مشاكل في التركيز والإحساس بالواقع
انا عندي ١٧ سنة
بعاني من مشكلة في الاستيعاب والتركيز
عندي نقص في الحديد مش كبير والدكتور كتبلي دوا ماشية عليه من فترة بس مش حاسة بأي تحسن نهائي بال بالعكس حالتى بتتدهور بمرور الوقت ، انا بعاني من مشاكل في التركيز من سنين بس الشهر الأخير ده الموضوع زاد بشكل مرعب ومأثر على تحصيلي الدراسي وأبسط الحاجات اللي بتتطلب مني تفكير مبقتش عارفة اعملها ، عدلت نظام نومي وبقيت بمارس المشي بشكل منتظم وباكل كويس وبرضو مفيش تحسن ، دايمًا بحس إني نص صاحية ومش بستوعب أي معلومة كإن المعلومات بتدخل من ودن وتطلع من الودن التانية من غير ما تعدي على دماغي وأبسط مثال هو استيعابي للمواد الدراسية يعني ببقى قاعدة في الحصة مش مش فاهمة لأ انا اصلًا مش مستوعبة المعلومة عشان احدد انا فاهمة ولا لأ ومهما حاولت ابذل مجهود عشان استوعب وافهم المواد مفيش حاجة بتثبت في دماغي وحتى في المهام الروتينية مبقتش اركز .. ساعات بصحي من النوم البس واجهز حاجتي وامشي للمدرسة واوصل ومستوعبش إني عملت كل ده إلا بعد ما اوصل بشوية
بإختصار حاسة إني فقدت القدرة على التفكير المنطقي وربط المواضيع أو مخي أصاب بتبلد لدرجة إني بدأت أشك في قدراتي واقتنع إن انا اصلًا غبية ، غير مشاكلي في الذاكرة دي موال وحده
استشرت دكتور ومعالج قبل كدا الدكتور قالي إنه بسبب الانيميا والمعالج قال إنه اكتئاب وقالي اروح لدكتور يكتبلي مضاد اكتئاب بس اهلي رفضوا.
و حياتي متوقفة حاليًا بسبب الموضوع ده وحاسة إني هتجنن من كتر منا مش عارفة ايه السبب وإني جربت كل حاجة ومفيش حاجة نافعة وإني الموضوع عمال يزيد مع الوقت
فكرت أنهي حياتي بس حتى مش لاقية سبب مقنع واحد
آسفة على الإطالة وعدم ترتيب الكلام اتمنى تكون مشكلتي وصلت بشكل واضح وشكرًا.
أنا شايفة إنك تعملي تحليل قياس نسبة فيتامين B12 و B6 لإنك أكيد عندك نقص كبير فيهم حتي مش لازم تحليل ممكن تاخديهم كمكمل غذائي مش هيضر وهيساعدك علي التركيز وأفضل نوع تاخديه Methyl-B- complex مرة في اليوم بعد الغدا مع أوميجا-3 وسط الأكل مرة في اليوم برضو ، دول هيساعدوكي كتير علي التركيز والمذاكرة ولو عايزة نتائج أسرع وفائدة أكتر تاخدي حباية Ginko biloba بعد الأكل دي بتنشط وبتقوي الذاكرة ، التلات مكملات دول لو أخدتيهم مش هتحتاجي أصلا تروحي لدكتور لإنو واضح إنتي عندك نقص حاد فيهم ، هلخصهملك تحت:
1- Methyl B Complex
2- Omega 3 Plus
3- Ginko biloba
وأنصحك تعملي تحليل قياس نسبة فيتامين D لو عندك أعراض مثلا زي ألم العضلات والعظام والخمول والتعب العام والإرهاق والإكتئاب لإنو احتمال كبير عندك نقص فلو طلع ناقص تاخدي فيتامين D-3-10000 Iu تلات مرات في الإسبوع وسط الغدا ويفضل لو الأكل دسم.
وأهم حاجة متقلقيش حالتك مش ملهاش علاج ولا حاجة دي نقص فيتامينات مش أكتر بس لو حصل لك كدا بعد صدمة مثلا أو عندك إضطرابات نفسية أو مشاكل أسرية أو تنمر أو أي مشكلة عموما كانت مزهقاكي قبل متوصلي لكدا يفضل تروحي لمعالج وتحكيلو مشكلتك بصراحة مش تقتصري علي عدم تركيزك علشان تحلي الأصل ، وزي مقولتلك تاخدي المكملات دي وانتي هتبقي تمام إن شاء الله .
