عدم الرغبه فى الزواج

طول عمرى رافضه فكره الزواج ومش موافقه عليه وجالى خطاب وكنت بحس بضيق وعدم ارتياح وكنت بعيط كتير ومش باكل و فى الاخر برفضهم لما بلاقى سبب، بس المرادى جالى واحد فيه مميزات كتير وطيب واهلى موافقين عليه بس انا مش مرتاحه ليه ومش حابه شكله ومكتئبه وقعدت فتره مش باكل واهلى بيفضلوا يقولولى انه كويس واديله فرصه بس انا مش مرتاحه وبحاول اقنع نفسي انى مبسوطه واضغط ع نفسى لما اكلمه واقول يمكن بعدين اتعود عليه ويعجبنى، بيفضل يقولى كلام حلو كتير بس انا مش متقبلاه واى حاجه اقوله عليها بيوافق لدرجه انى خايفه يكون بيكذب عليا، انا مش عارفه مش مرتاحه ليه كشخص ولا عشان طول عمرى رافضه الزواج، وضميرى مأنبنى انى مش مبسوطه وانى كده برفض النعمه اللى ف كتير مش لاقينها، ومش قادره افشكل الموضوع بسبب اهلى، بيقولولى الاختيار ليكى بس لما ابينلهم انه مش عاجبنى بيضايقوا وبنتخانق لدرجه ان ف مره ماما قعدت تبكى بسببى، انا مش عارفه اعمل ايه لدرجه انى بقيت بفكر ان الموت اهون او ان يحصلى حاجه. عايزه ابقى مبسوطه حتى عشان افرح اهلى ومنكدش عليهم كل شويه بس مش قادره، مش عارفه هبقى مبسوطه مع الوقت ولا لا..