هل حبيبي انسان نرجسي

هو الانسان يعرف يبعد عن شخص بعد حدوث تجاوزات بينهم
احنا ارتبطنا سنين لانه كان زميلي فالكلية بس حصل تجاوزات بيننا بعد ضغطه عليا و تهديده انه هيقول ل أهلي او تخويف و شوية اصل انا بحبك و هنتجوز و الكلام دا
هو دلوقتي قابل أهلي عشان يخطبني بس انا خايفة أكون بحبس نفسي في حياة تعيسة بسبب اللي حصل و خوفي من اني أسيبه
انا شاكة انه نرجسي و خايفة أكمل و مش قادرة أخد القرار اني أبعد
– الفكرة اننا مش متفاهمين خالص و مؤخراً كلامنا كله خناق
– عايزني اتحول لشخص تاني و اغير لبسي و عنده شروط كتيرة
– كنت فالأول بسمع كلامه عشان بحبه و فاكرة ان دا حب و غيرة و خوف كنت مغيبه رغم ان صحابي حذروني معرفش ازاي مخدتش بالي رغم اني كنت قوية و ببعد عن أي علاقة زي كدا و مليش فالارتباط او التجاوز
– مبقاش يسمعني ولا يتناقش عايز يفرض رأيه وخلاص
– هو ممكن يشتم و يغلط فيا وقت الخناق كمان و ممكن يمد ايده و بيقولي انا بحاول ابطل بس مبيبطلش غلط و أذيه
– مبيراضينيش ولا بيعتذر خالص
– احنا دكاترة و انا عايزة اتعامل مع الناس و انزل اتدرب حتى مش موافق
– عايز يختارلي لبسي و استأذنه قبل ما انزل و متأخرش عن معاد معين و كان بيعاقبني لما اتأخر او مسمعش الكلام
فعليا كنت مغيبه و محبوسه بسمع كلامه و بس و بخاف منه و بعمله حساب
انا فعلا قولتله اني شاكه انه نرجسي قعد يتريق و مهتمش و قالي انه عمره ما هيروح لدكتور نفسي ميعرفوش يحكيله حياته و مش مقتنع ولا عايز يغير من نفسه للأحسن
مبقتش حاسة ان حياتنا سوا هتنفع او ان دي الحياة اللي انا عايزاها حاسة انه ضدي و حياتنا بقت حرب مفيش أي تفاهم
حاسة اننا مكملين بس عشان اللي حصل بيننا هو مش عايز يحس بالذنب و انا مش هقدر اتعايش مع فكرة اني عملت كدا مع شخص و اتجوز غيره
هو مش عايزني زي مانا هو عايز واحدة تانية بشكل تاني مش شبهي و بدأ يبقى متشدد في كل حاجه مبقتش عيشة خالص
هو عايز ست تسمع الكلام و بس و متجادلش في حاجه تبقى تابع ليه
طالما هو عايز واحدة تانية ليه ارتبط بيا و عايز يغيرني ليه يعمل معايا كدا و ازاي مخافش عليا
هو بعدني عن صحابي و عايز يبقى هو الأول و الأخير في حياتي و عايز يقفل عليا هو فعلا قالي كدا من باب الحب بس دا اللي حصل فعلا و الموضوع بقى مرض
انا شاكة انه نرجسي و حياتنا سوا هتبقى عذاب هو بيتبسط لما يستفزني و يغيظني و اعيط قدامه معندوش مشاعر
مش حاسة اني عارفة ابقى على طبيعتي او ابقى نفسي على طول متوترة و خايفة
طبعا مفيش حد أقدر أحكيله أو اخد رأيه ولا هعرف أروح لدكتور نفسي
اتمنى حد يساعدني
انا استخارت ربنا كتير و معرفش برضو فين الصح بحاول أكمل للأخر عشان خايفة أندم
هل هو كدا انسان مريض و الأحسن نبعد
هل هو ممكن يفضحني مع أهلي لو بعدت عنه
هل انا هعرف اعيش حياتي عادي من غيره بعد اللي حصل