هل الضغط النفسي ممكن يسبب الصلع؟

55

عمرك سمعت كلام عن ناس شعرها وقع أو جالهم صلع بسبب انهم كانوا فعلا مضغوطين أو متوترين، الحقيقة إن الكلام دا في العلم حقيقي اكتر مما كنا نتخيل!

كتير من الناس بيستهونوا بتأثير الضغط النفسي على الجسم وبيتجاهلوا انه حاله نفسية، الضغط ممكن يأثر على الجسم بشكل مباشر ويظهر على صورة أعراض خطيرة، ومن الأعراض دي هي سقوط الشعر والصلع، ولو عانيت من اجهاد عاطفي أو جسدي خلال الست شهور اللي فاتت ولاحظت تساقط شعر زيادة أو شكل من اشكال بداية الصلع الذكوري يبقى غالبا التساقط ده نتيجة للضغط النفسي والتوتر.

تساقط الشعر المرتبط بالضغط النفسي

لو تساقط شعر مرتبط بالضغط والاجهاد، فا غالبا اللي عندك دي حالة بيسموها تساقط الشعر الكربي، ودا بيحصل لما صدمة نفسية معينة تحصل بتخلي بصيلات شعرك في حالة تساقط وبعدها بيحصل تساقط في الشعر زيادة عن اللي انت متعود عليه، وغالبا ما بيخلي 50% من الشعر يقع، مش لازم تتخض لأن زي ما قولنا هو بيحصل نتيجة الضغط والمواقف الصادمة نفسيا، ممكن تجرب الخطوات دي :

  • استشير معالج نفسي لو تأكدت انه تساقط شعر كربي، لأنه مرتبط ارتباط كبير بنفسيتك.
  • تحاول تعوض الضعف اللي شعرك فيه بأطعمة مفيدة غذائيا زي البروتين: اللحمة، الفراخ، البيض، الأسماك، الحديد: الفاصوليا والعدس، الخضروات.

تساقط الشعر الوراثي وعلاقته بالضغط

الصراحة انه قليل ما بيكون الضغط النفسي لوحده هو السبب في تساقط الشعر الوراثي، بيكون في أسباب تانية زي الجينات والعمر والهرمونات، ووجود التوتر والاجهاد ممكن يبقى بس محفز ويزود من سرعة تساقط الشعر والصلع اللي هي أصلا موجودة في جيناتك وجاية جاية.

تساقط الشعر الوراثي هو أساسا فقدان في الشعر في أماكن من فروة الراس بس بشكل تدريجي والشعر بيخف واحدة واحدة، لكن تساقط الشعر نتيجة التوتر بيكون نسبة التساقط فيه أعلى بكتير.

تجربة تساقط الشعر أو انه يقل بشكل عام، ممكن تشكل خطورة على تقدير الشخص لذاته وثقته في نفسه، وسرعة فقدانه بتخليك تكتئب وتنعزل، نصيحتنا ليك انك تعالج مستويات التوتر عندك الأول بدل ما تستخبي وتدور على علاج لتساقط الشعر الوراثي، وطبعا متدورس على العلاج دا على النت وبلاش العلاجات الحرارية والكيميائية اللي بعيدة كل البعد عن العلاج، استشير دكتور أو حتى صيدلي تحت بيتك الأول.

اترك تعليق