العيال

التوحد اضطراب ولا مرض؟

التوحد-اضطراب-أم-مرض

ظهر فى العصر الحديث لينا تشخيص جديد للاعراض اللى بتصيب بعض الناس …وخصوصا بتظهر عند الاطفال وهو التوحد ولحد الان العلم ماعرفش يحدد سببه غير انه اضطراب عصبى …. بس سبب الاضطراب ايه كلها احتمالات مفيش تاكيد لاى سبب:-

جينات وراثية ، زواج اقارب ، الحمل فوق سن 40عند النساء.، خلل كروموسومات، تناول الكحوليات او العقاقير الطبية، تناول منشطات، ارتفاع السكر او الضغط اثناء الحمل ، تعرض للاشعة، الخ..

كل دى تخمينات وماقدرش العلم لحد دلوقتى تحديد السبب الفعلى ولكن بيتم اعطاء المقبلين على فكرة الانجاب نصايح عديدة

  • اجراء الفحوصات الطبية قبل الزواج
  • تجنب زوج الاقارب
  • عدم تعاطى الام للكحوليات والمواد المخدرة اثناء الحمل
  • الاهتمام بالغذاء الصحى والبعد عن الfast food
  • تجنب الضغط العصبى والسكر اثناء الحمل
  • متابعه دوريه للحمل مع طبيب مختص
  • عدم التعرض للاشعة اثناء الحمل
  • عدم الانجاب فى عمر متقدم فى احصائيات كتير بتشير ان اغلب الامهات الحوامل فوق ال40تعرضت اطفالهم لمشاكل صحية مختلف

كل اللى فات دا بينحدر من التوحد الجينى او اى اضطراب او مرض يصيب الاطفال: طب هو فيه نوع تانى للتوحد؟ الاجابة ايوة فية توحد مكتسب ودا سببه بيئه المحيطة بالطفل. زى ايه :-

  • الطفل بيشوف التلفزيون لساعات طويلة
  • وجود اخ او اخت اكبر منه مصاب بالتوحد عامل التقليد عليه دور كبير فى تنمية شخصية الاطفال
  • عدم وجود لغة حوار بين الطفل والاسره

نعمل ايه لما يبقى عندنا طفل مصاب بالتوحد

فى حالة ان التوحد جينى…..لازم نفهم انه مش مريض وإن التوحد مش مرض ذهاني وإنما: اضطراب.

  • نتقبل الامر ونتعامل معه زيه زى اى حد عصبى ،هادى،خجول .. بيكون للمتوحد بيئه خاصه بيه
  • لازم زيارة طبيب مخ واعصاب لان احيانا بيصاحب التوحد بعض المشاكل اللى بتحتاج ادوية زى فرط الحركة
  • طبيب نفسى فى حالة وجود اى مشاكل نفسيه او ايذاء للنفس او الغير
  • اخصائى نفسى واخصائى تخاطب لوضع برامج تأهيليه تساعد المصاب باضطراب التوحد التعايش مع البيئة الخارجية
  • وفى كتير من الاحيان لما بنستغل ونوظف طاقتهم صح بيطلع منهم مواهب وقدرات ذكاء تفوق الانسان الطبيعى
  • المصاب بالتوحد مش مجنون …محتاج تأهيل فقط!
  • اما بالنسبه للمصاب بالتوحد المكتسب ويندرج تحت مسمى سمات توحد…وحاليا اسمه طيف توحد

المطلوب من الوالدين:-

  • فى حالة وجود طفل تانى فى الاسرة مصاب بالتوحد تجنب اكتساب الطفل نمط التقليد
  • عدم ترك الطفل امام التلفويون لساعات طويلة خصوصا  فى الاعمار الصغير حتى يستطيع الطفل تكوين ثروة لغوية…..(التليفزيون..والموبيل..واللاب توب) مش بيخلوا الطفل يتكلم اسرع بالعكس بيقللوا نمو اللغة عنده
  • عدم ثبات المثيرات السمعية على نبرة ثابته
  • عدم ثبات المؤثرات البصرية على شكل كرتون متحرك بالوان محدده فقط
  • خلق لغة حوار مع الطفل منذ الولاده…ونصح واهتم بعض علماء النفس الامهات الحوامل بالكلام مع اطفالهم وهما فى بطنهم …متخيلين اهمية لغة الحوار

وفى الاخر تانى باكد المصاب بالتوحد عنده اضطراب مش مرض ومش عايزين علاج علشان يخف.. دا اضطراب ثابت فى شخصيته دورنا نساعده وناخد بايده يتكيف على الوضع ونعمل له برامج تأهيلية

مع تمنياتى حياة اسرية سعيدة ❤
شيرين محمود زمرة

عن الكاتب

شيرين محمود زمرة

أنا شيرين محمود زمـرة، أخصائية تخـاطب، وأشارك بنصائح للأمهـات عامة عن التعامل مع أطفالهم. اخدت دبلومة فى التخاطب...ودراستى فى الاساس فى مجال التربية خريجة كلية التربية جامعة عين شمس...واخدت دبلومة كمان فى طرق التدريس...وبحضر دورات كتييير ومحاضرات عن التربية وتعديل السلوك وتنمية بشرية....مهتميه انى اكتب وارشد الامهات عن طرق تربية الابناء من اجل حياة أفضل ....المجتمع الصالح بيبتدى بالاسرة الصالحة....أرحب بكم للتواصل معي والاستفسار ورايكم فى كلامى مباشرة من خلال الضغط على رابط الفيسبوك في حالة وجود أي استفسارات لديكم.