الشريك المسيطر النرجسي عايزة نصيحة

انا نشرت كتير و عايزة نصيحة من أي حد
انا خايفة أكمل مع الشخص اللي في حياتي لاني شاكه انه نرجسي
احنا مرتبطين بقالنا ٤ سنين و هو زميلي و دلوقتي اتخطبنا
هو مشكلته انه عايز يفرض أرائه عليا غصب غير كدا يقولي هسيبك عشان هو عارف اني مش عايزة اسيبه و هسمع كلامه فالأخر
للأسف حصل بيننا تجاوزات كتير بسبب ضغطه عليا و تهديده ليا انه هيقول لأهلي او انه بيحبني و لازم اسمع كلامه احنا بطلنا و هو شاف انه كان غلط
المشكلة الموضوع دا مأثر على قراري خايفة اسيبه معرفش ازاي هقبل نفسي بعد اللي حصل و اعيش مع شخص تاني بعدين
هو ملتزم و بيصلي بس بيشتم و ممكن يمد ايده عليا بحس بتناقض في شخصيته
عايزني ألبس بطريقة معينة و كل ما اغير لبسي للأوسع عايز أوسع برضو و دايما عايز أكتر
بعدني عن كل صحابي و مبقاش ليا حد
مش عايز معايا أي زمايل رجالة فالشغل و بيبعدني عن أي تعامل
المشكلة لما بحكي لصحابي بيقولولي دا نرجسي حتى منغير تفكير
حاسة اني كنت مخدوعة فيه انا بس و كل دول شايفين حقيقته
انا كل مره بقول عنده حق و بيتكلم فالحلال و بسمع كلامه
بس بدأت أحس انه فعلا بعدني عن كل حاجه و مبقتش نفسي
و مش حاسة ان دي الحياة اللي عايزة أعيشها بعدين ولا دا الجواز اللي هتبسط فيه انا شوفت ڤيديوهات كتير عن الشخصية النرجسية و هو جايب نص الصفات او أكتر حاجه بسيطة
مش متعاطف و ممكن أعيط قدامه يقعد يضحك عليا
بيإذيني بكلامه ولا بيفرقله بحسه معندوش مشاعر ولا بيحس بيا ولا بألمي او تعبي
هو عايز يختار لبسي و لازم استأذنه قبل ما انزل و ارجع قبل المغرب و كل حاجه تحكمات و أوامر
انا بحبه و متعلقة بيه و بحاول أكمل و مفيش سبب قدام أهلي اني أسيبه شايفين انه كويس بس هما ميعرفوش تحكماته و خناقه على كل حاجه و اسلوبه الوحش معايا و خايفة نتجوز يمتلكني بقى غصب و أعيش تحت أوامره
و لما بفتكر اللي عمله معايا بحس انه كان قاصد يإذيني و انه خلاني اعمل حاجات غلط مكنتش عايزة أعملها اكيد دا مش حب
حاسة اني بظلم نفسي معاه
نفسي أي حد ينصحني و ربنا يدلني للصح
انا عديت بفترة من الوسواس و الاكتئاب بسبب علاقتنا و كنت بحكيله فاكرة انه هيفهمني او هيقف جمبي بس هو كان بيدايق و مش مقتنع ان دي مشكلة نفسيه ولا بيقتنع بفكرة الأمراض النفسية كلها او انه يشوف دكتور