هل انت بقيت مُدمن حشيش؟ 5 حاجات تعرفك إنك أدمنت

64

معروف إن الإفراط  في شُرب الحشيش أو العقاقير المخدرة بشكل عام بيسبب إدمان، ودي شوية مؤشرات تعرفك إنك ادمنتها. الحشيش أو العقاقير المخدرة هي من أكتر الحاجات اللي بيلجأ ليها الشباب لما يعانوا اكتئاب أو قلق أو حتى عشان يبقوا كول وجامدين! طبعا مش كل اللي تعاطي حشيش بقى مدمن ومش كل جرعاتها تموت زي باقى المخدرات الا إن أثارها الجانبية خطيرة جدا!

دي خمس علامات انك بتعاني من مشاكل إدمان الحشيش:

معندكش شغف تعمل حاجة 

ودا شئ الشخص الطبيعي ممكن يحس بيه، لكن لما يجيلك الشعور دا مع الخمول ومع مشكلات في نقص الانتباه ومشاكل في التذكر، وتقلص في حدقة العين بيبقى غصب عنك عندك الشعور دا بانك مش عايز تعمل حاجة في حياتك! وكل حاجة كانت بترفه عنك زي الخروج والفسح مبقتش تفرق معاك وكل اللي فارق هو انك تتعاطي حشيش!

علاقاتك بتبوظ

دايرة الشخص الاجتماعية بتكون العائلة، والصحاب، والزمايل لو كل دايرة من دول بدأت تدهور وبدأت تحس انك بتبذل مجهود كبير في انك تحاول تتعامل معاهم زي ما بيتعاملوا وبتحاول تنعزل، يبقى اعرف ان الحشيش هو السبب، وغالبا بيكون سببك هو انك مش عايزهم يعرفوا ولا يكتشفوا تعاطيك لانهم اكيد هيخافوا عليك.

ظهور أعراض الانسحاب

الاشخاص اللي حواليك بالضرورة هيلاحظوا عليك أعراض انسحاب زي:
  • العصبية الزايدة
  • القلق
  • الرعشة والتعرق في الايد
  • فقدان الوعي في المكان
  • الاكتئاب

بتبقى محتاج عاطفة 

عادة متعاطي المخدرات بيحتاجوا يشعروا ان اللي حواليهم مسامحهم ومتعاطف معاهم، وبيزود عندهم الشعور باحتياج العاطفة، ودا بيخلي اي مشاعر غير دي تكون بالنسبالهم عدوانية ومش عارفين يتعاملوا معاها.

إنك مش قادر تبطل!

الاشخاص اللي خلاص اعتمدوا نفسيا وجسديا على تعاطي الحشيش لفترة وحاولوا يوقفوها مبيقدروش، حتى لما بيلاحظو اثارها السلبية زي صعوبة تحمل المسؤلية، لو لقيت ان عندك عرض من الاعراض دي يبقى لازم تطلب المساعدة.

اترك تعليق