أسئلة لازم تسألها قبل ما تمشى من الانترفيو
دايما بتتسال لو عندك أي سؤال أو استفسار في نهاية الانترفيو . قبل ما تتسرع وتقول “لأ ” وتمشى ، افتكر أن سؤالك مش بس هيزود فرصتك في أنك تتقبل في الشغل لكن كمان هيديلك معلومات عن الشغل الجديد .
- اسأل عن ثقافة الشركة :
المقصود بثقافة الشركة هنا هي الجو العام في الشركة بين الموظفين ، منها السلوك وطريقة التعامل والقيم والأنشطة اللى بيقوموا بيها ، وده هيساعدك أنك تتعرف على بيئة الشغل وشعورك هيكون ايه فيها .
- نموذج ليوم الموظف:
من الأسئلة المهمة والحاسمة هي أنك تعرف ايه هي مسئولياتك المحتملة . وبالسؤال ده تقدر تكون صورة عن شكل اليوم الوظيفى بتاعك والمشاكل اللى هتواجهها ، كمان هتتعرف أكتر على أصحاب الشغل اللى هتشاركهم فيه .
- الخطوة اللى بعد المقابلة :
بعد الانترفيو بيكون في فترة صعبة اللى بتستنى فيها النتيجة أن حد يكلمك أو يبعتلك ايميل ، علشان تتجنب الضغط ده وتسهل على نفسك اسأل عن الوقت التقريبى اللى هيكلموك فيه لو اتقبلت في الشغل ولو في خطوات تانية ازاى ترتبلها كويس ، ومتخافش أنك تطلب معلومات أكتر تفيدك وتخليك تحس بثقة .
في الآخر كمان متنساش أنك تشكر أصحاب الشغل بعد الانترفيو ، وفى حالة لو تم رفضك متيأسش ، لكن اطلب من الشركة أنها تشرحلك أسباب رفضك وده حقك قانونيا أنك تحصل على إجابة شاملة ، وده هيساعدك أنك تعرف نقط ضعفك وتقدر تتغلب عليها في المرات التانية .
