ازاي اتخطى و اتقبل
محتاجة مساعدة اتخطى بيها شعوري ده حساه دوامة بتبلعني
الحمد لله على كل حال ربنا قدر ليا اني احس بالوحدة من طفولتي ما كنتش قريبة لاهلي و ما كانش بيعيشلي صحاب كل مرة بتأذي بسببهم أو الدنيا بتشغلنا أو بيشوفوا الاحسن و ده لدلوقتي والله
كنت طالعة ثقتي بنفسي قليلة اوي و دايما حاسة اني مش مسموعة ولا متشافة مش بحس اني ليا أهمية و كمان كنت مهما عملت ما كانش حد بيقولي برافو أبدا بطلع من الاوائل بلعب رياضة بحفظ قرآن كله بيشهد بأدبي و أخلاقي من الناس المحيطة لينا جيران أو صحاب اهلي بس ما كنتش بسمع ده من اهلي ابدا كنت بشوف ده قليل محتاجة اكتر بس جيت تعبت للاسف تعب شديد و لدلوقتي الله ما ارادش الشفاء
انا في ابتدائي كنت مدرسة خاصة وإعدادي ازهري و في ثانوي كنت عام و في الكلية ربنا كتبلي مكان ما اعرفش فيه حد و لا حتى حد بيروح وييجي معايا ما طلعتش بصحاب ولا حتى صحاب طريق
بدافع شعوري ربنا يسامحني دخلت في حياتي شخص مؤذي اذاني وقلل مني لدرجة أني ما بقيتش عارفة اشوف نفسي غير بعينه و في الاخر هو نهى الموضوع و اتجوز بس بعد ما انا اتدمرت
و مرة تانية ربنا يسامحني كنت لحد حد لحد ساعة الخطوبة ما كملتش للاسف أهله و اهلي و مشاكل وهو كمان بعيد عني مفيش تكافؤ رغم كل حاجة واي شعور سيبتها لربنا وقولت خلاص من ترك شيئا لله عوضه الله خيرا منه مع ان كان في أيدي ارجع هو ربنا يوفقه و يسعده خطب بردو
تالت مرة للاسف انا ما سعيتش اني ادخل حد حياتي بس كانت هتبقى جوازة عادية خالص عن طريق الأهالي وكدا و سبحان الله حصل حاجات كتير و كان الموضوع ماشي و خلاص يعني بس ربنا أراد أنها تبوظ بأن الشخص ده كلمني برايفت و انا قفلت معاه و ما ردتش و صديت و فجأة الناس سكتت و اتقفلت والموضوع باظ وهو كمان خطب بس كنت اتعلقت و بتخطى علاقة ما دخلتهاش
انا حاسة أني تايهة ما بين اني اتأذيت و ما بين اني اتعلقت و ما نولتش و حاسة بالذنب كأن ربنا بيعاقبني و حاسة بالوحدة مشاعر سلبية مستمرة لدلوقتي رغم أن المواقف عدت و خلصت حياتي واقفة بسبب اني مش متخطية مش عارفة اعمل حاجة و على طول بعيط وصحتي كمان باظت حياتي تقيلة اوي و كل حاجة عادية بقت صعبة انا مش عارفة اعمل ايه عاوزة اعيش طبيعي اتقبل شعوري أو أنساه أو ما احسش انا حاسة أن كل جزء مني في حتة خايفة افضل كدا و مش عاوزة ابقى كدا بس مش عارفة اطلع و بفكر كتير اوي و بخاف و بقلق و ما بقتش عاوزة حد في حياتي تحت أي مسمى كل اللي عاوزه اتقبل
