9 طرق سحرية عشان تعتني بصحتك النفسية خلال السفر

طبيعي جدا الشخص وهو مسافر يكون متفائل جدا بخصوص نفسيته وبخصوص رحلته، ولكن الناس اللي عندها قلق وتوتر واكتئاب مزمن بيبقوا فاكرين ان مجرد ما بيسافروا مشاكلهم هي كمان هتسافر وتسيبهم، بس دا مبيحصلش وعشان تحافظ على هدوئك وصحتك النفسية خلال السفر دي أفضل 9 طرق وصلنالها:

اعمل قائمة لحاجات تقلل توترك

التنفس العميق، والدعم والتمرين و كتابة اليوميات و الضغط على كرات التوتر، والفرجة على مسلسلك المفضل، وسماع أغنيتك المفضلة دي كلها طرق عشان تهدي فيضان مشاعرك أو عشان تهدي نفسك وقت ما تكون تعبان وانت مسافر ولوحدك ومش عارف تفضفض لحد، جرب وانت مسافر تبدأ تكتب خواطر أو تحكي عن رحلتك عن طريق الكتابة ودا هيساعدك لما ترجع انك تحكي لصحابك واهلك عن كل حاجة في السفرية.

طمن أهلك عليك

لو فاكر ان مش هيجيلك نوبة حنين للوطن عشان مسافر تتفسح تبقى غلطان! الابتعاد عن كل حاجة متعود عليها شيء مرهق نفسيا حتى لو انت مش لامس الإرهاق ده خلال يومك، كل اللي عليك تعمله انك تطمن اهلك عليك بميعاد وصولك ويكون معاك خط من الدولة دي عشان تقدر تتواصل مع اهلك واصدقائك القريبين وتطمنهم عليك وتكلمهم في كل مكان بتروحه لحد ما ترجع الفندق بالليل، لما يبدأ الاكتئاب أو القلق أو الأفكار السلبية بشكل عام مينفعش تقول انا مش هتقل عليهم! لازم تحكيلهم عشان يطمنوك.

أتكلم مع طبيبك قبل السفر

القلق بخصوص صحتك النفسية طبيعي جدا، حدد ميعاد قبل سفرك بشوية مع طبيب مختص واحكي له عن كل مخاوفك بخصوص الرحلة واستعداداتك، زي ما هتعمل مع صحابك وعائلتك خلي معاك رقم الطبيب عشان لو احتاجتله.

خط ساخن للاستشارات النفسية

أوقات الازمات النفسية بتحصل بشكل غير متوقع ممكن يكون بسبب تغيير الطقس أو بسبب العزلة الاجتماعية وأسباب تانية كتير، وكلها ممكن تؤدي بالشخص انه يبكي أو يصرخ بشكل هيستيري لو مسيطرش على مشاعره و أفكاره، من الحاجات اللي اكتشفناها مؤخرا ان في عيادات نفسية بتسيب خط ساخن للاستشارات عبر التليفون ولو انت مسافر دور في العيادات اللي في الدولة اللي انتم سافر ليها واشترك في الخدمة دي في فترة رحلتك.

خد من البيت حاجات بتحبها

البُعد عن بيتك واهلك مش سهل لكل الناس خصوصا لو سفرك هياخد فترة، الأفضل تاخد معاك من البيت بتريحك زي مخدة بتاعتك أو الشامبو بتاعك أو أي حاجة تكون بتحسسك انك في بيتك

اعرف وجهتك واعمل خطة طوارئ

لو عندك تاريخ مع المرض النفسي يبقى لازم تكون حالة استعداد لو احتجت لطلب المساعدة لو بقيت في حالة حرجة، اللي مسافر معاك لازم تعرفه بخصوص مرضك سواء كان قلق وتوتر بيجي بين كل فين وفين لحد نوبات الهلع ونوبات القلق الحادة لو بتصيبك، وقبل ما توصل مكان رحلتك اعرف مكان اقرب مستشفي او اقرب عيادة للفندق اللي انت فيه.

خلي معاك علاج

لو بالفعل مصاب بمرض نفسي وبتاخدله مهدئات أو أدوية يبقى لازم تتأكد انك معاك كمية كافية من الادوية تكفيك طول رحلتك، دا غير طبعا الادوية الجسدية أو الإسعافات الأولية، ولازم تشوف لوائح الدولة اللي انت رايحها لو مانعين أي دوا انت بتاخده، ولو فعلا في دواء ممنوع خلي معاك روشتة الطبيب بأنك لازم تاخد الدوا أو يشوفلك بديل.

وقت للراحة خلال الرحلة

الراحة والاسترخاء حتى خلال الرحلات الممتعة شيء أساسي، حتى لو متعود على الحركة أو مش حاسس بالتعب، لكن هيفرق معاك جدا وقت الراحة وانك تاخد عدد ساعات نوم كافية.

خليك واقعي

الشئ اللي بيزيد عن حده بينقلب ضده، لا تكون دايما حاطط أسوأ سيناريو في دماغك انه هيصحل، ولا برضو تتخيل إن الدنيا بمبي ومفيش حاجة وحشة ممكن تحصلك، اتبسط وسافر وروح رحلتك لكن تكون على استعداد للاشياء السيئة اللي ممكن تحصل.