عن العزله الاختياريه اللي اصبحت بالنسبالي ادمان..

انا بنت عمري 16سنه، في الواقع بقيت عايزه اعيش في الكوكب لوحدي، انا مليش صحاب مش مهتمه بالسوشال ميديا عموما، في خلافات بين ماما وبابا من سنتين كاملين و حاليا انا بقيت بنعزل عن اهلي ومش بحب اقعد معاهم ، قاعده لوحدي معظم الوقت في البيت مخرجتش من 3شهور غير للضروره القصوي، يعني حتي مش بشوف الجيران، و طفولتي كانت اسوأ ذكريات، متعوده علي المشاكل اللي بحلها مع نفسي، بس المره دي حاسه اني مش عارفه اتخطي لوحدي، انا مش عايزه اشوف حد ولا اتكلم مع حد ومنعزله عزله اختياريه من 3شهور مخرجتش ومحدش من زمايلي سأل عليا عشان انا منطويه، كل اللي حاسه بيه اني عايزه اتخلي عن وجودي وسط اهلي ومجتمعي واعتزل الكل واثبت وجودي مثلا في الدراسه انا في تانيه ثانوي حاليا بس منزلتش دروس، ومش عارفه اخرج من عزلتي ولا احب اللي حوليا،انا مضطره اقول اني كنت بتعرض للتنمر في الطفوله، اتعرضت للخذلان من صديقتي المقربه، اتعرضت للتحقير والاهانه من والدتي، بكره اشتكي او افضفض لأي حد لاني مش عايزه افتكر الماضي ولاني بكره الشكوي،عندي حاله من الرهاب الاجتماعي، ممكن مساعده بوجهة نظر او نصيحه لاني مش مستعده اعرف ناس جداد، حاليا حاسه اني مش مستعده اخرج للعالم واواجه خايفه، متردده، عارفه اني لازم هتعامل مع الناس وان مش لازم اهرب، بس مش عارفه ازاي وخصوصا ان طريقه تفكيري مختلفه كتير عن زمايلي و مش بتكلم كتير
حاسه اني مكتفيه بنفسي جدا ومش محتاجه حد وخصوصا اني ذكيه بفهم نفسي وبحل مشاكلي وكمان بحفز غيري، بس شعور اني لازم اخد حد معايا زي اختي في اي مكان اروحه مش عاجبني وليه مش قادره اتعامل مع الناس طبيعي، ليه ببقي خايفه ومخنوقه،ممكن حد يفيدني بنصيحه او وجهة نظر؟
اسفه اني طولت كلام! حكيت قصه حياتي 😅