مشكلة في التذكر، حاجات بفتكرها بشكل جيد، وحاجات بنساها بشكل غريب
أنا بكتب الاستشارة دي بعد ما ما كنت بحضر درس (وأنا مدرس)، وبعد ما وصلت لآخر سطور في الدرس تذكرت إني كنت محضر نفس الدرس قبلها بأسبوع واحد بس!
أنا مدرس، تخيلوا فتحت درس عادي للمرحلة الإعدادية وقرأته ولخصته على دفتر التحضير، وكان يوم جمعة، بس لسبب ما الطلاب مخدوش الدرس، فيوم الجمعة التالي أثناء ما بحضر الدروس، فتحت الدرس تاني من الكتاب ونسيت إني كنت حضرته، ومفتكرتش إلا لما خلصت التحضير والكتابة تقريبا!
وأنا معروف بين الناس إني بنسى كتير، وبكتب على التيليفون أي حاجة عشان منساش، ومعايا دفتر صغير لنفس الأمر.
بس مع ذلك أنا لسا شاب ومش خرف يعني الحمد لله، وعقلي كويس جدا في حاجات كتير، في المذاكرة أنا بستوعب بسرعة، بقرأ وبستمع لكمية ضخمة من الدروس الدينية والروايات المسموعة والبودكاستات، مهتم بالسياسة والدين وبسمع تحليلات فيهم ومش بلاقي أي صعوبة في ده.
بحقظ قرآن الحمد لله ومقدرتي على الحفظ جيدة، في سنة حفظت 6 أجزاء والحمد لله كل سورة بسمعلها أو بقرألها تفسير مطول، يعني 6 أجزاء فاهمهم كويس قبل ما أحفظهم، وطبعا براجع كتير عشان القرآن بيتنسى بسرعة، بس معنديش مشكلة في الأمر يعني.
مشكلتي في نسيان الأمور العادية، مثلا: أمي بقالي شهر طالبة مني أني اسأل محل معين على حاجة معينة (وده هيكون في فسحة المدرسة) وأنا حرفيا بقالي أسبوعين بنسى في المدرسة خالص، مع أني بشرح للطلاب كويس والحمد لله محبوب منهم ومش لاقي مشكلة معاهم، بس موضوع النسيان ده مخوفني شوية
وهو مش نسيان لكل حاجة، لا هو نسيان لحاجات معينة.
