ازاي ترتب دماغك وازاي تعيش مبسوط أكتر؟ أهم 6 حاجات

دايماً مشغولين بصحه و جمال و شكل كل جزء فينا، بس من اول الكتاف و انت نازل، ناسيين خالص ان كل حاجه مصدرها من فوق الرقبه، الدماغ كله من الدماغ.. عقلك بيتحكم فى كل جسمك، حركتك نومك احساسك غضبك فرحك حتى جوعك و شبعك، تخيل بقي لو قدرت تسيطر على الوحش ده و تبقى انت السيد مش هو.. اكيد كسبانه
ازاى؟؟؟

6 حاجات تبان سهله بس محتاجه وقت و ممارسه عشان تضبطها:

1) مخك مليان كراكيب، لازم ترتبه و تنضفه الاول

اول حاجه عامله زحمه هي الذكريات، فيها حلو بنحبه و مش هنرميه و فيها وحش كل دوره انه يقرفك بس.
الوحش مالوش لزمه يفضل معاك ، مش هتقدر تمسحه بس لازم تركنه. اخرك ممكن تزوره كل فتره زياره خفيفه بمزاجك و وقت ما تحب، ما تسمحلوش يطب عليك مع نفسه كده من غير عزومه. لما تزوره كده فى وقت روقانك يكون بهدف مراجعه درس او قرار غلط او خبره اخدتها من موقف. اهم حاجه تحبه و تحترمه و تقبله بكل مشاكله و غلطاته، و ما تنساش انه خلاك الى انت فيه دلوقتى فحتى العك بتاعه كان ليه حسنات فى تكوينك. بعد الزياره السريعه دى بوسو و حطه جنب الحيطه، ماتشيلوش على كتفك و انت ماشى، انت مش ناقص تقل. كل مره ارجع من الزياره دى لوحدك، لما تسيطر علي ماضيك هتبطل تخاف من عفاريته و هتستفيد من دروسه.

2) كل ثانيه فى منبه بيرن، ركز معاه

اكيد عدى عليك وقت حسيت فيه بتوهان و ضارب لخمه، عملت كل الي تقدر عليه من وجهه نظرك بس برضه مش عايزه تظبط، مركز اوى في تفاصيلك و افكارك و تصرفاتك و برضه مش جايبه همها، واقف محتاس مش عارف تمشي فى انهى اتجاه.
جرب تصحصح سنه لمحيطك و الي بيحصل فيه، كل شويه فى حاجه بتتبعت ليك، تديك زقه فى السكه الصح او تقولك فكك من السكه دى بلاش منها. سميها منبه علامه اشاره او اي اسم يريحك، المهم تلقط. ممكن تيجي في صورة حلم، معلومه توصلك، موقف حصل قدامك، كلمه سمعتها، او بني ادم تتكعبل فيه من غير مناسبه.
خليك متاكد ان كل حاجه فى الكون مترابطه بصوره موزونه و حساسه اوى، بس عايزه تتش ذكاء و صحصحه عشان تلقط الاشارات، ركز و ماتعملش سنوز للمنبه الي بيجيلك. صحصح.

3) ايه مشكلتك مع الازرق؟

بالانجليزى بيقولك (بلو موود) يعنى زعلان مأير مقريف، مع ان الازرق مالوش ذنب و من الالوان الجامده، بس ماشي، حاسس بالزرقان؟ و ماله..
اللون الازق اكيد مش ضيف مرغوب فيه ، بس بيحصل و بييجى و بيرشق في يومك فجأه من غير مقدمات، مش هتعرف تطرده بسهوله عشان هو غتت و تقيل، و هدفه يعكنن عليك بس. الحل تحرجه، اقبله و خليه ياخد قعدته و هيجيله وقت و يزهق و يمشي.
زى ما بتقبل كل الالوان الي بتزورك فى حياتك اقبل الازرق لانه واقع هيفضل ليه دور في نفسيتك و مش هتقدر تتجاهل وجوده، بس حطه فى حجمه الحقيقى، هو صغير و مؤقت و ضعيف و فى قدامه 100 لون تاني ، ده مجرد لون واحد. انت بنى ادم و الانسان هو الكائن الوحيد القادر على تمييز كل الالوان بدرجاتها، لازم تشوف الازرق عشان تقدر باقي الالوان لما تشوفها.

4) الميه معجزه في حد ذاتها، مصدر ابهار بصراحه..

بتتأقلم مع اى حاجه، بتشيل اوزان، بتتقبل المساحه الى حواليها و تتشكل معاها، اي عقبه قدامها بتعرف تلاقى حل و تلف حواليها، بتنزل و تطلع بمنتهى الثبات على الطريق الي قدامها، مافيش حاجه بتوقفها..الحاله الوحيده الي تكسرها هى انها تتجمد مكانها فى صورة تلج و فى النهايه هتسيح برضه و تكون مجبره تتاقلم مع محيطها بس غصب عنها.
شغل دماغك زى الميه، اتعلم منها، اتاقلم، خليك سهل التعامل، تقبل العقبات الي جايه فى وشك و نط من فوقها او ازحف تحتها، اوعي تعند و تقفش و تتجمد مكانك عشان ما تتكسرش..ما تحجرش عشان لو عملت كده ماحدش هايخسر غيرك و فى الاخر هتعيش الحياه يعنى هتعيشها، اتأقلم.

5) اظبط الزوايا

زى اى صوره علي الحيطه، متعلقه بمنتهى التوازن باربع زوايا. احنا كمان كل واحد فينا جواه اربع زوايا متعلق منهم فى الحياه دى، جسمك عقلك قلبك و شخصيتك.
مع كل تجربه بتمر بيها، فى واحده او اتنين من الزوايا دى بيزيد عليه شوية تقل، او ممكن كلهم.
الصياعه هنا انك ما تسمحش لاى زاويه تتقل اكتر من اللازم عن التانيين، خليك متوازن. ماينفعش تبقى طول الوقت منطقى بس او عاطفى بس او اجتماعى بس او جد بس. اظبط زواياك الاربعه باستمرار و حافظ على التوازن بينهم عشان صورتك تفضل دايمًا ثابته على الحيطه، كل ما خبراتك هتزيد الزوايا هتتظبط اكتر و اتجاهك فى الحياه هيبقى دايماً اوضح و اصح، عشان انت كانسان متوازن جواك ليك و للى حواليك.

6) ما تضيعش تفكيرك فى الي مالكش عليه سيطره

كلنا بنقلق و بنخطط طول الوقت، خلايا مخك مش بتتجدد بعد سن العشرين و بتفضل الباقى من عمرك تحرق فى الخلايا الي فاضله.
خليك ذكى و ما تضيعش خلايا مخك في التفكير في حاجات خارجه عن سيطرتك و تحكمك.. اسعى بس ما تقلقش على رزقك
خاف علي صحتك بس ما تقلقش من العيا. دور على الحب بس ماتحسبش انت لازم تتجوز قبل سن معين. القلق مُتعب جدًا.
عيش كل يوم زى مايكون الاخير، ببساطه افرح و ارمي الكوره بحرفنتك و سيب الدنيا ترجعهالك بطريقتها
ما تستناش حاجه لو حبالها مش فى ايدك.