الدمـاغ

إوعى تعيش زومبي !

كتبها Rana El Kelaya

إزاي تقتل إنسان و يفضل عايش؟  جملة علقت في دماغي من ساعة ما اتفرجت على مسلسل “30 يوم” في رمضان اللي فات و اللي بيحكي قصة واحد اتحط في تجربة نفسية رهيبة,بيتعرض فيها لضغوط نفسية يومية لمدة 30 يوم ! لحد ما يصبح زي الميت تماما و يتغير تغير جذري حتى بعد إنتهاء التجربة!

يمكن يكون الظروف اللي اتعرض لها البطل في المسلسل ظروف قاسية شوية و خيالية شويتين و صعب حد يتعرض لكل ده في وقت قصير كدة إلا لو كان بجد ملعون و القدر و الحظ و الكون كله بيتآمر ضده ! و لكن ده ميمنعش إن كتير مننا بالفعل بيتعرضوا لضغوط نفسية يومية و ممكن تأثر عليهم نفس التأثير ده لو كانوا أصلا نفسيتهم ضعيفة و هشة.. فيكملوا حياتهم و يعيشوا و لكن زي الزومبي بالظبط.. مفيش أي شعور أو سعادة أو إستمتاع بالحاجات البسيطة اللي كانوا بيستمتعوا بيها في يوم من الأيام.. حاجة جواهم بتموت و للأسف بيبقى من الصعب تاني إحيائها و بتحتاج إلى وقت و علاج طويل.

وللأسف أيضا إن ضغوط الحياة أمر لا مفر منه ومنقدرش نتحكم فيه و لكن اللي ممكن نتحكم فيه هو قوتنا النفسية. يعني زي ما بنروح نتمرن في الجيم علشان جسمنا يكون قوي و يقدر يستحمل, كمان لازم نمرن نفسيتنا علشان تبقى أقوى و أكثر قدرة على مواجهة صعوبات الحياة اليومية و بالتالي نعيش حياة بجودة أحسن و لا نفقد أجزاء مننا تدريحيا لحد ما نوصل لمرحلة الزومبي!

طيب إيه اللي ممكن نعمله علشان نمرن نفسيتنا و نخليها أقوى؟

طبعا هو مفيش حل سحري و زي ما التمرين في الجيم بيحتاج وقت و إلتزام علشان يبان تأثيره عالجسم, كذلك تمرين النفسية بيحتاج وقت و إستمرار علشان يسيب أثر فعلي على النفس فيصبح الإنسان أقل عرضة للإكتئاب و القلق و يصبح أكثر مرونة في إستقبال الضغوط و المصائب و التعامل معها بشكل هادي و حكيم! و علشان نتحكم في نفسيتنا لازم الأول نتحكم في عقلنا و دي 5 حاجات لو بدأت تعملها هتقدر تزود مرونتك و تقوي نفسيتك

1- غير طريقة تفكيرك و نظرتك للأمور: راجع طريقة تفكيرك. لو لقيت أفكارك دايما سلبية و بتنظر لأمور حياتك من منظار ضيق و زاوية واحدة,يبفى انت محتاج تغير أفكارك و نظرتك بسرعة! التفكير الإيجابي و القدرة على الرؤية الواسعة و الشاملة للمواضيع كفيلة بتقليل معدلات الضغط و القلق لديك بشكل كبير. مش بنقول ام التفكير الإيجابي ده حل سحري لكل المشاكل, لأ طبعا و لكن هو عنصر رئيسي في أي جسم صحي و نفسية سليمة!  بلاش أفكار سلبية.. بلاش نتوقف عن التفاصيل البسيطة اللي ممكن تعدي.. بلاش كلام كتير فيما لا يفيد.. خلي دايما عندك نظرة شاملة و ركز عليها!

2- خلي هدفك في الحياة و معناها واضح قدامك: لو مش عارف ايه هدفك أصلا يبقى لازم تقف شوية و تبذل مجهود في إنك تحط أهداف لحياتك و أحلام نفسك تحققها. خلي عندك كل يوم حاجة تحمسك انك تصحى مخصوص علشان تعملها. دور على شغفك في الحياة و اشتغل عليه و ابدأ بخطوات بسيطة لحد ماتزود ثقتك في نفسك.

3- اتغلب على مخاوفك: لو في مواقف معينة أو حاجات بتخوفك و موقفاك في حياتك. ابدأ عرض نفسك ليها واحد واحدة لحد ماتتعود و تبطل تخاف و تقلق منها و بالتجارب و التكرار هتلاقي نفسك بطلت تخاف و تقلق كتير.

4-اتحكم في عواطفك: يمكن نكون مبنتحكمش في الظروف بس دايما ممكن نتحكم في عواطفنا و طريقة إستقبالنا و تعاملنا مع المشكلة. يعني ممكن نتقبلها و نبدأ نتصرف بهدوء و نفكر لحل فعلي للمشكلة و نبدأ نتحرك في طريق حلها أو ممكن نزعل و نشتكي و ندخل في دايرة من الحزن لا تنتهي و لا تفيد بأي شكل من الأشكال. اتحكم في عقلك و مشاعرك و انت تقدر تطلع من أي مشكلة.

5- تصالح مع ماضيك: أحيانا بيكون سبب من أسباب الهشاشة النفسية هو ترسبات الماضي و التجارب السيئة اللي مررنا بها و لكن لم نعالجها نفسيا كما ينبغي. لازم تتصالح معاها و تواجها و تعالجها و لو مش قادر, يبقى حاول تستعين بمتخصص علشان يساعدك تتخطاها.

6- إهتم بنفسك: من الآخر لازم تظبط 3 حاجات في حياتك قبل ما تفكر تظبط اي حاجة تانية و هما الأكل و الرياضة و النوم ! ال 3 حاجات دول هما اللي يضمنولك انك تبقى في أحسن صورة ليك فتقدر تفكر أحسن و تقدر تتصرف أحسن. نوعية أكلك و مدة و جودة نومك و لياقتك عامل رئيسي في حسن تفكيرك و تقديرك للأمور و نجاحك في الحياة عامة فلا تستهون بهم !

عن الكاتب

Rana El Kelaya