ازاى توجد مصدر جديد للدخل؟
الجنيه اتعوم و اللى كان ب 100 بقى ب 500، مرتبك اللى كان معيشك بقى يدوب مكفى الضرورى بس! الحياة بقت صعبة وسخيفة ومليانة ضغط مادى ونفسى وعصبى، بس ده ميمنعش انك تقدر تغير من الواقع ده! كلام تنمية بشرية بقى و هرى اقفش حلمك وكلبش فى طموحك و بتاع؟ ﻻ خالص، دى خطوات عملية انا نفسى مجرباها علشان احسن من ظروف معيشتى.
أول حاجة عشان تزود دخلك:
لو انت شغال فى مجال مش ديجيتال، يعنى مش شغال فى مجال البرمجة او التسويق الالكترونى او كتابة المحتوى، او الجرافيك ديزاين و الذى منه، و شغال فى مجال ادارى روتينى اكتر زى المحاسبة مثلا، حاول تتعلم حاجة من الحاجات الديجيتال دى، السوق دلوقتى بقى محتاج marketing و web developing بالهبل! ليه متتعلمش حاجة زى دى و تطور من نفسك!
اتعلم انجليزى ابوس رجلك علشان مافيش اى حاجة فى الكون مش داخلها انجليزى، انت علشان تتعلم اى مجال من اللى انا قولتهم فوق دول، هتلاقى كورساتهم الاونلاين و كتبهم و مراجعهم كلها بالانجليزى! يعنى حتى لو الكورسات الاونلاين قدامك ببلاش فا انت معندكش لغة تساعدك تدرسها اصلا! متخيل المأساه! (مواقع تتعلم منها انجليزى ببلاش)
طب علشان تتعلم الحاجة الجديدة دى هتعمل ايه:
- هتاخد قرار، علشان التسويف و ال “و الله ما قادر” مش هيفيدوك ب 2 جنيه لب، ولا هتحقق بيهم اى تقدم!
- هتظبط نفسك على انك هتتسحل فترة و هتحس فى الاول انك بتفك طلاسم مش بتذاكر علم، بس عادى كمل و الدنيا هتتظبط مع الوقت!
- اختار مصدر او مصدرين بالكتير اللى تاخد منهم العلم الصافى، و طعم العلم ده بشوية فيديوهات من اليوتيوب على شوية كورسات اونلاين (خفيفة) علشان تاخد المعلومة باكتر من شكل و اكتر من منظور.
- يعنى لو قررت انك تمشى فى الديجيتال الماركتينج مثلا، اعرف العلم نفسه، و بعدين طعمه ببعد سيكولوجى، او بعد اجتماعى، او حتى ضيفله جزء من رأيك الشخصى، و ده مش هيجى غير بالاطلاع و التحربة، حسن من مهارات الكتابة عندك علشان تعرف تكتب محتوى ليه قيمة!
تانى حاجة عشان تزود دخلك:
اتطلع كتير و اقرا كتير و اتفرج على فيديوهات و تابع يوتيوبرز بيضيفوا قيمة فعلا(10 قنوات يوتيوب هيفيدوك فى حياتك)، عرض نفسك لآراء مختلفة من اكتر من منظور علشان تعرف انك مش لوحدك فى الكون و ان اللى بيواجهك من مشاكل ده ما هو الا زوبعه فى فنجال!
اعرف مواقع الfreelance و شروطها و اكتر وظايف مطلوبة فيها من هنا (اهم مواقع الfreelancing).
