ليه السوشيال ميديا بتسبب الادمان؟ وازاي نتجنبه؟

خلال العشر سنين الأخيرة كان في حرب نفسية كبيرة بتمارسها وسائل التواصل الاجتماعي علينا كبشر، وهي انهم يستغلوا “الدوبامين” المادة اللي بيفرزها مخ الانسان لما يشعر بسعادة مؤقتة ودي مادة بتتفرز لما تاكل شوكولاتة مثلا أو إنك تتواصل مع ناس بتحبهم، وان مواقع السوشيال ميديا تم تصميمها بشكل يسبب الإدمان إنك كل شوية عايز ترجع تفتح المنصات دي عشان مادة الدوبامين تفضل موجودة اكبر وقت ممكن، مع ان في نفس الوقت الاخبار والصور والفيديوهات اللي الشخص بيشوفها عالمنصات دي بتعرضه للاكتئاب والتوتر او الارهاق بشكل عام.

طب ليه بنرجع للمنصات دي طالما بتأذينا؟

المكافأة

الموضوع ممكن نشبهه بمدمن القمار طول ماهو ميعرفش انه خسران هيفضل يلعب ودكاترة علم النفس السلوكي بيقولوا: “طول ما النتيجة غير متوقعة، السلوك هيفضل يتكرر”، ودا بالظبط اللي بيحصل طول مانت مستني مكافأة معينة من استخدام السوشيال ميديا هتفضل تفتح المنصات دي “ياترى صورتي جابت كام لايك؟”، “مين من صحابي عمل كومنت ؟”، ونستنتج من كده إن الشخص بيستخدم السوشيال ميديا في الأول والأخر عشان يزود مكانته واحترامه لذاته، وكونه شخص مهم ومؤثر.

الخوف من الغياب

علماء النفس بيسموه ((FOMO قول مثلا النت فصل عندك -زي ما بيحصلنا كلنا- وقتها ممكن يصيبك توتر وقلق ان تم استبعادك وانك بتفوت على نفسك دلوقتي فرص- سواء نكتة او ترند أو انك بس تكون موجود وبتشارك، احساسك بإنك غايب ومش متواجد دا بيأثر على مشاعرك وافكارك وممكن يسبب ارق واكتئاب او حتى تشنج في المعدة وصداع.

العصر الرقمي للضعف

السوشيال ميديا معظم مستخدميها بيكونوا مراهقين ودا بيسبب مشاكل وازمات نفسية كتير من سن صغير، بالنسبة للأولاد بتظهر اعراض زي العدوانية الجسدية والصوت العالي، اما بالنسبة للبنات بتظهر في صورة تنمر على غيرهم او انهم يعملوا دواير صحاب صغيرة ويستبعدوا باقى صحابهم منها، وللأسف السوشيال ميديا بتزود الفرص دي بشكل كبير، لأن مش بس هي بتبين قد ايه غيرك مبسوط وانت لا- دي كمان بتوريك إن احنا مستغنيين عنك في خروجاتنا وهزارنا وغيره-.

طبعا الكبار والبالغين مسلموش من خطر السوشيال ميديا، ناس كتير خصوصا البنات بيتم مهاجمة نفسيتهم وثقتهم في نفسهم بسبب صور المشاهير والبلوجرز وقد ايه شكلهم “مثالي” وحياتهم مثالية ودا اللي بيخليهم يلجأوا لعمليات التجميل أو تقليد المشاهير بشكل عام حتى مع اختلاف الطبقات الاجتماعية.

طب ازاي تقلل ادمانك او استخدامك للسوشيال ميديا؟

1-راقب وقتك

عادة لما بتقول للناس ان السوشيال ميديا مضرة مبيوقفوش استخدامها على طول لان دا صعب يتنفذ على ارض الواقع،واحنا بننصحك بأول خطوة انك تراقب وقتك، متغيرش روتينك ابدا وانما راقبه شوف بتستخدم كل موقع لمدة كام ساعة يوميا، وشوف الأوقات دي بتتكرر امتي.

2-شتت نفسك عن المشتتات

زي ما بيقولوا كل نفسك قبل ما حد ياكلك، بعد ما تعرف ايه الأوقات اللي بتستخدم فيها مواقع التواصل الاجتماعي، حط لكل وقت بدايل أو أنشطة تانية، مثلا الصبح العب شوية رياضة او يوجا بدل ما تفتح فيسبوك او انستجرام، قبل ما تنام اقعد مع اهلك شوية اتكلموا او العبوا او شوفوا فيلم سوا حتى، ولو في بريك الشغل او الجامعة حاول تتتفاعل مع صحابك في الشغل أو صحابك في الكلية.

3- حدد وقت معين تفتح فيه المنصات دي

شوف الوقت اللي بتكون مرهق فيه او مريح مبتعملش حاجة وحدد نص ساعة-ساعة بالكتير تفتح فيها المنصات دي والاحسن يكون قبل النوم بساعتين عشان استخدام التليفون/الكمبيوتر ميسببلكش ارق.

4- خليك قدوة حسنة

لو انت اب/أم بننصحك برضو تحط خطة لاستخدام اولادك للموبايل او السوشيال ميديا عموما، مثلا: تحدد وقت قبل النوم مثلا الساعة 9 بتاخد منهم الموبايل في، ولازم دايما تنصحهم وتوعيهم إن أي كلمة او أي حاجة بيظهروها من شخصيتهم وكلامهم على السوشيال ميديا هو بمثابة بصمتهم- اللي بتبين تربيتهم وشخصيتهم ونظرتهم للدنيا.