض الانسحاب والانتكاس خلال فترة العلاج.

علاج إدمان المواد

علاج إدمان المواد زي الكحول او المخدرات بيتطلب اشراف طبي، لأن أحيانا بيكون التوقف المفاجئ عن تعاطى المخدرات او الكحول أمر خطير ممكن يؤدى للوفاة، والعلاج لازم يستمر لفترة كافية يقدر المريض من خلالها انه يتجنب أي انتكاسات محتملة ويعرف ازاى يتعامل معاها في حالة حدوثها، وبرضة هنقول ان أسلوب وطريقة العلاج تختلف من شخص لآخر.

علاج إدمان الاندفاع

“اضطراب التحكم في الاندفاع” غالبا بيدخل مع أنواع الإدمان المختلفة، وهنلاقى ان 22% ل 50% من الناس المصابين بهوس السرقة أو (السرقة القهرية) بيعانوا من إدمان المخدرات، عشان كدة أثناء العلاج بيتم دمج العلاج لعلاج المشكلتين في نفس الوقت بدل من حل كل مشكلة منفردة، والعلاج غالبا بيجمع بين العلاج الدوائي والعلاج السلوكي المعرفي والاستشارات النفسية، وفى بعض الأحيان يتطلب العلاج جلسات للأشخاص المقربين من الشخص.