الصحة النفسية

7 حاجات سريعة جداً تظهرك واثق من نفسك

خليك-واثق-فى-نفسك

الbody language هى اللغة اللى مش محتاجة منك ولا كلمة! جسمك هو اللى بيتكلم بدالك، الطريقة اللى بتقعد، بتاكل، بتشرب، بتمشى بيها هى اللى بتتكلم بدالك! كام مرة اتقالك و انت رايح انترفيو اقعد ضهرك مستقيم، متربعش ايدك، متبصش بعيد و هو بيكلمك، و الوصايا العشر بتاعة كل انترفيو دى!

ببساطة لغة الجسد ليها وضعيات، و الوضعيات دى نوعين نوع ايجابى، و نوع سلبى؛ لو جربت تعمل سيرش على جوجل بكلمة positive body language هتلاقى حاجات كتير تساعدك تطبق كلامى ده:

1- دراعتك:
لو ربعت او حطيت ايد على ايد معناه انك منغلق و انطوائى او حاسس بملل، لو حطيتها على وسطك ده معناها انك واثق من نفسك، و كذلك لو حطيتها ورا راسك و انت قاعد، او لو اتكلمت و دراعتك مفتوحة هيبن بردو انك منفتح و مسيطر!

2- التواصل البصري Eye contact:
حافظ على التواصل بالعين مع الشخص اللى بتتكلم معاه، متسبهوش يبصلك و انت تبقى بتلعب فى الموبايل!
و فى نفس الوقت متفضلش باصصله كأنك بتطلع ليزر من عينيك! خليك معتدل و امشى بقاعدة ال 80 20 ، بصله 80% من الوقت و حسسه بإهتمام، و ال20% الباقيين بص فيهم على اى حاجة.

3- تعابير وشك:
متبقاش مبتسم ببلاهة! و متبقاش مكشر كأنك لسه صاحى من النوم!
ابتسم عادة، و خلى ديما فى تعبير ايجابى على وشك؛ لو ركزت فى الموضوع ده و شوفت انعكاس وشك على باب المترو او مراية العربية هتتخض من منظرك! ?
فا حاول تبقى مبتسم بطريقة تحسس اللى قدامك بالاريحية مش بالغباء!

5- ضهرك:
خليه ديما مستقيم، ده مش وصايا عشر للانترفيو، ده فعلا حقيقى، الضهر المقوس بيوحى ديما بالضعف و الانكسار!
سواء و انت واقف، قاعد، نايم، خلى ضهرك مستقيم.

6- الرجلين:
لو حطيتهم فوق بعض ده معناه انك “بتدافع” عن نفسك و متخذ موقف عدائى (خصوصا لو درعاتك كانوا مربعين)؛ و لو قعدت طبيعى بس لزقتهم فى بعض زيادة عن اللزوم، ده بيوحى بالضعف، بس لو اتعملت فى اطار صح احيانا بتوحى بالذكاء و الهندمة، يعنى احيانا افضل وضعية هى الاسترخاء ان رجلك تبقى مفتوحة الى حد ما و دراعاتك مريحة على ايد الكرسى دى متنفعش فى المواقف الرسمية، فبتكون القاعدة منمقة اكتر.

7- ايديك:
و انت بتتكلم مع حد(خصوصا لو بطريقة مش فورمال) او بتقدم speech استخدم ايديك، ده هيساعدك تعبر عن نفسك اكتر؛ دراسات كتيرة اثبتت ان تعبيرك عن نفسك بيكون اكفأ لما تستخدم اكتر من عضو واحد، و بيساعد ان الكلمات تتدفق بسهولة من غير ما تفكر كتير.

كل ده يتعمل ازاى بقى؟
جرب تعمل تحدى ال30 لنفسك، و استمر لمدة 30 يوم و انت بتعمل التمرين اللى هقولك عليه ده و شوف هتتحسن ازاى بعدها:
كل يوم، بتضيع حوالى دقيقتين او تلاتة فى غسيل سنانك و غلى قهوتك أو أي حاجة تانية، و انت واقف بتعمل ده حط ايدك فى وسطك واعدل ضهرك و خد نفس عميق و طويل و طلعه ببطئ 3 مرات، و انت واقف مستنى المترو او جوة المترو نفسه بردو فرصة انك تعمل التمرين ده، و اتفرج على نفسك بعد شهر!

فى دراسة اثبتت ان الاشخاص اللى اعتمدوا لغة الجسد الايجابية فى حياتهم اليومية بعد ما كانوا غير واعيين لاهمية لغة الجسد، صحتهم النفسية و مزاجيتهم اتحسنت بنسبة 23% عن الاشخاص اللى لسه مستمرين فى روتين حياتهم العادى!

فبجانب ان ده هيحسن من شكلك قدام الناس، فا هو هيحسن من شكلك انت قدام نفسك و نظرتك لنفسك.

عن الكاتب

إنجي عادل

"ماذا سيكون العالم، اذا تحدثنا بقوة، لأناسِ تنصت بوعىِ، فى مكانِ مهيأ لهذا الغرض تحديداً".