سلوكيات عنيفه وسرقة
السلام عليكم
اختي عندها 12 سنه هي قعدت خمس سنين كانت الصغيره ومتدلعه وكده
بعدها جه طفله ف اكيد الاهتمام اتنقل ليها وكده كمولود جديد يعني
بس احنا لاحظنا غيرتها منها ف كنا بنحاول كتير ان نعملها كل حاجه زي اختها الصغيره وكده عشان متبقاش متضايقه
بس برده كانت بتتخانق معاها كتير بس عادي زي اي اخوات وغيره عاديه الموضوع مكانش مشكله كبيره خالص
لما بدأت بقا تدخل سن المراهقه
سلوكها معانا كلنا بقا وحش بقت عنيده اوي واسلوبها وحش
وخناقها مع اختها زاد كتير وبقا كره وبتتمني انها تموت وتخلص منها
وبتقعد تقولنا محدش فيكوا بيحبني وانا بكرهكوا كلكوا
وانتو مش اهلي
رغم اننا بنحاول نقرب منها ونكون كويسين معاها وكده بس بترفض
وهي صغيره شويه كانت كويسه كانت بتصلي وبتسمع الكلام عادي وكانت بتحب المدرسه وبتحب صحابها وبتقرأ كتب ومجلات وكده
لما كبرت بقت بتكره المدرسه جدا ومش عاوزه تروح
ومبقتش تصلي خالص
واتعرفت ع صحاب مش كويسين
وبقت بتستمد الحب كله منهم تقريبا وشايفه انهم احسن حد ف حياتها وكده
وعاوزه تقلدهم ف كل حاجه
وهو احنا ك اسره لما بنبلغ ونتحجب وكده ماما معودانا نلبس طويل وواسع مش بناطيل وكده
ف هي كانت مش محجبه لحد من سنه
مكناش عاوزين نجبرها خااص عشان عارفين ان هي عنيده
وسبناها لحد اما قررت مع واحده من صحابها يتحجبوا سوا
بس كانت بتلبس قصير وبناطيل عادي عشان كانت لسه صغيره
السنادي ماما خلتها تلبس جيبه
ف الاول كانت معترضه بس اقنعناها شويه ولبستها عادي
بعدها رجعت تقول لماما ايه يعني اما اقلع الجيبه وصحابي مش محجبين
وانا عاوزه اكون زيهم
ف هي عموما يعني هي سلوكها بقا وحش ف كل حاجة مش بتحترم ماما ولا بابا وحتى كده مع اغلب قرايبنا برده بتتعامل بأسلوب مش كويس
يعني المشكله مش ف انها عانده معانا وكده
واي حد بينتقدها بتكرهه
وشايفه انها احسن مننا كلنا وانها تستحق كل حاجه حلوه
حاليا أكبر مشكله اننا من فتره من كام شهر
اكتشفنا انها بدأت تاخد فلوس من ورانا
بابا عامل خزنه بمفتاح ف البيت بقت كل فتره تاخد 200 جنيه
اول مره عرفنا ماما واجهتها
أنكرت وقعدت تقول انا لقياها ف الشارع وكانت بتتكلم بثقه وثبات ومش بتخاف
ف ماما قالت نعمل كأننا صدقنا وهي اكيد هتخاف تعمل كده تاني طالما احنا عرفنا
بعدها بفتره لقيناها خدت فلوس برده ماما قالت هناخد الفلوس ومش هنواجهها ونشوف هاعمل ايه
احنا كنا خايفين نجرح مشاعرها وكده ونفسيتها تتأثر
سكتت يومين وجت تسأل ماما ع الفلوس راحت فين
ف قالتها فلوس ايه وجبتيهم منين
قالتلها دي صاحبتي جايبهملي اشتريلها بيهم حاجه وماما خلتها تكلم صاحبتها قدامها وصاحبتها ايدتها ف كلامها
كانت متفقه معاها
لان تالت مره عرفنا انها معاها فلوس ماما واجهتها برده
وكنا قلقانين اوي لان كان الأسبوع ده مفيش فلوس ف خزنه البيت ف خوفنا تكون سرقت من حد برا البيت
ف ماما لما واجهتها قالتها اه كنت باخد م الدرج بس اخر مرة دول لقيتهم ف الشارع
وفضلت مصممه ع كده
وبرده كانت مش خايفه ولا بتتوتر ولا حاجه
احنا ف المره دي معاقبنهاش عشان قولنالها قولي الحقيقه وكده ومش هنعملك حاجه عشان نعرف جابتهم منين
ف بعدها انا قعدت اتكلمت معاها وسألتها انها ليه بتاخد فلوس واحنا بنجيبلها الي هي محتجاه وكده وبابا كان زودلها مصروفها قولنا ممكن ده يكون حل وبدأنا نهتم بيها اكتر
قالتلي بكون محتاجه حاجات انتوا مش هتجبهولي
بس الفكره ان هي كل مره بتصرف الفلوس ع شيبسيات وحاجات حلوه يعني وكده مش ع حاجة مهمه خالص
وكمان ف الاجازه مثلا لما مكانتش بتاخد مصروف
مخادتش فلوس
خدت ع بدايه الدراسه
ف اعتقد انها بتحب يكون معاها فلوس قدام صحابها عشان هما مستواهم احسن وكده
ماما فهمتها كتير ان مش صح نقلد كل الناس ف كل حاجة وكل واحد وحياته وكده
بس هي بقت متمرده علينا ف كل حاجه
اخر حاجه حصلت
انا ابن خالتي متجوز ومراته بتعاملها حلو وكويسه معانا كلنا واختي بتحب بنتها الصغيره اوي وكانت بتروحلهم علطول تلعب معاها وكده
ف هما لاحظوا ان كل مره بتروحلهم بينقص فلوس من البيت
وخدوا بالهم كذا مره لحد اما اتأكدوا وكده
ف هي بقت كمان بتاخد من برا البيت
لان احنا غيرنا مكان مفتاح الخزنه عندنا وكده ومعرفتش توصله ف شافت بديل
احنا كنا بنفكر انها ممكن تكون بتاخد فلوس من بابا ك انتقام
لكن هي بقت بتاخد من برا البيت كمان ومن اكتر ناس هي بتحبهم وبيحبوها
انا مش عارفه اعرف ماما انه حصل كده لان ماما بتتعصب بسرعه ومش هتعرف تتعامل صح خالص ف الموقف ده
ف رأي حضرتك انه ايه الحل
وهل ابن خالتي يواجهها من غير مايعرف ماما
ولا التعامل مفروض يكون ازاي
