الاخوات مبيحبوش بعض
من اكتر الظواهر الـ ممكن تلاحظها فى جيلنا ان اغلب الاخوات مبيحبوش بعض !وكان لازم عشان تتفادى المشاكل دى وانت بتربى عيالك انك تعرف اسبابها
الاباء والامهات عليهم نسبة كبيرة جدا فى حب ابنائهم لبعض واهمها
- انك متفضلش واحد على التانى
- مينفعش تاخد طفل وانت خارج وتجبلة كل ماتشتهى الانفس وتلذ الاعين وتقولة متقولش لاخوك لما تروح (عشان مش معاك فلوس تجيب للتانى) يبقى مكنتش تجيب للاولانى
- لازم دايما تخليهم على بال بعض يعنى مينفعش تاخد رأى واحد فيهم والباقى انت مش حاططهم فى الحسبان وكل ما واحد يتكلم تقولة اسكت انت !
- ايوة ابنك البكرية بس دا مش مبرر انك تميزة وتعظمة وتفخمة عن باقى اخواتة
- لازم وانت بتشترى لعب لطفلك تعرفة ان اللعبة دى مش ملكة لوحدة دى بتاعتة وبتاعت اخواتة بس هو شارك فى اختيارها
- متهميلش عيالك وترجعى تزعلى لما يظنشوكى وتقول العيال معدتش بتعبرنى وطول اليوم مع صحابهم مانتى كنتى بترغى مع صحباتك وجيرانك طول اليوم وبتسبية يتفلق يكلم نفسة
- الحق حق والـ غلط يتحاسب حتى لو الـ غغلط دا اكبر واحد فيهم .. مش عشان الصغير تسكتية بكلمتين وتاكلى حقة عشان ابنك الكبير مش هتقدرى تحاسبية !
- عودى عيالك ان عادى اخوك يلبس لبسك طلاما جة على ادة اية المشكلة وانك تلبس لبسة لو عجبك حاجة من عندة .. انتوا اخوات
- ديما حسسى اطفالك ان اكبرهم مسؤول عن اصغرهم هتلاقيهم بيريحوكى فى التربية جدا وبيمشوا على نهج بعض وفى الاول والاخر عيالك هما مسؤوليتك وعلى ما اتعوديهم وتديهم من الاهتمام هيتردلك فى يوم من الايام لما يكبروا
