الصحة النفسية

الخوف من الموت أو الثانتوفوبيا: أسبابه وأعراضه وعلاجه

الخوف من الموت

الخوف من الموت أو الثانتوفوبيا هو نوع من أنواع (القلق-Anxiety) تجاه الخوف من موت شخص معين أو موت الشخص نفسه أو عملية الموت. وغالبًا بنسميها (قلق الموت-death anxiety).

قلق الموت أو الخوف من الموت مش اضطراب مستقل بذاته، لكنه غالبًا ما بيكون مرتبط باضطرابات تانيه زي القلق والاكتئاب. وتشمل:

  • اضطراب ما بعد الصدمة أو PTSD
  • اضطرابات الهلع ونوبات الهلع
  • اضطراب قلق المرض

تختلف الثانتوفوبيا عن النيكروفوبيا (رهاب الموت)، واللي هي عبارة عن الخوف العام من الحاجات الميتة، أو الحاجات المرتبطة بالموت.

في المقالة دي، احنا هنتكلم عن الثانتوفوبيا، أو قلق الموت، أو الخوف من الموت، هنتعرف على الأعراض والأسباب والعلاج.

هل الخوف من الموت شيء طبيعي؟

أي إنسان بيخاف من المجهول. والموت شيء مجهول، وبناء عليه الخوف من الموت احساس طبيعي. لكن امتى يتحول الخوف من الموت لخوف مرضي؟! لما الخوف ده يلازمك ليل نهار ويمنعك تمارس حياتك بشكل طبيعي، هنا يتحول الخوف لحالة مرضية بتسمى “الثانتوفوبيا”.

انك تخاف من الموت ده طبيعي بالنسبة لأي إنسان. ومع ذلك، انك توقف حياتك كلها عشان خايف من الموت ده مرض وليه علاج.

عادة الناس اللي بتبقى مريضة بالثانتوفوبيا بيبقى عندهم قلق وخوف شديدين جدًا تجاه الموت.

ايه هي الثانتوفوبيا أو الخوف من الموت؟

الخوف من الموت

في اللغة اليونانية، معنى كلمة “Thanatos” الموت و”phobos” معناها الخوف. وعليه، ممكن نترجم ثانتوفوبيا بإنها الخوف من الموت.

فكرة ان الموت أمر لا مفر منه بيخلي الشخص المريض بالثانتوفوبيا يحس بقلق وخوف شديدين. وممكن كمان يحس بـ:

  • الخوف من البعد عن الناس اللي بيحبها.
  • الخوف من انه يقدر يتعامل مع وفاة أي شخص.
  • الخوف من انه يموت ويسيب الناس اللي بيحبها تعاني من بعده.

لما تستمر المخاوف دي وتبقى جزء من الحياة وتمنعك من انك تمارس حياتك بشكل طبيعي ، بنقول عليها ساعتها بأنها “ثانتوفوبيا”.

في الحالات القصوى، المخاوف دي ممكن تمنعك من انك تمارس حياتك بشكل طبيعي او انك تعمل أي نشاط في حياتك اليومية أو انك حتى تنزل من بيتك. ومن المخاوف دي الأشياء اللي ممكن تؤدي للوفاة ، زي التلوث أو انك تعمل حاجة خطرة.

أعراض الخوف من الموت

الخوف من الموت

الدكاترة مبيصنفوش الثانتوفوبيا كحالة مستقلة، ولكن بيتم تصنيفها على انها نوع من أنواع الفوبيا.

وحسب الدليل التشخيصي والإحصائي للاضطرابات العقلية (DSM-5) ، فإن الفوبيا هي اضطراب قلق يتعلق بحاجة معينة أو موقف معين.

الخوف من الموت بيعتبر فوبيا لو الخوف ده:

  • بيزيد تقريباً كل مرة بيفكر فيها الشخص في الموت.
  • مستمر لأكتر من 6 شهور.
  • بيمنعك من ممارسة حياتك الطبيعة وعلاقاتك.

وبتشمل الأعراض الرئيسية اللي ممكن يتعرض ليها الشخص من الخوف من الموت ما يلي:

  • الخوف أو القلق الدايم والمستمر لما تفكر في الموت أو عملية الموت.
  • نوبات هلع واللي من الممكن ان تسبب دوخة، وتعرق، وارتفاع او اضطراب في معدل ضربات القلب.
  • تجنب المواقف اللي ممكن تفكر فيها في الموت.
  • الشعور بالغثيان أو وجع في البطن عند التفكير في الموت
  • شعور عام بالاكتئاب أو القلق.

الخوف من الموت ممكن يؤدي بالشخص انه يحس بالعزلة ويتجنب الاتصال بأصدقائه أو حتى عيلته لفترات طويلة من الزمن.

الأعراض دي ممكن تيجي وتروح على مدار حياة الشخص. من الممكن ان يعاني شخص مصاب بقلق معتدل من الموت بقلق شديد لما يفكر في موته أو موت أحد أفراد أسرته، أو لما يكون حد من المقربين ليه عنده مرض خطير.

أسباب الخوف من الموت وأنواع الثانتوفوبيا

الخوف من الموت

الثانتوفوبيا هي الخوف العام من الموت، وفي كتير من أنواعها وأسبابها، وبتختلف التفاصيل من شخص للتاني.

الفوبيا غالبًا بتكون مرتبطة بحدث معين حصل في الماضي، على الرغم من ان الشخص عادة مبيقدرش يفتكر الحدث ده كان ايه بالظبط. غالبًا بتكون الثانتوفوبيا مرتبطة بحدث مأساوي حصل للشخص وهو صغير زي وفاة شخص كان بيعتز بيه جدًا.

وغالبًا كمان ما بيعاني الأشخاص المصابين بأمراض خطيرة من الثانتوفوبيا، إلا انه مش شرط عشان تعاني من المرض ده انك تكون مصاب بمرض خطير، لأن الثانتوفوبيا مرتبطة أكتر بالاضطرابات النفسية.

الخوف من الموت ممكن يكون مختلف من شخص للتاني، وده بيعتمد على عدة عوامل فردية. زي:

  • السن: في دراسة اتعملت سنة 2017 بتقول أن كبار السن بيخافوا من عملية الموت، في حين بيخاف الشباب الموت نفسه.
  • الجنس: وفقًا لدراسة اتعملت سنة 2012، الستات أكتر عرضة من الرجالة للخوف من وفاة أحبائهم وعواقب وفاتهم.

الدكاترة دايمًا بيربطوا ما بين قلق الموت أو الخوف من الموت وحالات نفسية تانيه زي، اضطرابات الاكتئاب واضطرابات ما بعد الصدمة PTSD واضطرابات القلق.

من الممكن أن تكون الثانتوفوبيا مرتبطة بـ:

فوبيا معينة

يرتبط قلق الموت بمجموعة من الفوبيا. أكترهم شيوعًا هي الحاجات اللي ممكن أن تسبب الأذى أو الوفاة، زي التعابين والعناكب والطائرات والمرتفعات.

اضطرابات الهلع

الخوف من الموت ليه دور في كتير من اضطرابات القلق، زي اضطرابات الهلع. أثناء نوبة الهلع، ممكن يحس الشخص بفقدان السيطرة على نفسه والخوف الشديد من الموت.

اضطراب قلق المرض

ممكن يكون قلق الموت مرتبط باضطراب قلق المرض. هنا، بيكون الشخص عنده خوف شديد من الإصابة بالأمراض ومخاوف مبالغ فيها بشأن صحته.

التغلب على الخوف من الموت

التغلب على الخوف من الموت

في كتير من الأحيان ممكن تساعد شبكات الدعم الاجتماعي في حماية الشخص من قلق الموت. وفي ناس معتقداتها الدينية بتخليها تتصالح مع فكرة الموت، مع ذلك في ناس عندها الخوف من الموت بيستمر.

الناس اللي عندها ثقة عالية بالنفس وصحة جيدة وإيمان بأنهم عاشوا حياة سعيدة بيكون إمكانية إنهم يصابوا بالخوف من الموت أقل من الآخرين.

من الممكن أن يوصي الدكتور الشخص المصاب بالثانتوفوبيا بأنه ياخد علاج لاضطراب القلق، أو الفوبيا، أو لأي عرض من أعراض الخوف ده.

يشتمل العلاج على شكل من أشكال العلاج السلوكي. يحاول العلاج ده تعليم الفرد إعادة تركيز مخاوفه وانه يعمل من خلالها من خلال الحديث عن مخاوفه.

خيارات علاج قلق الموت منها:

العلاج السلوكي المعرفي (CBT)

العلاج السلوكي المعرفي أو CBT بيساعد المريض انه يغير من نمط سلوكه بحيث يقدر يكون سلوكيات وطرق تفكير جديدة.

الدكتور هيساعدك في انك توصل لحلول عملية للتغلب على مشاعر القلق. من الممكن يشتغلوا على تطوير استراتيجيات تسمح للشخص بالهدوء وعدم الخوف لما يتكلم أو يفكر في الموت.

العلاج النفسي

بيتضمن العلاج النفسي الكلام عن القلق والمخاوف مع طبيب نفسي أو معالج نفسي. وهيساعد الطبيب الشخص في انه يعرف أسباب مخاوفه، وهيساعده في انه يضع استراتيجيات للتعامل مع المخاوف اللي بتحدث على مدار اليوم.

ساعات، الكلام عن القلق بيساعد  الشخص في انه يحس بانه قادر يسيطرعلى خوفه.

العلاج بالتعرض

بيعمل العلاج بالتعرض عن طريق مساعدة الشخص على مواجهة مخاوفه. بدلاً من دفنها أو عدم الاعتراف بيها، وبيتم تشجيع الشخص على مواجهة مخاوفه.

هيقوم الشخص المعالج بتعريض الشخص المريض لخوفه تدريجيًا، في بيئة آمنة، لغاية ما يقل رد فعل القلق، ويتمكن الشخص من مواجهة أفكاره ومشاعره دون خوف.

أدوية

لو شخص الطبيب الشخص بانه مصاب بحالة صحية نفسية معينة، زي اضطراب القلق العام (GAD) أو اضطراب ما بعد الصدمة (PTSD)، فممكن يوصف أدوية مضادة للقلق وده بيشمل الأدوية المضادة للاكتئاب.

ساعات، لما بيتم العلاج بالأدوية إلى جانب العلاج النفسي، فإنه في الغالب ما بيكون أكتر فاعلية.

هو صحيح الدوا ممكن يخفف من مشاعر الذعر والتوتر على المدى القصير، لكن على المدى الطويل ده مش بيكون أفضل حل.

تكتيكات للاسترخاء

تكتيكات الاسترخاء

من الحاجات اللي بتساعد في تحسين الصحة النفسية، وده بيشمل القدرة على التغلب على القلق، الامتناع عن تناول الكحوليات والكافيين والنوم جيدًا وتناول أكل صحي.

لما يعاني شخص من القلق، في بعض الحاجات اللي ممكن تهدي من مخاوفه. زي:

  • تمارين التنفس العميق
  • التركيز على أشياء محددة في الغرفة، زي حساب عدد البلاطات في الغرفة.
  • التأمل

في الآخر، احنا ممكن نقول ان من الطبيعي ان يكون عندك مخاوف تجاه المستقبل وتجاه مستقبل الناس اللي بنحبهم، ولكن لو استمر قلق الموت لأكتر من 6 شهور أو أعاقك عن ممارسة حياتك الطبيعية، فننصحك تروح لدكتور فورًا. وعشان تتغلب على خوفك من الموت في طرق كتيرة اوي تقدر تستخدمها، ولكن احنا بننصحك انك تتوجه لأقرب طبيب نفسي ليك وهو أكتر واحد هيقدر يوجهك ويتابعك أثناء العملية دي.

عن الكاتب

أحمد شوكت